Mahabharata · Chapter 10.4

diṣṭyā te pratikartavye matirjāteyamacyuta /
na tvāṃ vārayituṃ śakto vajrapāṇirapi svayam //

anuyāsyāvahe tvāṃ tu prabhāte sahitāvubhau /
adya rātrau viśramasva vimuktakavacadhvajaḥ //

ahaṃ tvāmanuyāsyāmi kṛtavarmā ca sātvataḥ /
parānabhimukhaṃ yāntaṃ rathāvāsthāya daṃśitau //

āvābhyāṃ sahitaḥ śatrūñśvo nihantā samāgame /
vikramya rathināṃ śreṣṭha pāñcālānsapadānugān //

śaktastvamasi vikramya viśramasva niśāmimām /
ciraṃ te jāgratastāta svapa tāvanniśāmimām //

viśrāntaśca vinidraśca svasthacittaśca mānada /
sametya samare śatrūnvadhiṣyasi na saṃśayaḥ //

na hi tvāṃ rathināṃ śreṣṭhaṃ pragṛhītavarāyudham /
jetumutsahate kaścidapi deveṣu pāvakiḥ //

kṛpeṇa sahitaṃ yāntaṃ guptaṃ ca kṛtavarmaṇā /
ko drauṇiṃ yudhi saṃrabdhaṃ yodhayedapi devarāṭ //

te vayaṃ niśi viśrāntā vinidrā vigatajvarāḥ /
prabhātāyāṃ rajanyāṃ vai nihaniṣyāma śātravān //

tava hyastrāṇi divyāni mama caiva na saṃśayaḥ /
sātvatopi maheṣvāso nityaṃ yuddheṣu kovidaḥ //

te vayaṃ sahitāstāta sarvāñśatrūnsamāgatān /
prasahya samare hatvā prītiṃ prāpsyāma puṣkalām //

viśramasva tvamavyagraḥ svapa cemāṃ niśāṃ sukham /
ahaṃ ca kṛtavarmā ca prabhāte tvāṃ narottamam //

anuyāsyāva sahitau dhanvinau paratāpanau /
rathinaṃ tvarayā yāntaṃ rathamāsthāya daṃśitau //

sa gatvā śibiraṃ teṣāṃ nāma viśrāvya cāhave /
tataḥ kartā'si śatrūṇāṃ yudhyatāṃ kadanaṃ mahat //

kṛtvā ca kadanaṃ teṣāṃ prabhāte vimale'hani /
viharasva yathā śakraḥ sūdayitvā mahāsurān //

tvaṃ hi śakto raṇe jetuṃ pāñcālānāṃ varūthinīm /
daityasenāmiva kruddhaḥ sarvadānavasūdanaḥ //

mayā tvāṃ sahitaṃ saṅkhye guptaṃ ca kṛtavarmaṇā /
na saheta vibhuḥ sākṣādvajrapāṇirapi svayam //

na cāhaṃ samare tāta kṛtavarmā na caiva hi /
anirjitya raṇe pāṇḍūnapayāsyāmi karhicit //

hatvā ca samare kṣudrānpāñcālānpāṇḍubhiḥ saha /
nivartiṣyāmahe sarve hatā vā svargagā vayam //

sarvopāyaiḥ sahāyāste prabhāte vayamāhave /
satyametanmahābāho prabravīmi tavānagha //

evamuktastato drauṇikramātulena hitaṃ vacaḥ /
abravīnmātulaṃ rājankrodhādudvṛtya locane //

āturasya kuto nidrā narasyāmarṣitasya ca /
arthāṃścintayataścāpi kāmayānasya vā punaḥ //

tadidaṃ samanuprāptaṃ paśya me'dya catuṣṭayam /
yasya bhāgaścaturtho me svapnamahnāya nāśayet //

kiṃ nāma duḥkhaṃ loke'sminpiturvadhamanusmaran /
hṛdayaṃ nirdahanme'dya rātryahāni na śāmyati //

yathā ca nihataḥ pāpaiḥ pitā mama viśeṣataḥ /
pratyakṣamapi te sarvaṃ tanme marmāṇi kṛntati //

kathaṃ hi mādṛśo loke muhūrtamapi jīvati /
droṇahanteti yadvācaḥ pāñcālānāṃ śṛṇomyaham //

dhṛṣṭadyumnamahatvā tu nādaṃ jīvitumutsahe /
sa me piturvadhādvadhyaḥ pāñcālā ye ca saṅgatāḥ //

vilāpo bhagnasakthasya yastu rājño mayā śrutaḥ /
sa punarhṛdayaṃ kasya krūrasyāpi na nirdahet //

kasya hyakaruṇasyāpi netrābhyāmaśru nāvrajet /
nṛpaterbhagnasakthasya śrutvā tādṛgvacaḥ punaḥ //

yaścāyaṃ mitrapakṣo me mayi jīvati nirjitaḥ /
śokaṃ me vardhayatyeṣa vārivega ivārṇavam //

ekāgnamanaso me'dya kuto nidrā kutaḥ sukham //

vāsudevārjunābhyāṃ ca tānahaṃ parirakṣitān /
aviṣahyatamānmanye mahendreṇāpi sattama //

na cāpi śaktaḥ saṃyantumasmātkāryātkathañcana /
taṃ na paśyāmi loke'sminyo māṃ kopānnivartayet //

iti me niścitā buddhireṣā sādhumatā mama //

vādikaiḥ kathyamānastu mitrāṇāṃ me parābhavaḥ /
pāṇḍavānāṃ ca vijayaṭo hṛdayaṃ dahatīva me //

ahaṃ tu kadanaṃ kṛtvā śatrūṇāmadya sauptike /
tato viśramitā caiva svaptā ca vigatajvaraḥ //