Mahabharata · Chapter 10.7

evaṃ sañcintayitvā tu droṇaputro viśāmpate /
avatīrya rathopasthāddadhyau sa prayataḥ sthitaḥ //
drauṇiruvāca /

ugraṃ sthāṇuṃ śivaṃ rudraṃ śarvamīśānamīśvaram /
giriśaṃ varadaṃ devaṃ bhavabhāvanamavyayam //

śitikaṇṭhamajaṃ rudraṃ dakṣakratuharaṃ haram /
viśvarūpaṃ virūpākṣaṃ bahurūpamumāpatim //

śmaśānavāsinaṃ dṛptaṃ mahāgaṇapatiṃ vibhum /
khaṭvāṅgadhāriṇaṃ muṇḍaṃ jaṭilaṃ brahmacāriṇam //

manasā hyanucintyainaṃ duṣkareṇālpacetasā /
adya bhūtopahāreṇa yakṣye tripurāghātinam //

xxtutaṃ stutyaṃ stūyamānamamoghaṃ kṛttivāsasam /
vilohitaṃ nīlakaṇṭhamasahyaṃ durnivāraṇam //

śukraṃ viśvasṛjaṃ brahma brahmacāriṇameva ca /
vratavantaṃ taponiṣṭhamanantaṃ tapatāṃ gatim //

bahurūpaṃ gaṇādhyakṣaṃ tryakṣaṃ pāriṣadapriyam /
dhanādhyakṣapriyasakhaṃ gaurīhṛdayavallabham //

kumārapitaraṃ piṅgaṃ govṛṣottamavāhanam /
kuttivāsasamatyugramātoṣaṇatatparam //

paraṃ parebhyaḥ paramaṃ paraṃ yasmānna vidyate /
iṣvastrottamabhartāraṃ digantaṃ deśarakṣiṇam //

hiraṇyakavacaṃ devaṃ candramaulivibhūṣaṇam /
prapadye śaraṇaṃ devaṃ parameṇa samādhinā //

imāṃ cedāpadaṃ ghorāṃ tarāmyadya sudustarām /
sarvabhūtopahāreṇa yakṣye'haṃ śucinā śucim //

iti tasya vyavasitaṃ jñātvā yogātsukarmaṇaḥ /
purastātkāñcanī vedī prādurāsīnmahātmanaḥ //

tasyāṃ vedyāṃ tadā rājaṃścitrabhānurajāyata /
sa diśo vidiśaḥ khaṃ ca jvālābhiriva pūrayan //

dīptāsyanayanāścātra naikapādaśirodharāḥ / [ratnacitrāṅgadadharāḥ samudyatakarāstathāḥ // ]

dvipāḥ śailapratīkāśāḥ prādurāsanmahāgaṇāḥ /
śvavarāhoṣṭrarūpāśca hayagomāyugomukhāḥ //

ṛkṣamārjāravadanā vyāghradvīpimukhāstathā /
kākavaktrāḥ pluvamukhāḥ śukavaktrāstathaiva ca //

mahājagaravaktrāśca haṃsavaktrāḥ śitaprabhāḥ /
dārvāghāṭamukhāścāpi cāṣavaktrāśca bhārata //

kūrmanakramukhāścaiva śiṃśumāramukhāstathā /
mahāmakaravaktrāśca timivaktrāstathaiva ca //

harivaktrāḥ krauñcamukhāḥ kapotābhamukhāstathā /
pārāvatamukhāścaiva madguvaktrāstathaiva ca //

pāṇikarṇāḥ sahasrākṣāstathaiva ca mahodarāḥ /
nirmāṃsāḥ kākavaktrāśca śyenavaktrāśca bhārata //

tathaivāśiraso rājannṛkṣavaktrāśca bhīṣaṇāḥ /
pradīptanetrajihvāśca jvālāvarṇāstathaiva ca //

jvālākeśāśca rājendra jvaladromacaturbhujāḥ /
meṣavaktrāstathaivānye tathā chāgamukhā nṛpa //

śaṅkhābhāḥ śaṅkhavaktrāśca śaṅkhavarṇāstathaiva ca /
śaṅkhamālāparikarāḥ śahkhadhvanisamasvanāḥ //

jaṭādharāḥ pa़ñcaśikhāstathā muṇḍāḥ kṛśodarāḥ /
caturdaṃṣṭrāścaturjihvāḥ śaṅkukarṇāḥ kirīṭinaḥ //

mauñjīdharāśca rājendra tathā kuñcitamūrdhajāḥ /
uṣṇīṣiṇaḥ kuṇḍalinaścāruvaktrāḥ svalaṅkṛtāḥ //

padmotpalāpīḍadharāstathā mukuṭadhāriṇaḥ /
mahātmyena ca saṃyuktāḥ śataśo'tha sahasraśaḥ //

śataghnīcakrahastāśca tathā musalapāṇayaḥ /
bhuśuṇḍīpāśahastāśca daṇ़ḍahastāśca bhārata //

pṛṣṭheṣu baddheṣudhayaścitrabāṇotkaṭāstathā /
sadhvajāḥ sapatākāśca saghaṇṭāḥ saparaśvathāḥ //

mahāpāśodyatakarāstathā laguḍapāṇayaḥ /
sthūṇāhastāḥ khaṅgahastāḥ sarpocchritakirīṭinaḥ //

mahāsarpāṅgadadharāścitrābharaṇadhāriṇaḥ / rajodhvajāḥ paṅkadigdhāḥ sarve citrāmbarasrajaḥ /
nīlāṅgāḥ piṅgalāṅgāśca muṇḍavaktāstathaiva ca //

bherīśaṅkhamṛdaṅgāṃśca jharjharānakagomukhān /
avādayanpāriṣadāḥ prahṛṣṭāḥ kanakaprabhāḥ //

gāyamānāstathaivānye saṃhṛṣṭāḥ puruṣarṣabhāḥ /
laṅghayantaḥ pluvantaśca valgantaśca mahārathāḥ //

dhāvanto javanāścaṇḍāḥ pāvakodvūtamūrdhajāḥ /
mattā iva mahānāgā vinadanto muhurmuhuḥ //

subhīmā ghorarūpāśca śūlapaṭṭasapāṇayaḥ /
nānāvirāgavasanāścitramālyānulepanāḥ //

ratnacitrāṅgadadharāḥ samudyatakarāstathā /
hantāro dviṣatāṃ śūrāḥ prasahyāsahyavikramāḥ //

pātāro'sṛgvasājyānāṃ māṃsāntrakṛtabhojanāḥ /
cūḍālāḥ karṇikārāśca prahṛṣṭāḥ piṭharodarāḥ //

atihasvātidīrghāśca pralambāścātibhairavāḥ /
vikaṭāḥ kālalamboṣṭhā bṛhacchephāṇḍapiṇḍikāḥ //

mahārhanānāvikaṭā muṇḍāśca jaṭilāḥ pare /
sārkendugrahanakṣatrāṃ dyāṃ kuryuste mahītale //

utsaheraṃśca ye hantuṃ bhūtagrāmaṃ caturvidham /
ye ca vītabhayā nityaṃ harasya bhrukuṭīsahāḥ //

kāmakārakarā nityaṃ trailokyasyeśvareśvarāḥ /
nityānandapramuditā vāgīśā vītamatsarāḥ //

prāpyāṣṭaguṇamaiśvaryaṃ ye na yāsyanti vai smayam /
yeṣāṃ vismayate nityaṃ bhagavānkarmabhirharaḥ //

manovākkarmabhiryuktairnityamārādhitaśca yaiḥ /
manovākkarmabhirbhaktānpāti putrānivaurasān //

pibanto'sṛgvasāścānye kruddhā brahmadviṣāṃ sadā /
caturvidhātmakaṃ somaṃ ye pibanti ca sarvadā //

śrutena brahmacaryeṇa tapasā ca damena ca /
ye samārādhya śūlāṅkaṃ bhavasāyujyamāgatāḥ //

yairātmabhūtairbhagavānpārvatyā ca maheśvaraḥ /
mahābhūtagaṇairbhuṅkte bhūtabhavyabhavatprabhuḥ //

nānāvāditrahasitakṣveḍitotkṛṣṭagarjitaiḥ /
santrāsayantaste viśvamaśvatthāmānamabhyayuḥ //

saṃstuvanto mahādevaṃ bhāḥ kurvāṇāḥ suvarcasaḥ /
vivardhayiṣavo drauṇermahimānaṃ mahātmanaḥ //

jijñāsamānāstattejaḥ sauptikaṃ ca didṛkṣavaḥ / bhīmograparighālātaśūlapaṭṭasapāṇayaḥ /
ghorarūpāḥ samājagmurbhūtasaṅghāḥ sahasraśaḥ //

janayeyurbhayaṃ ye sma trailokyasyāpi darśanāt /
na ca tānprekṣamāṇo'pi vyathāmupajagāma ha //

atha drauṇirdhanuṣpāṇirbaddhagodhāṅgulitravān /
svayamevātmanātmānamupahāramupāharat //

dhanūṃṣi samidhastatra pavitrāṇi sitāḥ śarāḥ /
havirātmavataścātmā tasminbhārata karmaṇi //

tataḥ saumyena mantreṇa droṇaputraḥ pratāpavān /
upahāraṃ mahāmanyurathātmānamupāharat //

taṃ rudraṃ raudrakarmāṇaṃ raudraiḥ karmabhiracyutam /
abhiṣṭutya mahātmānamityuvāca kṛtāñjaliḥ //
drauṇiruvāca /

imamātmānamadyāhaṃ jātamāṅgirase kule /
svagnau juhomi bhagavanpratigṛhṇīṣva māṃ balim //

bhavadbhaktyā mahādeva pasmeṇa samādhinā /
asyāmāpadi viśvātmannupākurmī tavāgrataḥ //

tvayi sarvāṇi bhūtāni sarvabhūteṣu cāsi vai /
guṇānāṃ hi pradhānānāṃ kaivalyaṃ tvayi tiṣṭhati //

sarvabhūtāśraya vibho havirbhūtamavasthitam /
pratigṛhāṇa māṃ deva yadyaśakyāḥ pare mayā //

ityuktvā drauṇirāsthāya tāṃ devīṃ dīptapāvakām /
santyajyātmānamāruhya kṛṣṇavartmanyupāviśat //

tamūrdhvabāhuṃ niśceṣṭaṃ dṛṣṭvā havirupasthitam /
abravīdbhagavānsākṣānmahādevo hasanniva //

satyaśaucārjavatyāgaistapasā niyamena ca /
kṣāntyā bhaktyā ca dhṛtyā ca karmaṇā manasā girā //

yathāvadahamārādvaḥ kṛṣṇenākliṣṭakarmaṇā /
tasmādiṣṭatamaḥ kṛṣṇādanyo mama na vidyate //

kurvatā tāta sammānaṃ tvāṃ ca jijñāsatā mayā /
pāñcālāḥ sarvadā guptā māyāśca bahuśaḥ kṛtāḥ //

kṛtastasyaiva sammānaṃ pāñcālānrakṣatā mayā /
abhibhūtāstu kālena naiṣāmadyāsti jīvitam //

evamuktvā mahātmānaṃ bhagavānātmanastanum /
āviveśa dadau cāsmai vimalaṃ khaṅgamuttamam //

athāviṣṭo bhagavatā bhūyo jajvāla tejasā /
vegavāṃścābhavadyuddhe devasṛṣṭena tejasā //

taṃ dṛṣṭvā tāni bhūtāni rakṣāṃsi ca samādravan / abhitaḥ śibiraṃ yāntaṃ droṇaputraṃ mahāratham /
devadevaṃ haraṃ sthāuṃ yāntaṃ sākṣādiveśvaram //