Mahabharata · Chapter 10.17

hateṣu sarvasainyeṣu sauptikai tai rathaistribhiḥ /
śocanyudhiṣṭhiro rājā dāśārhamidamabravīt //

kathaṃ nu kṛṣṇa pāpena kṣudreṇa śaṭhabuddhinā /
drauṇinā nihatāḥ sarve mama putrā mahārathāḥ //

tathā kṛtās्ravikrāntāḥ saṅgrāmeṣvapalāyinaḥ /
drupadasyātmajāścaiva droṇaputreṇa pātitāḥ //

yasya droṇo maheṣvāso na prādādāhave mukham /
nijaghne rathināṃ śreṣṭhaṃ dhṛṣṭadyumnaṃ kathaṃ nu saḥ //

kinnu tena kṛtaṃ karma tathāyuktaṃ nararṣabha /
yadekaḥ samare sarvānavadhīnno guroḥ sutaḥ //
śrībhagavānuvāca /

nūnaṃ sa devadevānāmīśvareśvaramavyayam /
jagāma śaraṇaṃ drauṇirekastenāvadhīdbahūn //

prasanno hi mahādevo dadyādamaratāmapi /
vīryaṃ ca giriśo dadyādyenendramapi śātayet //

vedāhaṃ hi mahādevaṃ tattvena bharatarṣabha /
yāni cāsyapurāṇāni karmāṇi vividhāni ca //

ādireṣa hi bhūtānāṃ madhyamantaśca bhārata /
viceṣṭate jagaccedaṃ sarvamasyaiva karmaṇā //

evaṃ sisṛkṣurbhūtāni dadarśa prathamaṃ vibhuḥ /
pitāmaho'bravīccainaṃ bhūtāni sṛja māciram //

harikeśastathetyuk्vā dīrghadarśī tadā prabhuḥ /
dīrghakālaṃ tapastepe magno'mbhasi mahātapāḥ //

sumahāntaṃ tataḥ kālaṃ pratīkṣyainaṃ pitāmahaḥ /
sraṣṭāraṃ sarvabhūtānāṃ sasarja manasā'param //

so'bravīdvātaraṃ dṛṣṭvā giriśaṃ suptamambhasi /
yadi me nāgrajo'styanyastataḥ srakṣyāmyahaṃ prajāḥ //

tamabravītpitā nāsti tvadanyaḥ puruṣo'grajaḥ /
sthāṇureṣa jale magno visrabdhaḥ kuru vai prajāḥ //

bhūtānyanvasṛjatsapta dakṣaḥ kṣipraṃ prajāpatiḥ /
yairimaṃ vyakarotsarvaṃ bhūtagrāmaṃ caturvidham //

tāḥ sṛṣṭamātrāḥ kṣudhitāḥ prajāḥ sarvāḥ prajāpatim /
bibhakṣayivo rājansahasā prādravaṃstadā //

sa bhakṣyamāṇastrāṇārthī pitāmahamupādravat /
ābhyo māṃ bhagavāṃstrātu vṛttirāsāṃ vidhīyatām //

tatastābhyo dadāvannamoṣadhīḥ sthāvarāṇi ca /
jaṅgamāni ca bhūtāni durbalāni balīyasām //

vihitānnāḥ prajāstāstu jagmustuṣṭā yathāgatam /
tato vavṛdhire rājanprītimatyaḥ svayoniṣu //

bhūtagrāme vivṛdve tu sṛṣṭe devāsure tadā /
udatiṣṭhajjalājjyeṣṭhaḥ prajāścemā dadarśa saḥ //

bahurūpāḥ prajāḥ sṛṣṭā vivṛddhāśca svatejasā /
cukrodha balavaddṛṣṭvā liṅgaṃ svaṃ cāpyavidhyata //

tatpraviddhaṃ tathā bhūmau tathaiva pratyatiṣṭhata /
tamuvācāvyayo brahmā vacobhiḥ śamayanniva //

kiṃ kṛtaṃ salile śarva cirakālasthitena te /
kimarthaṃ cedamutpādya liṅgaṃ bhūmau praveśitam //

so'bravījjātasaṃrambhastathā lokagururgurum /
prajāḥ sṛṣṭāḥ pareṇemāḥ kiṃ kariṣyāmyanena vai //

prajāḥ sṛṣṭāḥ pareṇemāḥ prajārthaṃ me pitāmaha /
oṣadhyaḥ parivarteranyathaivaṃ satataṃ prajāḥ //

evamuktvā sa sakrodho jagāma vimanā bhavaḥ /
girermuñjavataḥ pādaṃ tapastaptuṃ mahātapāḥ //