Mahabharata · Chapter 1.39

elāpatravacaḥ śrutvā te nāgā dvijasattama /
sarve prahṛṣṭamanasaḥ sādhusādhvityapūjayan //

tataḥprabhṛti tāṃ kanyāṃ vāsukiḥ paryarakṣata /
jaratkāruṃ svasāraṃ vai paraṃ harṣamavāpa ca //

tato nātimahānkālaḥ samatīta ivābhavat /
atha devāsurāḥ sarve mamanthurvaruṇālayam //

tatra netramabhūnnāgo vāsukirbalināṃ varaḥ /
samāpyaiva ca tatkarma pitāmahamupāgaman //

devā vāsukinā sārdhaṃ pitāmahamathāvruvan /
bhagavañśāpabhīto'yaṃ vāsukistapyate bhṛśam //

asyaitanmānasaṃ śalyaṃ samuddhartuṃ tvamarhasi /
jananyāḥ śāpajaṃ deva jñātīnāṃ hitamicchataḥ //

hito hyayaṃ sadāsmakaṃ priyakārī ca nāgarāṭ /
prasādaṃ kuru deveśa śamayāsya manojvaram //
brahmovāca /

mayaiva tadvitīrṇaṃ vai vacanaṃ manasā'marāḥ /
elāpatreṇa nāgena yadasyābhihitaṃ purā //

tatkarotveṣa nāgendraḥ prāptakālaṃ vacaḥ svayam /
vinaśiṣyanti ye pāpā na tu ye dharmacāriṇaḥ //

utpannaḥ sa jaratkārustapasyugre rato dvijaḥ /
tasyaiṣa bhaginīṃ kāle jaratkāruṃ prayacchatu //

elāpatreṇa yatproktaṃ vacanaṃ bhujagena ha /
pannagānāṃ hitaṃ devāstattathā na tadanyathā //
sautiruvāca /

etacchrutvā tu nāgendraḥ pitāmahavacastadā /
sandiśya pannagānsarvānvāsukiḥ śāpamohitaḥ //

svasāramudyamya tadā jaratkārumṛṣiṃ prati /
sarpānbahūñjaratkārau nityayuktānsamādadhat //

jaratkāruryadā bhāryāmicchedvarayituṃ prabhuḥ /
śīghrametya tadā'khyeyaṃ tannaḥ śreyo bhaviṣyati //