Mahabharata · Chapter 1.37

mātuḥ sakāśāttaṃ śāpaṃ śrutvā vai pannagottamaḥ /
vāsukiścintayāmāsa śāpo'yaṃ na bhavetkatham //

tataḥ sa mantrayāmāsa bhrātṛbhiḥ saha sarvaśaḥ /
airāvataprabhṛtibhiḥ sarvairdharmaparāyaṇaiḥ //
vāsukiruvāca /

ayaṃ śāpo yathoddiṣṭo viditaṃ vastathā'naghāḥ /
tasya śāpasya mokṣārthaṃ mantrayitvā yatāmahe //

sarveṣāmeva śāpānāṃ pratighāto hi vidyate /
na tu mātrā'bhiśaptānāṃ mokṣaḥ kvacana vidyate //

avyayasyāprameyasya satyasya ca tathāgrataḥ /
śaptā ityeva me śrutvā jāyate hṛdi vepathuḥ //

nūnaṃ sarvavināśo'yamasmākaṃ samupāgataḥ / śāpaḥ sṛṣṭo mahāghoro mātrā khalvavinītayā /
na hyetāṃ so'vyayo devaḥ śapatnīṃ pratyaṣedhayat //

tasmātsammantrayāmo'dya bhujaṅgānāmanāmayam /
yathā bhaveddhi sarveṣāṃ mā naḥ kālo'tyagādayam //

sarva eva hi nastāvadbuddhimanto vicakṣaṇāḥ /
api mantrayamāṇā hi hetuṃ paśyāma mokṣaṇe //

yathā naṣṭaṃ purā devā gūḍhamagniṃ guhāgatam / yathā sa yajño na bhavedyathā vā'pi parābhavaḥ /
janamejayasya sarpāṇāṃ vināśakaraṇāya vai //
sautiruvāca /

tathetyuktvā tataḥ sarve kādraveyāḥ samāgatāḥ /
samayaṃ cakire tatra mantrabuddhiviśāradāḥ //

eke tatrābruvannāgā vayaṃ bhūtvā dvijarṣabhāḥ /
janamejayaṃ tu bhikṣāmo yajñaste na bhavediti //

apare tvabruvannāgāstatra paṇḍitamāninaḥ /
mantriṇo'sya vayaṃ sarve bhaviṣyāmaḥ susammatāḥ //

sa naḥ prakṣyati sarveṣu kāryeṣvarthaviniścayam /
tatra buddhiṃ pradāsyāmo yathā yajño nivartsyati //

sa no bahumatānrājā buddhyā buddhimatāṃ varaḥ /
yajñārthaṃ prakṣyati vyaktaṃ neti vakṣyāmahe vayam //

darśayanto bahūndoṣānpretya ceha ca dāruṇān /
hetubhiḥ kāraṇaiścaiva yathā yajño bhavenna saḥ //

athavā ya upādhyāyaḥ kratostasya bhaviṣyati /
sarpasatravidhānajño rājakāryahite rataḥ //

taṃ gatvā daśatāṃ kaścidbhujaṅgaḥ sa mariṣyati /
tasminmṛte yajñakāre kratuḥ sa na bhaviṣyati //

ye cānye sarpasatrajñā bhaviṣyantyasya cartvijaḥ /
tāṃśca sarvāndaśiṣyāmaḥ kṛtamevaṃ bhaviṣyati //

apare tvabruvannāgā dharmātmāno dayālavaḥ /
abuddhireṣā bhavatāṃ brahmahatyā na śobhanam //

samyaksaddharmamūlā vai vyasane śāntiruttamā /
adharmottaratā nāma kṛtsnaṃ vyāpādayejjagat //

apare tvabruvannāgāḥ samiddhaṃ jātavedasam /
varṣairnirvāpayiṣyāmo meghā bhūtvā savidyutaḥ //

srugbhāṇḍaṃ niśi gatvā ca apare bhujagottamāḥ /
pramattānāṃ harantvāśu vighna evaṃ bhaviṣyati //

yajñe vā bhujagāstasmiñśataśo'tha sahasraśaḥ /
janāndaśantu vai sarve naivaṃ trāso bhaviṣyati //

athavā saṃskṛtaṃ bhojyaṃ dūṣayantu bhujaṅgamāḥ /
svena mūtrapurīṣeṇa sarvabhojyavināśinā //

apare tvabruvaṃstatra ṛtvijo'sya bhavāmahe /
yajñavighnaṃ kariṣyāmo dakṣiṇā dīyatāmiti //

vaśyatāṃ ca gato'sau naḥ kariṣyati yathepsitam /
apare tvabruvaṃstatra jale prakrīḍitaṃ nṛpam //

gṛhamānīya badhnīmaḥ kraturevaṃ bhavenna saḥ /
apare tvabruvaṃstatra nāgāḥ paṇḍitamāninaḥ //

daśāmastaṃ pragṛhyāśu kṛtapevaṃ bhaviṣyati /
chinnaṃ mūlamanarthānāṃ mṛte tasminbhaviṣyati //

eṣā no naiṣṭhikī buddhiḥ sarveṣāmīkṣaṇaśravaḥ /
atha yanmanyase rājandrutaṃ tatsaṃvidhīyatām //

ityuktvā samudaikṣanta vāsukiṃ pannagottamam /
vāsukiścāpi sañcintya tānuvāca bhujaṅgamān //

naiṣā vo naiṣṭhikī buddhirmatā kartuṃ bhujaṅgamāḥ /
sarveṣāmeva me buddhiḥ pannagānāṃ na rocate //

kiṃ tatra saṃvidhātavyaṃ bhavatāṃ syāddhitaṃ tu yat /
śreyaḥ prasādanaṃ manye kaśyapaśya mahātmanaḥ //

jñātivargasya sauhārdādātmanaśca bhujaṅgamāḥ /
na ca jānāti me buddhiḥ kiñcitkartuṃ vaco hivaḥ //

mayā hīdaṃ vidhātavyaṃ bhavatāṃ yaddhitaṃ bhavet /
anenāhaṃ bhṛśaṃ tapye guṇadoṣau madāśrayau //