Mahabharata · Chapter 1.73

yaḥ pareṣāṃ naro nityamativādāṃstitikṣate /
devayāni vijānīhi tena sarvamidaṃ jitam //

yaḥ samutpatitaṃ krodhaṃ nigṛhṇāti iyaṃ yathā /
sa yantetyucyate sadbhirna yo raśmiṣu lambate //

yaḥ samutpatitaṃ krodhamakrodhena nirasyati /
devayāni vijānīhi tena sarvamidaṃ jitam //

yaḥ samutpatitaṃ krodhaṃ kṣamayeha nirasyati /
yathoragastvacaṃ jīrṇāṃ sa vai puruṣa ucyate //

yaḥ sandhārayate manyuṃ yo'tivādāṃstitikṣate /
yaśca tapto na tapati dṛḍhaṃ so'rthasya bhājanam //

yo yajedapariśrānto māsimāsi śataṃ samāḥ /
na kruddhyedyaśca sarvasya tayorakrodhano'dhikaḥ //

tasmādakrodhanaḥ śreṣṭhaḥ kāmakrodhau vigarhitau /
kruddhasya niṣphalānyeva dānayajñatapāṃsi ca //

tasmādakrodhane yajñatapodānaphalaṃ mahat /
bhavedasaṃśayaṃ bhadre netarasminkadācana //

na yatirna tapasvī ca na yajvā na ca dharmabhāk /
krodhasya yo vaśaṃ gacchettasya lokadvayaṃ na ca //

putro bhṛtyaḥ suhṛdbhrātā bhāryā dharmaśca satyatā /
tasyaitānyapayāsyanti krodhaśīlasya niścitam //

yatkumārāḥ kumāryaśca vairaṃ kuryuracetasaḥ /
na tatprājño'nukurvīta na viduste balābalam //
devayānyuvāca /

vedāhaṃ tāta bālā'pi dharmāṇāṃ yadihāntaram /
akrodhe cātivāde ca veda cāpi balābalam //

svavṛttimananuṣṭhāya dharmamutsṛjya tattvataḥ / śiṣyasyāśiṣyavṛttestu na kṣantavyaṃ bubhūṣatā //

preṣyaḥ śiṣyaḥ svavṛttiṃ hi visṛjya viphalaṃ gataḥ / tasmātsankīrṇavṛtteṣu vāso mama na rocate //

pumāṃso ye hi nindanti vṛttenābhijanena ca /
na teṣu nivasetprājñaḥ śreyo'rthī pāpabuddhiṣu //

ye tvenamabhijānanti vṛttenābhijanena vā /
teṣu sādhuṣu vastavyaṃ sa vāsaḥ śreṣṭha ucyate //

suyantritaparā nityaṃ vihīnāśca dhanairvarāḥ /
durvṛttāḥ pāpakarmāṇaścaṇḍālā dhaninopi ca //

naiva jātyā hi caṇḍālāḥ svakarmavihitairvinā /
dhanābhijanavidyāsu saktāścaṇḍāladharmiṇaḥ //

akāraṇāśca dveṣyanti parivādaṃ vadanti te /
sādhostatra na vāsosti pāpibhiḥ pāpatāṃ vrajet //

sukṛte duṣkṛte vāpi yatra sajjati yo naraḥ / dhruvaṃ ratirbhavettasya tasmāddveṣaṃ na rocayet //

vāgduruktaṃ mahāghoraṃ duhiturvṛṣaparvaṇaḥ /
mama mathnāti hṛdayamagnikāma ivāraṇim //

na hyato duṣkarataraṃ manye lokeṣvapi triṣu /
yaḥ sapatnaśriyaṃ dīptāṃ hīnaśrīḥ paryupāsate //

maraṇaṃ śobhanaṃ tasya iti vidvajjanā viduḥ /
avamānamavāpnoti śanairnīcasamāgamāt //

ativādā vaktrato niḥsaranti yairāhataḥ śocati rātryahāni /
parasya vai marmasu te patanti tasmāddhīro naiva mucyetpareṣu //

nirohedāyudhaiśchinnaṃ saṃroheddagdhamāgninā /
vākkṣataṃ ca na saṃrohedāśarīraṃ śarīriṇām //

saṃrohita śarairviddhaṃ navaṃ paraśunā hatam /
vācā duruktaṃ bībhatsaṃ na saṃroheta vākkṣatam //