Mahabharata · Chapter 11.13

dhṛtarāṣṭrābhyanujñātāstataste kurupuṅgavāḥ /
abhyayurbhrātaraḥ sarve gāndhārīṃ sahakeśavāḥ //

tato jñātvā hatāmitraṃ dharmarājaṃ yudhiṣṭhiram /
gāndhārī putraśokārtā śaptumaicchadaninditā //

tasyāḥ pāpamabhiprāyaṃ viditvā pāṇḍavānprati /
ṛṣirgandhavatīputraḥ prāgeva samabudhyata //

sa gaṅgāyāmupaspṛśya brahmarṣiḥ prayataḥ śuciḥ /
taṃ deśamupasampede pārāśaryo manojavaḥ //

divyena cakṣuṣā jñātvā manasā'nuddhatena ca /
sarvaprāṇabhṛtāṃ bhāvaṃ satataṃ sa tu bṛdhyati //

sa snuṣāmabravītkāle kalyāṇāni mahātapāḥ /
śāpakālamavākṣipya śamakālamudīrayan //

na kopaḥ pāṇḍave kāryo gāndhāri śamamāpnuhi /
rajo nigṛhyatāṃ caiva śṛṇu cedaṃ vaco mama //

puroktā yuddhakāle tvaṃ putreṇa jayamicchatā /
jayamāśāsva me mātaryudhyamānasya śatrubhiḥ //

sā tathā yācyamānā tvaṃ yuddhakāle jayaiṣiṇā /
uktavatyasi kalyāṇi yato dharmastato jayaḥ //

vācā'pyatīte mā krodhe manaḥ kuru yaśasvini /
smarāmi bhāṣamāṇāṃ hi tvāmahaṃ satyavādinīm //

vigrahe tumule rājñāṃ gatvā paramasaṃśayam /
jitaṃ pāṇḍusutairyuddhe nūnaṃ dharmastato'dhikaḥ //

kṣamāśīlā purā bhūtvā sā'dya na kṣamase katham /
adharme jahi dharmajñe yato dharmastato jayaḥ //

sā tvaṃ dharmaṃ parismṛtya vācaṃ coktāṃ manasvinī /
kopaṃ saṃyaccha gāndhāri pāṇḍaveṣu suteṣu te //
gāndhāryuvāca /

bhagavannābhyasūyāmi naitānicchāmi naśyataḥ /
putraśokena tu balānmano vihvalatīva me //

yathaiva kuntyā kaunteyā rakṣitavyāstathā mayā /
tathaiva dhṛtarāṣṭreṇa rakṣitavyā yathā tvayā //

duḥśāsanāparādhena śakuneḥ saubalasya ca /
karṇaduryodhanābhyāṃ ca kṛto'yaṃ kṛrusankṣayaḥ //

nāparādhyati bībhatsurna ca pārtho vṛkodaraḥ /
nakulaḥ sadevaśca naiva rājā yudhiṣṭhiraḥ //

yudhyamānā hi kauravyāḥ kṛtamāmāḥ parasparam /
nihatāḥ sahitāścānyaistatra nāstyapriyaṃ mama //

kiṃ tu karmākarodbhīmo vāsudevasya paśyataḥ /
duryodhanaṃ samāhūya gadāyurddha mahāmanāḥ //

śikṣayā'bhyadhikaṃ jñātvā carantaṃ bahudhā raṇe /
adho nābhyāḥ prahṛtavāṃstanme kopamavardhayat //

kathaṃ nu dharmaṃ dharmajñāḥ samuddiṣṭaṃ mahātmabhiḥ /
tyajeyurāhave śūrāḥ prāṇahetoḥ kathañcanaḥ //