Mahabharata · Chapter 11.14

tacchrutvā vacanaṃ tasyā bhīmaseno'tha bhītavat /
gāndhārīṃ pratyuvācedaṃ vacaḥ sānunayaṃ tadā //

adharmo yadi vā dharmastrāsāttatra mayā kṛtaḥ /
ātmānaṃ trātukāmena tanme tvaṃ kṣantumarhasi //

na hi yuddhena putraste dharmeṇa sa mahābalaḥ /
duḥśakyaḥ kenaciddhartumato viṣamamācaram //

adharmeṇa jitaḥ pūrvaṃ tena cāpi yudhiṣṭhiraḥ /
nikṛtāśca sadaiva sma to viṣamamācaram //

sainyasyaiko'vaśiṣṭo'yaṃ gadāyuddhe ca vīryavān /
na tyakṣyati hṛtaṃ rājyamiti vai tatkṛtaṃ mayā //

ekapatnīṃ ca pāścālīmekavastrāṃ rajasvalām /
bhavatyā viditaṃ sarvamuktavānyatsutastava //

suyodhanaṃ tvasaṃhṛtya na śakyā bhūḥ sasāgarā /
kevalā bhoktumasmābhirataścaitatkṛtaṃ mayā //

taccāpyapriyamasmākaṃ putraste samupācarat /
draupadyā yatsabhāmadhye savyamūrumadarśayat //

tatraiva vadhyaḥ so'smākaṃ durācāro'pba te sutaḥ /
dharmarājājñayā caiva sthitāḥ sma samaye purā //

vairamuddīpitaṃ rājñi putreṇa tava yanmahat /
kleśitāśca vane nityaṃ tata etatkṛtaṃ mayā //

vairasyāsya gatāḥ pāraṃ hatvā duryodhanaṃ raṇe /
rājyaṃ yudhiṣṭhire prāpte vayaṃ ca gatamanyavaḥ //
gāndhāryuvāca /

na tasyaivaṃ vadhastāta yaṃ praśaṃsasi me sutam /
kṛtavāṃścāpi tatsarvaṃ yadidaṃ bhāṣase mayi //

hatāśve nakule yattu vṛṣasenena bhārata /
apibaḥ śoṇitaṃ saṅkhye duḥśāsanaśarīrajam //

sadbhirvigarhitaṃ ghoramanāryajanasevitam /
krūraṃ karmākṛthāstasmāttadayuktaṃ vṛkodara //
bhīma uvāca /

hatāśvaṃ nakulaṃ dṛṣṭvā vṛṣasenena saṃyuge /
śatrūṇāṃ tu prahṛṣṭānāṃ trāsaḥ sañjanito mayā //

sa pratijñāmakaravaṃ pibāmyasṛgareriti /
rudhiraṃ nāticakrāma dantoṣṭhādamba mā śucaḥ //

[anyasyāpi na pātavyaṃ rudhiraṃ kimpunaḥ svakam /
yathaivātmā tathā bhrātā viśeṣo nāsti kaścana //

vaivastito hi tadveda yathāvatkulanandini /
mā kṛthā hṛdi tanmātarna tatpītaṃ mayā'nadhe //

keśapakṣaparāmarśe draupadyā dyūtakārite /
krodhādyadabravaṃ cāhaṃ tacca me hṛdi vartate //

kṣatradharmāccyuto rājñi bhaveyaṃ śāśvatīḥ samāḥ /
pratijñāṃ tāmanistīrya tatastatkṛtavānaham //

anigṛhya purā putrānasmasvanapakāriṣu /
na mamārhasi kalyāṇi doṣeṇa pariśaṅkitum //
gāndhāryuvāca /

vṛddhasyāsya śataṃ putrānnighnaṃstvamaparājitaḥ /
kasmānāśeṣayaḥ kañcidyenālpamaparādhitam //

santānamāvayostāta vṛddhayorhṛtarājyayoḥ /
nāśeṣayaḥ kathaṃ yaṣṭimekāṃ vṛddhayugasya vai //

śeṣe hyavasthite tāta putrāṇāmalpake'pi ca /
mandaduḥkhaṃ bhavedadya yadi tvaṃ dharmamācareḥ //