Mahabharata · Chapter 1.31

ko'parādho mahendrasya kaḥ pramādaśca sūtaja /
tapasā vālakhilyānāṃ sambhūto garuḍaḥ katham //

kaśyapasya dvijāteśca kathaṃ vai pakṣirāṭ sutaḥ /
adhṛṣṭaḥ sarvabhūtānāmavadhyascābhavatkatham //

kathaṃ ca kāmacārī sa kāmavīryaśca khecaraḥ /
etadicchāmyahaṃ śrotuṃ purāṇe yadi paṭhyate //
sautiruvāca /

viṣayo'yaṃ purāṇasya yanmāṃ tvaṃ paripṛcchasi /
śṛṇu me vadataḥ sarvametatsankṣepatoṃ dvija //

yajataḥ putrakāmasya kaśyapasya prajāpateḥ /
sāhāyyamṛṣayo devā gandharvāśca daduḥ kila //

tatredhmānayane śakro niyuktaḥ kaśyapena ha /
munayo vālakhilyāśca ye cānye devatāgaṇāḥ //

śakrastu vīryasadṛśamidhyabhāraṃ giriprabham /
samudyamyānayāmāsa nātikṛcchrādiva prabhuḥ //

athāpaśyadṛṣīnhrasvānaṅguṣṭhodaravarṣmaṇaḥ /
palāśavartikāmekāṃ vahataḥ saṃhatānpathi //

pralīnānsveṣvivāṅgeṣu nirāhārāṃstapodhanān /
kliśyamānānmandabalāngoṣpade samplutodake //

tānsarvānvismayāviṣṭo vīryonmattaḥ purandaraḥ /
apahāsyābhyagācchīghraṃ lambayitvā'vamanya ca //

te'tha roṣasamāviṣṭāḥ subhṛśaṃ jātamanyavaḥ /
ārebhire mahatkarma tadā śakrabhayankaram //

juhuvuste sutapaso vidhivajjātavedasam /
mantrairuccāvacairviprā yena kāmena tacchṛṇu //

kāmavīryaḥ kāmagamo devarājabhayapradaḥ /
indro'nyaḥ sarvadevānāṃ bhavediti yatavratāḥ //

indrācchataguṇaḥ śaurye vīrye caiva manojavaḥ /
tapaso naḥ phalenādya dāruṇaḥ sambhavitviti //

tadbuddhvā bhṛśasantapto devarājaḥ śatakratuḥ /
jagāma śaraṇaṃ tatra kaśyapaṃ saṃśitavratam //

tacchrutvā devarājasya kaśyapo'tha prajāpatiḥ /
vālakhilyānupāgamya karmasiddhimapṛcchata //
kaśyapa uvāca /

kena kāmena cārabdhaṃ bhavadbhirhomakarma ca /
yāthātathyena me brūta śrotuṃ kautūhalaṃ hi me //
vālakhilyā ūcuḥ /

avajñātāḥ surendreṇa mūḍhenākṛtabuddhinā /
aiśvaryamadamattena sadācārānnirasyatā //

tadvighātārthamārambho vidhivattasya kaśyapa //
sautiruvāca /

evamastviti taṃ cāpi pratyūcuḥ satyavādinaḥ /
tānkaśyapa uvācedaṃ sāntvapūrvaṃ prajāpatiḥ //

ayamindrastribhuvane niyogādbrahmaṇaḥ kṛtaḥ /
indrārthe ca bhavanto'pi yatnavantastapodhanāḥ //

na mithyā brahmaṇo vākyaṃ kartumarhatha sattamāḥ /
bhavatāṃ hi na mithyā'yaṃ sankalpo vai cikīrṣitaḥ //

bhavatveṣa patatrīṇāmindro'tibalasattvavān /
prasādaḥ kriyatāmasya devarājasya yācataḥ //
sautiruvāca /

evamuktāḥ kaśyapena vālakhilyāstapodhanāḥ /
pratyūcurabhisampūjya muniśreṣṭhaṃ prajāpatim //
vālakhilyā ūcuḥ /

indrārtho'yaṃ samārambhaḥ sarveṣāṃ naḥ prajāpate /
apatyārthaṃ samārambho bhavataścāyamīpsitaḥ //

tadidaṃ saphalaṃ karma tvayaiva pratigṛhyatām /
tathā caivaṃ vidhatsvātra yathā śreyo'nupaśyasi //
sautiruvāca /

etasminneva kāle tu devī dākṣāyaṇī śubhā /
vinatā nāma kalyāṇī putrakāmā yaśasvinī //

tapastaptvā vrataparā snātā puṃsavane śuciḥ /
upacakrāma bhartāraṃ tāmuvācātha kaśyapaḥ //

ārambhaḥ saphalo devi bhavitā yastvayepsitaḥ /
janayiṣyasi putrau dvau vīrau tribhuvaneśvarau //

tapasā vālakhilyānāṃ mama sankalpatastathā /
bhaviṣyato mahābhāgau putrau trailokyapūjitau //

uvāca caināṃ bhagavānkaśyapaḥ punareva ha /
dhāryatāmapramādena garbho'yaṃ sumahodayaḥ //

ekaḥ sarvapatatrīṇāmindratvaṃ kārayiṣyati /
lokasambhāvito vīraḥ kāmarūpo vihaṅgamaḥ //
sautiruvāca /

śatakratumathovāca prīyamāṇaḥ prajāpatiḥ /
tvatsahāyau mahāvīryau bhrātarau te bhaviṣyataḥ //

naitābhyāṃ bhavitā doṣaḥ sakāśātte purandara /
vyetu te śakra santāpastvamevendro bhaviṣyasi //

na cāpyevaṃ tvayā bhūyaḥ kṣeptavyā brahmavādinaḥ /
na cāvamānyā darpātte vāgvajrā bhṛśakopanāḥ //
sautiruvāca /

evamukto jagāmendro nirviśaṅkastriviṣṭapam /
vinatā cāpi siddhārthā babhūva muditā tathā //

janayāmāsa putrau dvāvaruṇaṃ garuḍaṃ tathā /
vikalāṅgo'ruṇastatra bhāskarasya puraḥsaraḥ //

patattrīṇāṃ ca garuḍamindratvenābhyaṣiñcata /
tasyaitatkarma sumahacchrūyatāṃ bhṛgunandana //