Mahabharata · Chapter 1.86

katarastvanayoḥ pūrvaṃ devānāmeti sāmyatām /
ubhayordhāvato rājansūryācandramasoriva //
yayātiruvāca /

aniketo gṛhastheṣu kāmavṛtteṣu saṃyataḥ /
grāma eva vasanbhikṣustayoḥ pūrvataraṃ gataḥ //

aprāpya dīrghamāyustu yaḥ prāpto vikṛtiṃ caret /
tapyate yadi tatkṛtvā caretso'nyattapastataḥ //

pāpānāṃ karmaṇāṃ nityaṃ bibhīyādyastu mānavaḥ /
sukhamapyācarannityaṃ so'tyantaṃ sukhamedhate //

yadvai nṛśaṃsaṃ tadasatyamāhu- ryaḥ sevate dharmamanarthabuddhiḥ /
asvo'pyanīśaśca tathaiva rājaṃ- stadārjavaṃ sa samādhistadāryam //
aṣṭaka uvāca /

kenāsi hūtaḥ prahito'si rāja- nyuvā sragvī darśanīyaḥ suvarcāḥ /
kutaṛ āyātaḥ katarasyāṃ diśi tva- mutāhosvitpārthivaṃ sthānamasti //
yayātiruvāca /

imaṃ bhaumaṃ narakaṃ kṣīṇapuṇyaḥ praveṣṭumurvīṃ gaganādviprahīṇaḥ /
vidvāṃścaivaṃ matimānāryabuddhi- rmamābhavatkarmalokyaṃ ca sarvam / uktvā'haṃ vaḥ prapatiṣyāmyanantaraṃ tvaranti māṃ lokapā brāhmaṇā ye //

satāṃ sakāśe tu vṛtaḥ prapāta- ste saṅgatā guṇavantaśca sarve /
śakrācca labdho hi varo mayaiṣa patiṣyatā bhūmitalaṃ narendra //
aṣṭaka uvāca /

pṛcchāmi tvāṃ mā prapata prapātaṃ yadi lokāḥ pārthiva santi me'tra /
yadyantarikṣe yadi vā divi sthitāḥ kṣetrajñaṃ tvāṃ tasya dharmasya manye //
yayātiruvāca /

yāvatpṛthivyāṃ vihitaṃ gavāśvaṃ sahāraṇyaiḥ paśubhiḥ pārvataiśca /
tāvallokā divi te saṃsthitā vai tathā vijānīhi narendrasiṃha //
aṣṭaka uvāca /

tāṃste dadāmi mā prapata prapātaṃ ye me lokā divi rājendra santi /
yadyantarikṣe yadi vā divi śritā- stānākrama kṣipramapetamohaḥ //
yayātiruvāca /

nāsmadvidho'brāhmaṇo brahmavicca pratigrahe vartate rājamukhya /
yathā pradeyaṃ satataṃ dvijebhya- stathā'dadaṃ pūrvamahaṃ narendra //

nābrāhmaṇaḥ kṛpaṇo jātu jīve- dyā cāpyasyā'brāhmaṇī vīrapatnī /
so'haṃ naivākṛtapūrvaṃ careyaṃ vidhitsamānaḥ kimu tatra sādhuḥ //
pratardana uvāca /

pṛcchāmi tvāṃ spṛhaṇīyarūpa pratardano'haṃ yadi me santi lokāḥ /
yadyantarikṣe yadi vā divi śritāḥ kṣetrajñaṃ tvāṃ tasya dharmasya manye //
yayātiruvāca /

santi lokā bahavaste narendra apyekaikaḥ saptasaptāpyahāni /
madhucyuto ghṛtapṛktā viśokā- ste nāntavantaḥ pratipālayanti //
pratardana uvāca /

tāṃste dadāni mā prapata prapātaṃ ye me lokāstava te vai bhavantu /
yadyantarikṣe yadi vā divi śritā- stānākrama kṣipramapetamohaḥ //
yayātiruvāca /

na tulyatejāḥ sukṛtaṃ kāmayeta yogakṣemaṃ pārthiva pārthivaḥ san /
daivādeśādāpadaṃ prāpya vidvāṃ- ścarennṛśaṃsaṃ na hi jātu rājā //

dharmyaṃ mārgaṃ yatamāno yaśasyaṃ kuryānnṛpo dharmamavekṣamāṇaḥ /
na madvidho dharmabuddhiḥ prajāna- nkuryādevaṃ kṛpaṇaṃ māṃ yathā'ttha //

kuryādapūrvaṃ na kṛtaṃ yadanyai- rvidhitsamānaḥ kimu tatra sādhu /
dharmādharmau suviniścitya samya- kkāryākāryeṣvapramattaścaredyaḥ //

sa vai dhīmānsatyasandhaḥ kṛtātmā rājā bhavellokapālo mahimnā /
yadā bhavetsaṃśayo dharmakārye kāmārthau vā yatra vindanti samyak //

kāryaṃ tatra prathamaṃ dharmakāryaṃ yanno virudhyādarthakāmau sa dharmaḥ
vaiśampāyana uvāca /
bruvāṇamevaṃ nṛpatiṃ yayātiṃ nṛpottamo vasumānabravīttam //