Mahabharata · Chapter 1.28

ityukto garuḍaḥ sarpaistato mātaramabravīt /
gacchāmyamṛtamāhartuṃ bhakṣyamicchāmi veditum //
vinatovāca /

samudrakukṣāvekānte niṣādālayamuttamam /
bhavanāni niṣādānāṃ tatra santi dvijottama //

pāpināṃ naṣṭalokānāṃ nirghṛṇānāṃ durātmanām /
niṣādānāṃ sahasrāṇi tānbhuktvā'mṛtamānaya //

na ca te brāhmaṇaṃ hantuṃ kāryā buddhiḥ kathañcana /
avadhyaḥ sarvabhūtānāṃ brāhmaṇo hyanalopamaḥ //

agnirarko viṣaṃ śastraṃ vipro bhavati kopitaḥ /
gururhi sarvabhūtānāṃ brāhmaṇaḥ parikīrtitaḥ //

evamādisvarūpaistu satāṃ vai brāhmaṇo mataḥ /
sa te tāta na hantavyaḥ sankruddhenāpi sarvathā //

brāhmaṇānāmabhidroho na kartavyaḥ kathañcana /
na hyevamagnirnādityo bhasma kuryāttathānagha //

yathā kuryādabhikruddho brāhmaṇaḥ saṃśitavrataḥ /
tadetairvividhairliṅgaistvaṃ vidyāstaṃ dvijottamam //

bhūtānāmagrabhūrvipro varṇaśreṣṭhaḥ pitā guruḥ /
garuḍa uvāca /
kiṃrūpo brāhmaṇo mātaḥ kiṃśīlaḥ kimparākramaḥ //

kiṃsvidagninibho bhāti kiṃsvitsaumyapradarśanaḥ /
yathāhamabhijānīyāṃ brāhmaṇaṃ lakṣaṇaiḥ śubhaiḥ //

tanme kāraṇato mātaḥ pṛcchato vaktumarhasi /
vinatovāca /
yaste kaṇṭhamanuprāpto nigīrṇaṃ baḍiśaṃ yathā //

dahedaṅgāravatputraṃ taṃ vidyādbrāhmaṇarṣabham /
viprastvayā na hantavyaḥ sankruddhenāpi sarvadā //

provāca caina vinatā putrahārdādidaṃ vacaḥ /
jaṭhare na ca jīryedyastaṃ jānīhi dvijottamam //

punaḥ provāca vinatā putrahārdādidaṃ vacaḥ /
jānantyapyatulaṃ vīryamāśīrvādaparāyaṇā //

prītā paramaduḥkhārtā nāgairviprakṛtā satī /
vinatovāca /
pakṣau te mārutaḥ pātu candrasūryau ca pṛṣṭhataḥ //

śiraśca pātu vahniste vasavaḥ sarvatastanum / viṣṇuḥ sarvagataḥ sarvamahgāni tava caiva ha /
ahaṃ ca te sadā putra śāntisvastiparāyaṇā //

ihāsīnā bhaviṣyāmi svastikāre ratā sadā /
ariṣṭaṃ vraja panthānaṃ putra kāryārthasiddhaye //
sautiruvāca /

tataḥ sa māturvacanaṃ niśamya vitatya pakṣau nabha utpapāta /
tato niṣādānbalavānupāgato bubhukṣitaḥ kāla ivāntako'paraḥ //

sa tānniṣādānupasaṃharaṃstadā rajaḥ samuddhūya nabhaḥspṛśaṃ mahat /
samudrakukṣau ca viśoṣayanpayaḥ samīpajānbhūdharajānvicālayan //

tataḥ sa cakre mahadānanaṃ tadā niṣādamārgaṃ pratirudhya pakṣirāṭ /
tato niṣādāstvaritāḥ pravavraju- ryato mukhaṃ tasya bhujangabhojinaḥ //

tadānanaṃ vivṛtamatipramāṇava- tsamabhyayurgaganamivārditāḥ khagāḥ /
sahasraśaḥ pavanajovimohitā yathā.ñanilapracalitapādape vane //

tataḥ khago vadanamamitratāpanaḥ samāharatparicapalo matbalāḥ /
niṣūdayanbahuvidhamatsyajīvino babhukṣito gaganacareśvarastadā //