Mahabharata · Chapter 10.18

tato devayuge'tīte devā vai samakalpayan /
yajñavedapramāṇena vidhivadyaṣṭumīpsavaḥ //

kalpayāmāsuratha te sādhanāni havīṃṣi ca /
bhāgārhā devatāścaiva yajñiyaṃ dravyameva ca //

tā vai rudramajānantyo yāthātathyena devatāḥ /
nākalpayanta devasya sthāṇorbhāgaṃ narādhipa //

so'kalpyamāne bhāge tu kṛttivāsā makhe'maraiḥ /
tapasā yajñamanvicchandhanurādau sasarja ha //

lokayajñaḥ kriyāyajño gṛhayajñaḥ sanātanaḥ /
pañcabhūtanṛyajñaśca jajñe sarvamidaṃ jagat //

lokayajñairnṛyajñaiśca kapardī vidadhe dhanuḥ /
dhanuḥ sṛṣṭamabhūttasya ṣaṣṭikiṣkupramāṇataḥ //

vaṣaṭ्kāro'bhavajjyā tu dhanuṣastasya bhārata /
yajñāṅgāni ca catvāri tasya sannahane'bhavan //

tataḥ kruddho mahādevasdupādāya kārmukam /
ājagāmātha tatraiva yatra devāḥ samījire //

tamātkārmukaṃ dṛṣṭvā brahmacāriṇamavyayam /
vivyathe pṛthivī devī parvatāśca cakampire //

na vavau pavanaścaiva nāgnirjajvāla vaidhitaḥ /
vyabhramaccāpi saṃvignaṃ divi nakṣatramaṇḍalam //

na babhau bhāskaraścāpi somaḥ śrīmuktamaṇḍalaḥ /
timireṇākulaṃ sarvamākāśaṃ cābhavṛdvṛtam //

abhibhūtāstato devā viṣayānna prajajñire /
na pratyabhācca yajñaḥ sa devatāstresire tathā //

tataḥ sa yajñaṃ vivyādha raudreṇa hṛdi patriṇā /
apakrānstato yajño mṛgo bhūtvā sapāvakaḥ //

sa tu tenaiva rūpeṇa divistho vai vyarājata /
anvīyamāno rudreṇa yudhiṣṭhira nabhastale //

apakrānte tato yajñe sañjñā na pratyabhātsurān /
naṣṭasañjñeṣu deveṣu na prājñāyata kiñcana //

tryambakaḥ saviturbāhū bhagasya nayane tathā /
pūṣṇaśca daśanānkruddho dhanuṣkoṭyā vyaśātayat //

prādravan tato devā yajñāṅgāni ca sarvaśaḥ /
kecittatraiva ghūrṇanto gatāsava ivābhavan //

sa tu vidrāvya tatsarvaṃ śitikamṭho'vahasya ca /
avaṣṭabhya dhanuṣkoṭiṃ rurodha vibudhāṃstataḥ //

tato vāgamarairuktā jyāṃ tasya dhanuṣo'cchinat् /
atha tatsahasā rājaṃśchinnajyaṃ visphuraddhanuḥ //

tato vidhanuṣaṃ devā devaśreṣṭhamupāgaman /
śaraṇaṃ saha yajñena prasādaṃ cākarotprabhuḥ //

tataḥ prasanno bhagavānprāsyatkopaṃ jalāśaye /
sa jalaṃ pāvako bhūtvā śoṣayatyaniśaṃ prabho //

bhagasya nayane caiva bāhū ca savitustathā /
prādātpūṣṇaśca daśanānpunaryajñāṃśca pāṇḍava //

tataḥ susthamidaṃ sarvaṃ babhūva punareva hi /
sarvāṇi ca havīṃṣyasya devā bhāgamakalpayan //

tasminkruddhe'bhavatsarvamasusthaṃ bhuvanaṃ prabho /
prasanne ca punaḥ susthaṃ jagadbhavati bhārata //

tataste nihatāḥ sarve tava putrā mahārathāḥ /
anye ca bahavaḥ śūrāḥ pāñcālasya padānugāḥ //

na tanmanasi karvyaṃ na ca taddrauṇinā kṛtam /
mahādevaprasādaḥ sa kurukāryamanantaram //

asyānanraṃ strīparva bhaviṣyati tasyāyamādyaḥ ślokaḥ /
janamejaya uvāca /
hate duryodhane caiva hate sainye ca sarvaśaḥ / dhṛtarāṣṭro mahārāja śrutvā kimakaronmune //