Mahabharata · Chapter 1.32

tatastasmādgirivarātsamudīrṇamahābalaḥ / garuḍaḥ pakṣirāṭ tūrṇaṃ samprāpto vibudhānprati //

taṃ dṛṣṭvātibalaṃ caiva prākampanta surāstataḥ /
parasparaṃ ca pratyaghnansarvapraharaṇānyuta //

tatra cāsīdameyātmā vidyudagnisamaprabhaḥ /
bhaumanaḥ sumahāvīryaḥ somasya parirakṣitā //

sa tena patagendreṇa pakṣatuṇḍanakhaiḥ kṣataḥ /
muhūrtamatulaṃ yuddhaṃ kṛtvā vinihato yudhi //

rajaścoddhūya sumahatpakṣavātena khecaraḥ /
kṛtvā lokānnirālokāṃstena devānavākirat //

tenāvakīrṇā rajasā devā mohamupāgaman /
na caivaṃ dadṛśuśchannā rajasā'mṛtarakṣiṇaḥ //

evaṃ saṃloḍayāmāsa garuḍastridivālayam /
pakṣatuṇḍaprahāraistu devānsa vidadāra ha //

tato devaḥ sahasrākṣastūrṇaṃ vāyumacodayat /
vikṣipemāṃ rajovṛṣṭiṃ tavedaṃ karma māruta //
sautiruvāca /

atha vāyurapovāha tadrajastarasā balī /
tato vitimire jāte devāḥ śakunimārdayan //

nanādoccaiḥ sa balavānmahāmegha ivāmbare /
vadhyamānaḥ suragaṇaiḥ sarvabhūtāni bhīṣayan //

utpapāta mahāvīryaḥ pakṣirāṭ paravīrahā /
samutpatyāntarikṣasthaṃ devānāmupari sthitam //

varmimo vibudhāḥ sarve nānāśastrairavākiran /
paṭṭiśaiḥ paridhaiḥ śūlairgadābhiśca savāsavāḥ //

kṣuraprairjvalitaiścāpi cakrairādityarūpibhiḥ /
nānāśastravisargaistairvadhyamānaḥ samantataḥ //

kurvansutumulaṃ yuddhaṃ pakṣirāṇṇa vyakampata / nirdahanniva cākāśe vainateyaḥ pratāpavān /
pakṣābhyāmurasā caiva samantādvyakṣipatsurān //

te vikṣiptāstato devā dudruvurgaruḍārditāḥ /
nakhatuṇḍakṣatāścaiva susruvuḥ śoṇitaṃ bahu //

sādhyāḥ prācīṃ sagandharvā vasavo dakṣiṇāṃ diśam /
prajagmuḥ sahitā rudrāḥ patagendrapradharṣitāḥ //

diśaṃ pratīcīmādityā nāsatyāvuttarāṃ diśam /
muhurmuhuḥ prekṣamāṇā yudhyamānaṃ mahaujasaḥ //

aśvakrandena vīreṇa reṇukena ca pakṣirāṭ /
krathanena ca śūreṇa tapanena ca khecaraḥ //

ulūkaśvasanābhyāṃ ca nimeṣeṇa ca pakṣirāṭ /
prarujena ca sangrāmaṃ cakāra pulinena ca //

tānpakṣanakhatuṇḍāgrairabhinadvinatāsutaḥ /
yugāntakāle sankruddhaḥ pinākīva parantapa //

mahābalā mahotsāhāstena te bahudhā kṣatāḥ /
rejurabhraghanaprakhyā rudhiraughapravarṣiṇaḥ //

tānkṛtvā patagaśreṣṭhaḥ sarvānutkrāntajīvitān /
atikrānto'mṛtasyārthe sarvato'gnimapaśyata //

āvṛṇvānaṃ mahājvālamarcirbhiḥ sarvato'mbaram /
dahantamiva tīkṣṇāṃśuṃ caṇḍavāyusamīritam //

nabhaḥ spṛśantaṃ jvālābhiḥ sarvabhūtabhayankaram / tato navatyā navatīrmukhānāṃ
kṛtvā mahātmā garuḍastarasvī / nadīḥ samāpīya mukhaistatastaiḥ suśīghramāgamya punarjavena //

jvalantamagniṃ tamamitratāpanaḥ samāstaratpatraratho nadībhiḥ /
tataḥ pracakre vapuranyadalpaṃ praveṣṭukāmo'gnimabhipraśāmya //