Mahabharata · Chapter 11.22

āvanatyaṃ bhīmasenena bhakṣayanti nipātitam /
gṛdhragomāyavaḥ śūraṃ dūrabandhumabandhuvat //

taṃ paśya kadanaṃ kṛtvā śūrāṇāṃ madhusūdana /
śayānaṃ vīraśayane rudhireṇa samukṣitam //

taṃ sṛgālāśca kaṅkāśca kravyādāśca pṛthagvidhāḥ /
tenatena vikarṣanti paśya kālasya paryayam //

śayānaṃ vīraśayane śūramākrandakāriṇam /
āvantyamabhito nāryo rudatyaḥ paryupāsate //

prātipeyaṃ maheṣvāsaṃ hataṃ bhīmena bāhlikam /
prasuptamiva śārdulaṃ paśya kṛṣṇamanasvinam //

atīva mukhavarṇo'sya nihatasyāpi śobhate /
somasyavābhipūrṇasya paurṇamāsyāṃ samudyataḥ //

putraśokābhitaptena pratijñāṃ cābhirakṣatā /
pākaśāsaninā saṅkhye vārdhakṣatrirnipātitaḥ //

ekādaśacamūrbhittvā rakṣyamāṇaṃ mahātmabhiḥ /
satyaṃ cikīrṣatā paśya hatamenaṃ jayadratham //

sindhusauvīrabhartāraṃ darpapūrṇaṃ manasvinam /
bhakṣayanti śivā gṛdhrā janārdana jayadratham //

saṃrakṣyamāṇaṃ bhāryābhiranuraktābhiracyuta /
bhīṣayantyo vikarṣanti gahanaṃ nimnamantikāt //

tametāḥ paryapāsante vīkṣamāṇā mahābhujam /
sindhusauvīrakāmbhojagāndhārayavanastriyaḥ //

yadā kṛṣṇāmupādāya prādravatkekayaiḥ saha /
tadaiva vadhyaḥ pāṇḍūnāṃ janārdana jayadrathaḥ //

duḥśalāṃ mānayadbhistu tadā mukto jayadrathaḥ /
kathamadya na tāṃ kṛṣṇa mānayanti sma te punaḥ //

saindhavaṃ me sutā bālā prassvalantīva duḥkhitā /
pramāpayantī cātmānamākrośantīva pāṇḍavān //

kinnu duḥkhataraṃ kṛṣṇa paraṃ mama bhaviṣyati /
yatsutā vidhavā bālā snuṣāśca nihateśvarāḥ //

hāhā dhigdhuḥśalāṃ paśya vītaśokabhayāmiva /
bhartuḥ śira apaśyantīṃ dhāvamānāmitastataḥ //

vārayāmāsa yaḥ sarvānpāṇḍavānputragṛdvinaḥ /
sa hatvā vipulāḥ senāḥ sarvayaṃ mṛtyuvaśaṃ gataḥ //

taṃ mattamiva mātaṅgaṃ vīraṃ paramadurjayam /
parivārya rudantyetāḥ striyaścandropamānanāḥ //