Mahabharata · Chapter 11.15

tamevamuktvā gāndhārī yudhiṣṭhiramapṛcchata /
kva sa rājeti sakrodhā putrapautravadhārditā //

tāmabhyagacchatkaunteyo vepamānaḥ kṛtāñjaliḥ /
yudhiṣṭhirastu gāndhārīṃ madhuraṃ vākyamabravīt //

putrahantā nṛśaṃso'haṃ tava devi yudhiṣṭhiraḥ /
śāpārhaḥ pṛthivīnāśe hetubhūtaḥ śapasva mām //

nahi me jīvitenārtho na rājyena sukhena vā /
tādṛśānsuhṛdo hatvā pramūḍhasya suhṛddruhaḥ //

tamevaṃvādinaṃ bhītaṃ sannikarṣāgataṃ tadā /
novāca kiñcidgāndhārī niḥśvāsaparamā nṛpa //

tasmāvanatadehasya pādayornipatiṣyataḥ /
yudhiṣṭhirasya nṛpaterdharmajñā dīrghadarśinī //

aṅgulyagrāṇi dadṛśe devī paṭṭāntareṇa sā /
tataḥ sa kunakhībhūto darśanīyanakho nṛpaḥ //

taṃ dṛṣṭvā cārjuno'gacchadvāsudevasya pṛṣṭhataḥ //

evaṃ sañceṣṭamānāṃstānitaścetaśca bhārata /
gāndhārī vigatakrodhā sāntvayāmāsa mātṛvat //

te pāṇḍavā anujñātā mātaraṃ vītamatsarāḥ /
abhyagacchanta sahitāḥ pṛthāṃ pṛthuvalakṣasaḥ //

cirasya dṛṣṭvā putrānsā putrādhibhirabhiplutā /
bāṣpamāhārayaddevī vastreṇāvṛtya vai mukham //

tato bāṣpaṃ samutsṛjya saha putraistadā pṛthā /
apaśyadenāñśastraughairbahudhā parivikṣatān //

sā tānekaikaśaḥ putrānsaṃspṛśantī punaḥpunaḥ / anvaśocata duḥkhārtā draupadīṃ nihatātmajām /
rudantīmatha pāñcālīṃ dadarśa patitāṃ bhuvi //
draupadyuvāca /

ārye pautrāstu te sarve saubhadrasahitā gatāḥ / na tvāṃ te'dyābhigacchanti ciraṃ dṛṣṭvā anindite /
kinnu rājyena me kāryaṃ vihīnāyāḥ sutairvaraiḥ //

tāṃ samāśvāsayāmāsa pṛthā pṛthalalocanā /
utthāpyāṅkena sudatīṃ rudatīṃ śokakarśitām //

tayaiva sahitā cāpi putrairanugatā pṛthā /
abhyagacchata gāndhārīmārtāmārtatarā svayam //
vaiśampāyana uvāca /

tāmuvācātha gāndhārī saha kuntyā yaśasvinīm /
maivaṃ putrīti śokārtā paśya māmapi duḥkhitāṃ //

manye lokavināśo'yaṃ kālaparyāyanoditaḥ /
avaśyabhāvī samprāptaḥ svabhāvādromaharṣaṇaḥ //

idaṃ tatsamanuprāptaṃ vidurasya vaco mahat /
asiddhānunaye kṛṣṇe yaduvāca mahāmatiḥ //

tasminnaparihārye'rthe vyatīte ca viśeṣataḥ /
mā śuco na hi śocyāste saṅgrāme nidhanaṃ gatāḥ //

yathaivāhaṃ tathaiva tvaṃ ko vāmāśvāsayiṣyati /
mamaiva hyaparādhena kulamagryaṃ vināśitam //