Mahabharata · Chapter 11.24

somadattasutaṃ paśya yuyudhānena pātitam /
vitudyamānaṃ vihagairbahubhirmādhavāntike //

putraśokābhisantaptaḥ śomadatto janārdana /
yuyudhānaṃ maheṣvāsaṃ garhayanniva dṛśyate //

asau hi bhūriśvaso mātā śokapariplutā /
āśvāsayati bhartāraṃ somadattamaninditā //

diṣṭyā nainaṃ mahārāja dāruṇaṃ bharatakṣayam /
kurusaṅkrandanaṃ ghoraṃ yugāntamanupaśyasi //

diṣṭyā yūpadhvajaṃ putraṃ vīraṃ bhūrisahasradam /
anekakratuyajvānaṃ nihataṃ nānupaśyasi //

diṣṭyā snuṣāṇāmākrande ghoraṃ vilapitaṃ bahu /
na śṛṇoṣi mahārāja sārasīnāmivārṇave //

ekavastrāstu pañcaitāḥ prakīrṇāsitamūrdhajāḥ /
snuṣāste paridhāvanti hatāpatyā hateśvarāḥ //

śvāpadairbhakṣyamāṇaṃ tvamaho diṣṭyā na paśyasi /
chinnabāhuṃ naravyāghramarjunena nipātitam //

śalaṃ vinihataṃ saṅkhye bhūriśravasameva ca /
snuṣāśca vividhāḥ sarvā diṣṭyā nādyeha paśyasi //

diṣṭyā tatkāñcanaṃ chatraṃ yūpaketormahātmanaḥ /
vinīkīrṇaṃ rathopasthe saumadatterna paśyasi //

amūstu bhūriśravaso bhāryāḥ sātyakinā hatam /
parivāryānuśocanti bhartāramasitekṣaṇāḥ //

etā vilapya karuṇaṃ bhartṛśokena karśitāḥ /
patantyabhimukhā bhūmau kṛpaṇaṃ bata keśava //

bībhatsuratibībhatsaṃ karmedamakarotkatham /
pramattasya yadacchaitsīdbāhuṃ śūrasya yajvanaḥ //

tataḥ pāpataraṃ karma kṛtavānapi sātyakiḥ /
yasmātprāyopaviṣṭasya prāhārṣītsaṃśitātmanaḥ //

eko dvābhyāṃ hataḥ śete kṣatradharmeṇa dhārmikaḥ /
kinnu vakṣyati vai satsu goṣṭhīṣu ca sabhāsu ca //

apuṇyamayaśasyaṃ ca karmedaṃ sātyakiḥ svayam /
iti yūpadhvajasyaitāḥ striyaḥ krośanti mādhava //

bhāryā yūpadhvajasyaiṣā karasammitamadhyamā /
kṛtvotsaṅge bhujaṃ bhartuḥ kṛpaṇaṃ paridevati //

ayaṃ sa hantā śūrāṇāṃ mitrāṇāmabhayapradaḥ /
pradātā gosahasrāṇāṃ kṣatriyāntakaraḥ karaḥ //

ayaṃ sa raśanotkarṣī pīnastanavimardanaḥ /
nābhyūrujaghanasparśī nīvīvisraṃsanaḥ karaḥ //

vāsudevasya sānnidhye pārthenākliṣṭakarmaṇā /
yudhyataḥ samare'nyena pramattasya nipātitaḥ //

kinnu vakṣyasi saṃsatsu kathāsu ca janārdana /
arjunasya mahatkarma svayaṃ vā sa kirīṭabhṛt //

ityevaṃ garhayitvaiṣā tūṣṇīmāste varāṅganā /
tāmetāmanuśocanti sapatnyaḥ svāmiva snuṣām //

gāndhārarājaḥ śakunirbalavānsatyavikramaḥ /
nihataḥ sahadevena bhāginemena mātulaḥ //

yaḥ purā hemadaṇḍābhyāṃ vyajanābhyāṃ sma vījyate /
sa eṣa pakṣibhiḥ pakṣaiḥ śayāna upavījyate //

yaḥ svarūpāṇi kurute śataśo'tha sahasraśaḥ /
tasya māyāvino māyā dagdhāḥ pāṇḍavatejasā //

māyayā nikṛtiprajño jitavānyo yudhiṣṭhiram /
sabhāyāṃ vipulaṃ rājyaṃ sa jahau jīvitaṃ katham //

śakuntāḥ śakuniṃ kṛṣṇa samantātparyupāsate /
kitavaṃ mama putrāṇāṃ vināśāyopaśikṣitam //

etenaitanmahadvairaṃ prasaktaṃ pāṇḍavaiḥ saha /
vadhāya mama putrāṇāmātmanaḥ sagaṇasya ca //

yathaiva mama putrāṇāṃ lokāḥ śastrajitāḥ prabho /
evamasyāpi durbuddherlokāḥ śastreṇa vai jitāḥ //

kathaṃ ca nāyaṃ tatrāpi putrānme bhrātṛbhiḥ saha /
virodhayedṛjuprajñānanṛjurmadhusūdana //