Mahabharata · Chapter 10.6

dvāradeśe tato drauṇimavasthitamavekṣya tau /
akurvatāṃ bhojakṛpau kiṃ sañjaya vadasva me //
s̤añjaya uvāca /

kṛtavarmāṇamāmantrya kṛpaṃ ca sa mahārathaḥ /
drauṇirmanyuparītātmā śibiradvāramāsadat //

tatra bhūtaṃ mahākāyaṃ candrārkasadṛśadyutim /
so'paśyaddvāramāvṛtya tiṣṭhantaṃ romaharṣaṇam //

vasānaṃ carma vaiyāghraṃ vasārudhiravisravam /
kṛṣṇājinottarāsaṅgaṃ nāgayajñopavītinam //

bāhubhiḥ svāyatairbhīmairnānāpraharaṇodyataiḥ /
baddhāṅgadamahāsarpaṃ jvālāmālākulānanam //

daṃṣṭrākarālavadanaṃ vyāditāsyaṃ bhayānakam /
nayanānāṃ sahasraiśca vicitrairabhibhūṣitam //

naiva tasya vapuḥ śakyaṃ pravaktuṃ veṣa eva ca /
sarvathā tu tadālakṣya sphuṭeyurapi parvatāḥ //

tasyāsyanāsikābhyāṃ ca śravaṇābhyāṃ ca sarvaśaḥ /
tebhyaścākṣisahasrebhyaḥ prādurāsanmahārciṣaḥ //

tathā tejomarīcibhyaḥ śaṅkhacakragadādharāḥ /
prādurāsanhṛṣīkeśāḥ śataśo'tha sahasraśaḥ //

tadatyadbhutamālokya bhūtaṃ lokabhayaṅkaram /
drauṇiravyathito divyairastravarṣairavākirat //

drauṇimuktāñcharāṃstāṃstu tadbhūtaṃ mahadagrasat /
udadheriva vāryoghānpāvako baḍabāmukhaḥ //

aśvatthāmā tu samprekṣya śaraughāṃstānnirarthakān /
rathaśaktiṃ mumocāsmai dīptāmagniśikhāmiva //

sā tamāhatya dīptāgrā rathaśaktiradīryata /
yugānte sūryamāhatya maholkeva divaścyutā //

atha hematsaruṃ divyaṃ khaṅgamākāśavarcasam //
kośātsamudbabarhāśu bilāddīptamivoragam //

tataḥ khaṅgavaraṃ dhīmānbhūtāya prāhiṇottadā /
sa tadāsādya bhūtaṃ vai vilayaṃ tūlavadyayau //

tataḥ sa kupito drauṇirindraketunibhāṃ gadām /
jvalantīṃ prāhiṇottasmai bhūtaṃ tāmapi cāgrasat //

tataḥ sarvāyudhābhāve vīkṣamāṇastatastataḥ /
apaśyatkṛtamākāśamanākāśaṃ janārdanaiḥ //

tadadbhutatamaṃ dṛṣṭvā droṇaputro nirāyudhaḥ /
acintayatsusantrastaḥ kṛpabhojavacaḥ smaran //

bruvatāmapriyaṃ pathyaṃ suhṛdāṃ na śṛmoti yaḥ /
sa śocatyāpadaṃ prāpya thā'hamavamatya tau //

śāstradṛṣṭānavidvānyaḥ samatītya jighāṃsati /
sa pathaḥ pracyuto dharmyātkupathe pratihanyate //

gobrāhmaṇanṛpastrīṣu sakhyurmāturgurostathā /
vṛddhabālajaḍāndheṣu suptabhītotthiteṣu ca //

mattonmattapramatteṣu na śastrāṇi ca mātayet /
ityevaṃ gurubhiḥ pūrvamupadiṣṭaṃ nṛṇāṃ sadā //

so'hamutkramya panthānaṃ śāstradṛṣṭaṃ sanātanam /
amārgeṇaivamārabhya ghorāmāpadamāgataḥ //

tāṃ cāpadaṃ ghoratarāṃ pravadanti manīṣiṇaḥ /
yadudyamya mahatkṛtyaṃ bhayādapi nivartate //

aśakyaṃ caiva kaḥ kartuṃ śaktaḥ śaktibalādiha /
na hi daivādgarīyo vai mānuṣyaṃ kiñcidiṣyate //

mānuṣyaṃ kurvataḥ karma yadi daivānna sidhyati /
sa pathaḥ pracyuto dharmyādvipadaṃ pratipadyate //

pratijñānaṃ hyavijñānaṃ pravadanti manīṣiṇaḥ /
yadārabhya kriyāṃ kāñcidbhayādiha nivartate //

tadidaṃ duṣpraṇītena bhayaṃ mā samupasthitam /
na hi droṇasutaḥ saṅkhye nivarteta kathañcana //

idaṃ ca sumahadbhūtaṃ daivadaṇḍamivodyatam /
na caitadabhijānāmi cintayannapi sarvathā //

dhruvaṃ yeyamadharmeṇa prahitā kaluṣā matiḥ /
tasyāḥ phalamidaṃ ghoraṃ pratighātāya kalpate //

tadidaṃ daivavihitaṃ mama saṅkhye nivartanam /
nānyatra daivādudyantumiha śakyaṃ kathañcana //

so'hamadya mahādevaṃ prapadye śaraṇaṃ vibhum /
daivadaṇḍamimaṃ ghoraṃ sa hi me nāśayiṣyati //

kapardinaṃ prapadye'haṃ devadevamumāpatim /
kapālamālinaṃ rudraṃ bhaganetraharaṃ haram //

sa hi devo'tyagāddevāṃstapasā vikrameṇa ca /
tasmāccharaṇamabhyeṣye giriśaṃ śūlapāṇinam //