Mahabharata · Chapter 1.38

sarpāṇāṃ tu vacaḥ śrutvā sarveṣāmiti ceti ca /
vāsukeśca vacaḥ śrutvā elāpatro'bravīdidam //

prāgeva darśitā buddhirmayaiṣā bhujagottamāḥ /
heyeti yadi vo buddhistavāpi ca tathā prabho //

astu kāmaṃ mabhādyāpi buddhiḥ smaraṇamāgatā / tāṃ śṛṇudhvaṃ pravakṣyāmi yāthātathyena pannagāḥ //

na sa yajño na bhavitā na sa rājā tathāvidhaḥ /
janamejayaḥ pāṇḍaveyo yato'smākaṃ mahadbhayam //

daivenopahato rājanyo bhavediha pūruṣaḥ /
sa daivamevāśrayeta nānyattatra parāyaṇam //

tadidaṃ caivamasmākaṃ bhayaṃ pannagasattamāḥ /
daivamevāśrayāmo'tra śṛṇudhvaṃ ca vaco mama //

ahaṃ śāpe samutsṛṣṭe samaśrauṣaṃ vacastadā / māturutsaṅgamārūḍho bhayātpannagasattamāḥ /
devānāṃ pannagaśreṣṭhāstīkṣṇāstīkṣṇa iti prabho //

śāpaduḥkhāgnitaptānāṃ pannagānāmanāmayam / kṛpayā parayā'viṣṭāḥ prārthayanto divaukasaḥ //
devā ūcuḥ /

kā hi labdhvā priyānputrāñśapedevaṃ pitāmaha /
ṛte kadrūṃ tīkṣṇarūpāṃ devadeva tavāgrataḥ //

tatheti ca vacastasyāstvayāpyuktaṃ pitāmaha /
icchāma etadvijñātuṃ kāraṇaṃ yanna vāritā //
brahmovāca /

bahavaḥ pannagāstīkṣṇā ghorarūpā viṣolbaṇāḥ /
prajānāṃ hitakāmo'haṃ na ca vāritavāṃstadā //

ye dandaśūkāḥ kṣudrāśca pāpācārā viṣolbaṇāḥ /
teṣāṃ vināśo bhavitā na tu ye dharmacāriṇaḥ //

yannimittaṃ ca bhavitā mokṣasteṣāṃ mahābhayāt /
pannagānāṃ nibodhadhvaṃ tasminkāle samāgate //

yāyāvarakule dhīmānbhaviṣyati mahānṛṣiḥ /
jaratkāruriti khyātastapasvī niyatendriyaḥ //

tasya putro jaratkārorbhaviṣyati tapodhanaḥ / āstīko nāma yajñaṃ sa pratiṣetsyati taṃ tadā /
tatra mokṣyanti bhujagā ye bhaviṣyanti dhārmikāḥ //
devā ūcuḥ /

sa munipravaro brahmañjaratkārurmahātapāḥ /
kasyāṃ putraṃ mahātmānaṃ janayiṣyati vīryavān //
brahmovāca /

vāsukerbhaginī kanyā samutpannā suśobhanā /
tasmai dāsyati tāṃ kanyāṃ vāsukirbhujagottamaḥ //

tasyāṃ janayitā putraṃ vedavedāṅgapāragam / sanāmāyāṃ sanāmā sa kanyāyāṃ dvijasattamaḥ //
elāpatra uvāca /

evamastviti taṃ devāḥ pitāmahamathābruvan /
utkvaivaṃ vacanaṃ devānviriñcistridivaṃ yayau //

so'hamevaṃ prapaśyāmi vāsuke bhaginī tava /
jaratkāruriti khyātā tāṃ tasmai pratipādaya //

bhaikṣavadbhikṣamāṇāya nāgānāṃ bhayaśāntaye /
ṛṣaye suvratāyaināmeṣa mokṣaḥ śruto mayā //