Mahabharata · Chapter 11.23

eṣa śalyo hataḥ śete sākṣānnakulamātulaḥ /
dharmajñena hatastāta dharmarājena saṃyuge //

yastvayā spardhate nityaṃ sarvatra puruṣarṣabha /
sa eṣa nihataḥ śete madrarājo mahābalaḥ //

jayadrathe yadi brūyuruparodhaṃ kathañcana / madraputre kathaṃ brūyuruparodhaṃ vivakṣavaḥ //

yena saṅgṛhṇatā tāta rathamādhiratheryudhi /
jayārthaṃ pāṇḍuputrāṇāṃ tadā tejovadhaḥ kṛtaḥ //

aho dhikphaśya śalyasya pūrṇacandrasudarśanam /
mukhaṃ pdmapalāśākṣaṃ kākairādaṣṭamavraṇam //

eṣā cāmīkarābhasya taptakāñcanasaprabhā /
āsyādviniḥ sṛtā jihvā bhakṣyate kṛṣṇa pakṣibhiḥ //

yudhiṣṭhireṇa nihataṃ śalyaṃ samitiśobhanam /
rudantyaḥ paryupāsante madrarājaṃ kulāṅganāḥ //

etāḥ susūkṣmavasanā madrarājaṃ nararṣabham /
krośantyo'tha samāsādya kṣatriyāḥ kṣatriyarṣabham //

śalyaṃ nipatitaṃ nāryaḥ parivāryābhitaḥ sthitāḥ /
vāsitā gṛṣṭayaḥ paṅke parimagnamivarṣabham //

śalyaṃ śaraṇadaṃ śūraṃ paśyemaṃ vṛṣṇinandana /
śayānaṃ vīraśayane śarairviśakalīkṛtam //

eṣa śailālayo rājā bhagadattaḥ pratāpavān /
gajāṅkuśadharaḥ śrīmāñśete bhuvi nipātitaḥ //

yasya rukmamayī mālā śirasyeṣā virājate /
śvāpadairbhakṣyamāṇasya śobhayantīva mūrdhajān //

etena kila pārthasya yuddhamāsītsudāruṇam /
romaharṣaṇamatyugraṃ śakrasya tvahinā yathā //

yodhayitvā māhābāhureṣa pārthaṃ dhanañjayam /
saṃśayaṃ gamayitvā ca kuntīputreṇa pātitaḥ //

yasya nāsti samo loke śaurye vīrye ca kaścan /
sa eṣa nihataḥ śete bhīṣmo bhīṣmakṛdāhave //

paśya śāntanavaṃ kṛṣṇa śayānaṃ sūryavarcasam /
yugānta iva kālena pātitaṃ sūryamambarāt //

eṣa taptvā raṇe śatrūñśastratāpena vīryavān /
narasūryo'stamabhyeti sūryo'stamiva keśava //

śaratalpagataṃ bhīṣmamūrdhvaretasamacyutam /
śayānaṃ vīraśayane paśya śūraniṣevite //

karṇinālīkanārācairāstīrya śayanottamam /
āviśya śete bhagavānskandaḥ śaravaṇaṃ yathā //

atūlapūrṇaṃ gāṅgeyastribhirbāṇaiḥ samanvitam /
upadhāyopadhānāgryaṃ dattaṃ gāṇḍīvadhanvanā //

pālayānaḥ pituḥ śāstramūrdhvaretā mahāyaśāḥ /
eṣa śāntanavaḥ śete mādhavāpratimo yudhi //

dharmātmā tāta sarvajñaḥ pārāvaryeṇa nirṇaye /
amartya iva martyaḥ sanneṣa prāṇānadhārayat //

nāsti yuddhe kṛtī kaścinna vidvān्na parākramī /
yatra śāntanavo bhīṣmaḥ śete'dya nihataḥ paraiḥ //

svayametena śūreṇa pṛcchayamānena pāṇḍavaiḥ /
dharmajñenāhave mṛtyurādiṣṭaḥ satyavādinā //

pranaṣṭaḥ kuruvaṃśaśca punaryena samudvṛtaḥ /
sa gataḥ kurubhiḥ sārdhaṃ mahābuddhiḥ parābhavam //

dharmeṇa kuravaḥ kena paridrakṣyanti mādhava /
hate devavrate bhīṣme devakalpe nararṣabhe //

arjunasya vinetāramācāryaṃ sātyakestathā /
taṃ paśya patitaṃ droṇaṃ kurūṇāṃ gurumuttamam //

astraṃ caturvidhaṃ veda yathaiva tridaśeśvaraḥ /
bhārgavo vā mahāvīryastathā droṇo'pi mādhava //

yasya prasādādbībhatsuḥ pāṇḍavaḥ karma duṣkaram /
cakāra sa hataḥ śete nainamastrāṇyapālayan //

yaṃ purodhāya kurava āhvayanti sma pāṇḍavān /
so'yaṃ śastrabhṛtāṃ śreṣṭho droṇaḥ śastrapṛthakkṛtaḥ //

yasya nirdahataḥ senāṃ gatiragnarivābhavat /
sa bhūmau nihataḥ śete śāntārciriva pāvakaḥ //

dhanurmuṣṭiraśīrṇaśca hastāvāpaśca mādhava /
droṇasya nihatasyāpi dṛśyate jīvato yathā //

vedā yasmācca catvāraḥ sarvāṇyastrāṇi keśava /
anapetāni vai śūrādyathaivādau prajāpateḥ //

candanārhāvimau tasya bandibhirvanditau śubhau /
gomāyavo vikarṣanti pādau śiṣyaśatārcitau //

droṇaṃ drupadaputreṇa nihataṃ madhusūdana /
kṛpī kṛpaṇamanvāste duḥkhopahatacetanā //

tāṃ paśya rudatīmārtāṃ muktakeśīmadhomukhīm /
hataṃ patimupāsantīṃ droṇaṃ śastrabhṛtāṃ varam //

bāṇairbhinnatanutrāṇaṃ dhṛṣṭadyumnena keśava /
upāste vai mṛdhe droṇaṃ jaṭilā brahmacāriṇī //

pretakṛtye ca yatate kṛpī kṛpaṇamāturā /
hatasya samare bhartuḥ sukumārī yaśasvinī //

agnīnādhāya vividhavaccitāṃ prajvālya sarvataḥ /
droṇamādhāya gāyanti trīṇi sāmāni sāmagāḥ //

kurvanti ca citāmete jaṭilā brahmacāriṇaḥ /
dhanurbhiḥ śaktibhiścaiva rathanīḍaiśca mādhava //

śaraiśca vividhairanyairdhakṣyante bhūritejasam /
ta ete droṇamādāya gāyanti ca rudanti ca //

sāmabhistribhirantasthairanuśaṃsanti cāpare /
agnāvagniṃ samādhāya droṇaṃ hutvā hutāśane //

gacchantyabhimukhā gaṅgāṃ droṇaśiṣyā dvijātayaḥ /
apasavyāṃ citiṃ kṛtvā puraskṛtya kṛpīṃ tathā //