Mahabharata · Chapter 12.1

nārāyaṇaṃ namaskṛtya naraṃ caiva narottamam /
devīṃ sarasvatīṃ vyāsaṃ tato jayamudīrayet //
vaiśampāyana uvāca /
kṛtvodakaṃ te suhṛdāṃ sarveṣāṃ pāṇḍunandanāḥ / viduro dhṛtarāṣṭraśca sarvāśca bharatastriyaḥ //

tatra te sumahātmāno nyavasankurunandanāḥ /
śaucaṃ nirvartayiṣyanto māsaccātraṃ bahiḥ purāt //

kṛtodakaṃ tu rājānaṃ dharmātmānaṃ yudhiṣṭhiram /
abhijagmurmahātmānaḥ siddhā brahmarṣisattamāḥ //

dvaipāyano nāradaśca devalaśca mahānṛṣiḥ /
devasthānaśca kaṇvaśca teṣāṃ śiṣyāśca sattamāḥ //

anye ca vedavidvāṃsaḥ kṛtaprajñā dvijātayaḥ /
gṛhasthāḥ snātakāḥ santo dadṛśuḥ kurusattamam //

te'bhigamya mahātmānaṃ pūjitāśca yathāvidhi /
āsaneṣu mahārheṣu viviśuḥ paramarṣayaḥ //

pratigṛhya tataḥ pūjāṃ tatkālasadṛśīṃ tadā /
paryupāṃsanyathānyāyaṃ parivārya yudhiṣṭhiram //

puṇye bhāgīrathītīre śokavyākulacetasam /
āśvāsayanto rājendraṃ viprāḥ śatasahasraśaḥ //

nāradastvavravītkāle dharmaputraṃ yudhiṣṭhiram /
sambhāṣya munibhiḥ sārdhaṃ kṛṣṇadvaipāyanādibhiḥ //
nārada uvāca /

pārthasya bāhuvīryeṇa prasādānmādhavasya ca /
jitā seyaṃ mahī kṛtsnā dharmeṇa ca yudhiṣṭhira //

diṣṭyā muktāḥ stha sangrāmādasmāllokabhayankarāt /
kṣatradharmarataścāsi kaccinmodasi pāṇḍava //

kaccicca nihatāmitraḥ prīṇāsi suhṛdo nṛpa /
kaccicchriyamimāṃ prāpya na tvāṃ śokaḥ prabādhate //
yudhiṣṭhira uvāca /

vijiteyaṃ mahī kṛtsnā kṛṣṇabāhubalāśrayāt /
brāhmaṇānāṃ prasādena bhīmārjunabalena ca //

idaṃ tu me mahadduḥkhaṃ vartate hṛdi nityadā /
kṛtvā jñātikṣayamimaṃ mahāntaṃ ghoradarśanam //

saubhadraṃ draupadeyāṃśca ghātayitvā sutānpriyān /
jayo'yamajayākāro bhagavanpratibhāti me //

kinnu vakṣyati vārṣṇeyī vadhūrme madhusūdanam /
dvārakāvāsinī kṛṣṇamitaḥ pratigataṃ harim //

draupadī hataputreyaṃ kṛpaṇā hatabāndhavā /
asmatpriyahite yuktā bhūyaḥ pīḍayatīva mām //

idamanyacca bhagavanyattvāṃ vakṣyāmi nārada /
mantrasaṃvaraṇenāsmi kuntyā duḥkhena yojitaḥ //

yaḥ sa nāgāyutaprāṇo loke'pratiratho raṇe /
siṃhavikrāntagāmī ca jitakāśī yatavrataḥ //

āśrayo dhārtarāṣṭrāṇāṃ mānī tīkṣṇaparākramaḥ /
amarṣī nityasaṃrambhī kṣeptā'smākaṃ raṇeraṇe //

śīghrāstraścitrayodhī ca kṛtī cādbhutavikramaḥ / gūḍhotpannaḥ sutaḥ kuntyā bhrātā'smākamasau kila

toyakarmaṇi taṃ kuntī kathayāmāsa me tadā /
putraṃ sarvaguṇoyetaṃ karṇaṃ tyaktaṃ jale purā //

mañjūṣāyāṃ samādhāya gaṅgāsrotasyamajjayat /
yaṃ sūtaputraṃ loko'yaṃ rādheyaṃ cābhyamanyata //

sa sūryaputraḥ kuntyā yai bhrātā'smākaṃ ca mātṛtaḥ / ajānatā mayā saḍkhye rājyalubdhena ghātitaḥ /
tanme dahati gātrāṇi tūlarāśimivānalaḥ //

na hi taṃ veda pārtho'pi bhrātaraṃ śvetavāhanaḥ /
nāhaṃ na bhīmo na yamau sa tvasmānveda tatvataḥ //

gatā kila pṛthā tasya sakāśamiti naḥ ścutam /
asmākaṃ śamakāmā vai tvaṃ ca putro mametyatha //

pṛthāyā na kṛtaḥ kāmastena cāpi mahātmanā /
atīvānucitaṃ mātaravoca iti so'bravīt //

na hi śakṣyāmi santyaktumahaṃ duryodhanaṃ raṇe /
anāryatvaṃ nṛśaṃsatvaṃ kṛtaghnatvaṃ ca me bhavet //

yudhiṣṭhireṇa sandhiṃ hi yadi kuryāṃ mate tava /
bhīto raṇe śvetavāhāditi māṃ maṃsyate janaḥ //

so'haṃ nirjitya samare vijayaṃ sahakeśavam /
sandhāsye dharmaputreṇa paścāditi ca so'bravīt //

tamavocatkila pṛthā punaḥ pṛthulavakṣasam /
caturṇāmabhayaṃ dehi kāmaṃ yudhyasva phalgunam //

so'bravīnmātaraṃ dhīmānvepamānāṃ kṛtāñjaliḥ /
prāptānviṣahyāṃścaturo na haniṣyāmi te sutān //

pañcaiva hi sutā devi bhaviṣyanti tava dhruvāḥ /
sārjunā vā hate karṇe sakarṇā vā hate'rjune //

taṃ putragṛddhinī bhūyo mātā putramathābravīt /
bhrātṝṇāṃ svasti kurvīthā yeṣāṃ svasti cikīrṣasi //

evamuktvā kila pṛthā visṛjyopayayau gṛhān /
so'rjunena hato vīro bhrātrā bhrātā sahodaraḥ //

na caiva niḥsṛto mantraḥ pṛthāyāstasya vā mune /
atha śūro maheṣvāsaḥ pārthenājau nipātitaḥ //

ahaṃ tvajñāsiṣaṃ paścātsvasodaryaṃ dvijottama /
pūrvajaṃ bhrātaraṃ karṇaṃ pṛthāyā vacanātprabho //

tena me dūyate tīvraṃ hṛdayaṃ bhrātṛghātinaḥ /
karṇārjunasahāyo'haṃ jayeyamapi vāsavam //

sabhāyāṃ kliśyamānasya dhārtarāṣṭrairdurātmabhiḥ /
sahasotpatitaḥ krodhaḥ karṇaṃ dṛṣṭvā praśāmyati //

yadā hyasya giro rūkṣāḥ śrṛṇomi kaṭukodayāḥ /
sabhāyāṃ gadato dyūte duryodhanahitaiṣiṇaḥ //

tadā naśyati me roṣaḥ pādau tasya nirīkṣya ha /
kuntyā hi sadṛśau pādau karṇasyeti matirmama //

sādṛśyahetumanvicchanpṛthāyāstasya caiva ha /
kāraṇaṃ nādhigacchāmi kathañcidapi cintayan //

kathaṃ nu tasya sangrāme pṛthivī cakramagrasat /
kathaṃ nu śapto bhrātā me tattvaṃ vaktumihārhasi //

śrotumicchāmi bhagavaṃstvattaḥ sarvaṃ yathātatham /
bhavānhi sarvavidvidvām̐lloke veda kṛtākṛtam //