Mahabharata · Chapter 1.27

samprahṛṣṭāstato nāgā jaladhārāplutāstadā /
suparṇenohyamānāste jagmustaṃ dvīpamāśu vai //

taṃ dvīpaṃ makarāvāsaṃ vihitaṃ viśvakarmaṇā /
tatra te lavaṇaṃ ghoraṃ dadṛśuḥ pūrvamāgatāḥ //

suparṇasahitāḥ sarpāḥ kānanaṃ ca manoramam /
sāgarāmbuparikṣiptaṃ pakṣisaṅghanijāditam //

vicitraphalapuṣpābhirvanarājibhirāvṛtam /
bhavanairāvṛtaṃ ramyaistathā padmākarairapi //

prasannasalilaiścāpi hvadairdivyairvibhūṣitam /
divyagandhavahaiḥ puṇyairmārutairupavījitam //

utpatadbhirivākāśaṃ vṛkṣairmalayajairapi /
śobhitaṃ puṣpavarṣāṇi muñcadbhirmārutoddhataiḥ //

vāyuvikṣiptakusumaistathā'nyairapi pādapaiḥ /
kiradbhiriva tatrasthānnāgānpuṣpāmbuvṛṣṭibhiḥ //

manaḥsaṃharṣajaṃ divyaṃ gandharvāpsarasāṃ priyam /
mattabhramassanghuṣṭaṃ manojñākṛtidarśanam //

ramaṇīyaṃ śivaṃ puṇyaṃ sarvairjanamanoharaiḥ /
nānāpakṣirutaṃ ramyaṃ kadrūputrapraharṣaṇam //

tatte vanaṃ samāsādya vijahruḥ pannagāstadā /
abruvaṃśca mahāvīryaṃ suparṇaṃ patageśvaram //

vahāsmānaparaṃ dvīpaṃ suramyaṃ vimalodakam /
tvaṃ hi deśānbahūnramyānvrajanpaśyasi khecara //
sautiruvāca /

sa vicintyābravītpakṣī mātaraṃ vinato tadā /
kiṃ kāraṇaṃ mayā mātaḥ kartavyaṃ sarpabhāṣitam //
vinatovāca /

dāsībhūtāsmi duryogātsapatnyāḥ patagottama /
paṇaṃ vitathamāsthāya sarpairupadhinā kṛtam //
sautiruvāca /

tasmiṃstu kathite mātrā kāraṇe gaganetaraḥ /
uvāca vacanaṃ sarpāṃstena duḥkhena duḥkhitaḥ //

kimāhṛtya viditvā vā kiṃ vā kṛtveha pauruṣam /
dāsyādvo vipramucyeyaṃ tathyaṃ vadata lelihāḥ //
sautiruvāca /

śrutvā samabruvansarpā āharāmṛtamojasā /
tato dāsyādvipramokṣo bhavitā tava khecara //