મહાભારત · અધ્યાય 11.13

ધૃતરાષ્ટ્રાભ્યનુજ્ઞાતાસ્તતસ્તે કુરુપુઙ્ગવાઃ ।
અભ્યયુર્ભ્રાતરઃ સર્વે ગાન્ધારીં સહકેશવાઃ ॥

તતો જ્ઞાત્વા હતામિત્રં ધર્મરાજં યુધિષ્ઠિરમ્ ।
ગાન્ધારી પુત્રશોકાર્તા શપ્તુમૈચ્છદનિન્દિતા ॥

તસ્યાઃ પાપમભિપ્રાયં વિદિત્વા પાણ્ડવાન્પ્રતિ ।
ઋષિર્ગન્ધવતીપુત્રઃ પ્રાગેવ સમબુધ્યત ॥

સ ગઙ્ગાયામુપસ્પૃશ્ય બ્રહ્મર્ષિઃ પ્રયતઃ શુચિઃ ।
તં દેશમુપસમ્પેદે પારાશર્યો મનોજવઃ ॥

દિવ્યેન ચક્ષુષા જ્ઞાત્વા મનસાઽનુદ્ધતેન ચ ।
સર્વપ્રાણભૃતાં ભાવં સતતં સ તુ બૃધ્યતિ ॥

સ સ્નુષામબ્રવીત્કાલે કલ્યાણાનિ મહાતપાઃ ।
શાપકાલમવાક્ષિપ્ય શમકાલમુદીરયન્ ॥

ન કોપઃ પાણ્ડવે કાર્યો ગાન્ધારિ શમમાપ્નુહિ ।
રજો નિગૃહ્યતાં ચૈવ શૃણુ ચેદં વચો મમ ॥

પુરોક્તા યુદ્ધકાલે ત્વં પુત્રેણ જયમિચ્છતા ।
જયમાશાસ્વ મે માતર્યુધ્યમાનસ્ય શત્રુભિઃ ॥

સા તથા યાચ્યમાના ત્વં યુદ્ધકાલે જયૈષિણા ।
ઉક્તવત્યસિ કલ્યાણિ યતો ધર્મસ્તતો જયઃ ॥

વાચાઽપ્યતીતે મા ક્રોધે મનઃ કુરુ યશસ્વિનિ ।
સ્મરામિ ભાષમાણાં હિ ત્વામહં સત્યવાદિનીમ્ ॥

વિગ્રહે તુમુલે રાજ્ઞાં ગત્વા પરમસંશયમ્ ।
જિતં પાણ્ડુસુતૈર્યુદ્ધે નૂનં ધર્મસ્તતોઽધિકઃ ॥

ક્ષમાશીલા પુરા ભૂત્વા સાઽદ્ય ન ક્ષમસે કથમ્ ।
અધર્મે જહિ ધર્મજ્ઞે યતો ધર્મસ્તતો જયઃ ॥

સા ત્વં ધર્મં પરિસ્મૃત્ય વાચં ચોક્તાં મનસ્વિની ।
કોપં સંયચ્છ ગાન્ધારિ પાણ્ડવેષુ સુતેષુ તે ॥
ગાન્ધાર્યુવાચ ।

ભગવન્નાભ્યસૂયામિ નૈતાનિચ્છામિ નશ્યતઃ ।
પુત્રશોકેન તુ બલાન્મનો વિહ્વલતીવ મે ॥

યથૈવ કુન્ત્યા કૌન્તેયા રક્ષિતવ્યાસ્તથા મયા ।
તથૈવ ધૃતરાષ્ટ્રેણ રક્ષિતવ્યા યથા ત્વયા ॥

દુઃશાસનાપરાધેન શકુનેઃ સૌબલસ્ય ચ ।
કર્ણદુર્યોધનાભ્યાં ચ કૃતોઽયં કૃરુસન્ક્ષયઃ ॥

નાપરાધ્યતિ બીભત્સુર્ન ચ પાર્થો વૃકોદરઃ ।
નકુલઃ સદેવશ્ચ નૈવ રાજા યુધિષ્ઠિરઃ ॥

યુધ્યમાના હિ કૌરવ્યાઃ કૃતમામાઃ પરસ્પરમ્ ।
નિહતાઃ સહિતાશ્ચાન્યૈસ્તત્ર નાસ્ત્યપ્રિયં મમ ॥

કિં તુ કર્માકરોદ્ભીમો વાસુદેવસ્ય પશ્યતઃ ।
દુર્યોધનં સમાહૂય ગદાયુર્દ્ધ મહામનાઃ ॥

શિક્ષયાઽભ્યધિકં જ્ઞાત્વા ચરન્તં બહુધા રણે ।
અધો નાભ્યાઃ પ્રહૃતવાંસ્તન્મે કોપમવર્ધયત્ ॥

કથં નુ ધર્મં ધર્મજ્ઞાઃ સમુદ્દિષ્ટં મહાત્મભિઃ ।
ત્યજેયુરાહવે શૂરાઃ પ્રાણહેતોઃ કથઞ્ચનઃ ॥