Mahabharata · Chapter 10.2

śrutaṃ te vacanaṃ sarvaṃ hetuyuktaṃ mayā vibho /
mamāpi tu vacaḥ kiñcicchṛṇuṣvādya mahābhuja //

ābaddhā mānuṣāḥ sarve nibaddhāḥ karmaṇordvayoḥ /
daive puruṣakāre ca paraṃ tābhyāṃ na vidyate //

na hi daivena sidhyanti kāryāṇyekena sattama /
na cāpi karmaṇaikena dvābhyāṃ siddhistu yogataḥ //

tābhyāmubhābhyāṃ sarvārthā nibaddhā adhamottamāḥ /
pravṛttāścaiva dṛśyante nivṛttāścaiva sarvaśaḥ //

parjanyaḥ parvate varṣankinnu sādhayate phalam /
kṛṣṭe kṣetre tathā varṣankiṃ na sādhayate phalam //

utthānaṃ cāpi daivasya hyanutthānaṃ ca daivatam /
vyarthaṃ bhavati sarvatra pūrvastatra viniścayaḥ //

suvṛṣṭe ca yathā deve samyak kṣetre ca karṣite /
bījaṃ mahāguṇaṃ bhūyāttathā siddhirhi mānuṣī //

tayordaivaṃ tu duścintyaṃ svavaśenaiva vartate /
prājñāḥ puruṣakāre tu vartante devamāsthitāḥ //

tābhyāṃ sarve hi kāryārthā manuṣyāṇāṃ nararṣabha /
viceṣṭantaḥ sma dṛśyante nivṛttāstu tathaiva ca //

kṛtaḥ puruṣakāraśca so'pi daivena sidhyati /
tathāsya karmaṇaḥ karturabhinirvartate phalam //

utthānaṃ ca manuṣyāṇāṃ dakṣāṇāṃ daivavarjitam /
abhalaṃ dṛśyate loke samyagapyupapāditam //

tatrālasā manuṣyāṇāṃ ye bhavantyamanasvinaḥ /
utthānaṃ te vigarhanti prājñānāṃ tanna rocate //

prāyaśo hi kṛtaṃ karma nāphalaṃ dṛśyate bhuvi /
akṛtvā ca punarduḥkhaṃ karma paśyenmahāphalam //

caṣṭāmakurvaṃllabhate yadi kiñcidyadṛcchayā /
yo vā na labhate kṛtvā durdarśau tāvubhāvapi //

śaknoti jīvituṃ dakṣo nālasaḥ sukhamedhate /
dṛśyante jīvaloke'smindakṣāḥ prāyo hitaiṣiṇaḥ //

yadi dakṣaḥ samārambhātkarmaṇo nāśnute phalam /
nāsya vācyaṃ bhavetkiñcillabdhavyaṃ vā'dhigacchati //

nākṛtvā karma loke hi phalaṃ vindati karhicit /
sa tu vaktavyatāṃ yāti dveṣyo bhavati bhūyaśaḥ //

evametadanādṛtya vartate yastvato'nyathā /
sa karotyātmano'narthāneṣa buddhimatāṃ nayaḥ //

hīnaṃ puruṣakāreṇa yadi daivena vā punaḥ /
kāraṇābhyāmathaitābhyāmutthānamaphalaṃ bhavet //

hīnaṃ puruṣakāreṇa karma tviha na sidhyati //

daivatebhyo namaskṛtya yastvarthānsamyagīhate /
dakṣo dākṣiṇyasampanno na sa moghairvihanyate //

samyagīhā punariyaṃ yā bṛddhānupasevate /
āpṛcchati ca yacchreyaḥ karoti ca hitaṃ vacaḥ //

utthāyotthāya hi sadā praṣṭavyā vṛddhasammatāḥ /
te sma yoge paraṃ mūlaṃ tanmūlā siddhirucyate //

vṛddhānāṃ vacanaṃ śrutvā yo'bhyutthānaṃ prayojayet /
utthānasya phalaṃ samyaktadā sa labhate'cirāt //

rāgātkrodhādbhayāllobhādyo'rthānīheta mānavaḥ /
anīśaścāvamānī ca sa śīghraṃ bhraśyate śriyaḥ //

soyaṃ duryodhanenārtho lubdhenādīrghadarśinā /
asamarthaḥ samārabdho mūḍhatvādavicinantitaḥ //

hitabuddhīnanādṛtya sammantryāsādhubhiḥ saha /
vāryamāṇo'karodvairaṃ pāṇḍavairguṇavattaraiḥ //

pūrvamapyatiduḥśīlo na dhairyaṃ kartumarhati /
tapatyarthe vipanne hi mitrāṇāṃ na kṛtaṃ vacaḥ //

anuvartāmahe yattu taṃ vayaṃ pāpapūruṣam /
asmānapyanayastasmātprāpto'yaṃ dāruṇo mahān //

aena tu mamādyāpi vyasanenopatāpitā /
buddhiścintayate kiñcitsvaṃ śreyo nāvabudhyate //

muhyatā tu manuṣyeṇa praṣṭavyāḥ suhṛdo janāḥ /
tatrāsya buddhirvinayastatra śreyaśca paśyati //

tato'sya mūlaṃ kāryāṇāṃ buddhyā niścitya vai budhāḥ /
te'tra pṛṣṭā yathā brūyustatkartavyaṃ tathā bhavet //

te vayaṃ dhṛtarāṣṭraṃ ca gāndhārīṃ ca yaśasvinīm /
upapṛcchāmahe gatvā viduraṃ ca mahāmatim //

te pṛṣṭāstu vadeyuryacchreyo naḥ samanantaram /
tadasmābhiḥ punaḥ kāryamiti me naiṣṭhikī matiḥ //

anārambhāttu kāryāṇāṃ nārthaḥ sampadyate kvacit //

kṛte puruṣakāre tu yeṣāṃ kāryaṃ na sidhyati /
daivenopahatāste tu nātra kāryā vicāraṇā //