Mahabharata · Chapter 1.29

tasya kaṇṭhamanuprāpto brāhmaṇaḥ saha bhāryayā /
dahandīpta ivāṅgārastamuvācāntarikṣagaḥ //

dvijottama vinirgaccha tūrṇamāsyādapāvṛtāt /
na hi me brāhmaṇo vadhyaḥ pāpeṣvapi rataḥ sadā //
sautiruvāca /

bruvāṇamevaṃ garuḍaṃ brāhmaṇaḥ pratyabhāṣata /
niṣādī mama bhāryeyaṃ nirgacchatu mayā saha //
garuḍa uvāca /

etāmapi niṣādīṃ tvaṃ parigṛhyāśu niṣpata /
tūrṇaṃ sambhāvayātmānamajīrṇaṃ mama tejasā //
sautiruvāca /

tataḥ sa vipro niṣkrānto niṣādīsahitastadā /
vardhayitvā ca garuḍamiṣṭaṃ deśaṃ jagāma ha //

sahabhārye viniṣkrānte tasminvipre sa pakṣirāṭ /
vitatya pakṣāvākāśamutpapāta manojavaḥ //

tato'paśyatsvapitaraṃ pṛṣṭaścākhyātavānpituḥ /
yathānyāyamameyātmā taṃ covāca mahānṛṣiḥ //
kaśyapa uvāca /

kaccidvaḥ kuśalaṃ nityaṃ bhojane bahulaṃ suta /
kaccicca mānuṣe loke tavānnaṃ vidyate bahu //
kva gantāsyativegena mama tvaṃ vaktumarhasi //
garuḍa uvāca /

mātā me kuśalā śaśvattathā bhrātā tathā hyaham /
na hi me kuśalaṃ tāta bhojane bahule sadā //

ahaṃ hi sarpaiḥ prahitaḥ somamāhartumuttamam /
mahāturdāsyavimokṣārthamāhariṣye tamadya vai //

mātrā cātra samādiṣṭo niṣādānbhakṣayeti ha /
na ca me tṛptirabhavadbhakṣayitvā sahasraśaḥ //

tasmādbhakṣyaṃ tvamaparaṃ bhagavanpradiśasva me /
yadbhuktvā'mṛtamāhartuṃ samartaḥ syāmahaṃ prabho //

kṣutpipāsāvighātārthaṃ bhakṣyamākhyātu me bhavān /
kaśyapa uvāca /
idaṃ saro mahāpuṇyaṃ devaloke'pi viśrutam //

yatra kūrmāgrajaṃ hastī sadā karṣatyavāṅmukhaḥ /
tayorjanmāntare vairaṃ sampravakṣyāmyasoṣataḥ //

tanme tattvaṃ nibodhasya yatpramāṇau ca tāvubhau /
śṛṇu tvaṃ vatsa bhadraṃ te kathāṃ vairāgyavardhinīm //

pitrorarthavibhāge vai samutpannāṃ purāṇḍaja / āsīdvibhāvasurnāma maharṣiḥ kopano bhṛśam //

bhrātā tasyānujaścāsītsupratīko mahātapāḥ /
sa necchati dhanaṃ bhrātrā sahaikasthaṃ mahāmuniḥ //

vibhāgaṃ kīrtayatyeva supratīko hi nityaśaḥ /
athābravīcca taṃ bhrātā supratīkaṃ vibhāvasuḥ //

vibhāge bahavo doṣā bhaviṣyanti mahātapaḥ / vibhāgaṃ bahavo mohātkartumicchanti nityaśaḥ /
tato vibhaktāstvanyonyaṃ nādriyante'rthamohitāḥ //

tataḥ svārthaparānmūḍhānpṛthagbhūtānsvakairdhanaiḥ /
viditvā bhedayantyetānamitrā mitrarūpiṇaḥ //

viditvā cāpare bhinnānantareṣu patantyatha /
bhinnānāmatulo nāśaḥ kṣiprameva pravartate //

tasmādvibhāgaṃ bhrātṝṇāṃ na praśaṃsanti sādhavaḥ /
evamuktaḥ supratīko bhāgaṃ kīrtayate'niśam //

evaṃ nirbadhyamānastu śaśāpainaṃ vibhāvasuḥ / guruśāstre'nibaddhānāmanyonyenābhiśaṅkinām //

niyantu na hi śakyastvaṃ bhedato dhanamicchasi /
yasmāttasmātsupratīka hastitvaṃ samavāpsyasi //
kaśyapa uvāca /

śaptastvevaṃ supratīko vibhāvasumathābravīt /
tvamapyantarjalacaraḥ kacchapaḥ sambhaviṣyasi //

evamanyonyaśāpāttau supratīkavibhāvasū /
gajakacchapatāṃ prāptāvarthārthaṃ mūḍhacetasau //

roṣadoṣānuṣaṅgeṇa tiryagyonigatāvapi /
parasparadveṣaratau pramāṇabaladarpitau //

sarasyasminmahākāyau pūrvavairānusāriṇau /
tayoranyataraḥ śrīmānsamupaiti mahāgajaḥ //

yasya bṛṃhitaśabdena kūrmo'pyantarjaleśayaḥ /
utthito'sau mahākāyaḥ kṛtsnaṃ vikṣobhayansaraḥ //

taṃ dṛṣṭvā'veṣṭitakaraḥ patatyeṣa gajo jalam /
dantahastāgralāṅgūlapādavegena vīryavān //

vikṣobhayaṃstato nāgaḥ saro bahujhaṣākulam /
kūrmo'pyabhyudyataśirā yuddhāyābhyeti vīryavān //

ṣaḍucchrito yojanāni gajastaddviguṇāyataḥ /
kūrmastriyojanotsedho daśayojanamaṇḍalaḥ //

tāvubhau yuddhasammattau parasparavadhaiṣiṇau /
upayujyāśu karmedaṃ sādhaye hitamātmanaḥ //

mahābhraghanasankāśaṃ taṃ bhuktvāmṛtamānaya /
mahāgirisamaprakhyaṃ ghorarūpaṃ ca hastinam //
sautiruvāca /

ityuktvā garuḍaṃ so'tha māṅgalyamakarottadā /
yudhyataḥ saha devaiste yuddhe bhavatu maṅgalam //

pūrṇakumbho dvijā gāvo yaccānyatkiñciduttamam /
śubhaṃ svastyayanaṃ cāpi bhaviṣyati tavāṇḍajā //

yudhyamānasya saṅgrāme devaiḥ sārdhaṃ mahābala /
ṛco yajūṃṣi sāmāni pavitrāṇi havīṃṣi ca //

rahasyāni ca sarvāṇi sarve vedāśca te balam / vardhayiṣyanti samare bhaviṣyati khagottama /
ityukto garuḍaḥ pitrā gatastaṃ hvadamantikāt //

apaśyannirmalajalaṃ nānāpakṣisamākulam /
sa tatsmṛtvā piturvākyaṃ bhīmavego'ntarikṣagaḥ //

nakhena gajamekena kūrmamekena cākṣipat /
sadhutpapāta cākāśaṃ tata uccairvihaṅgamaḥ //

so'lambaṃ tīrthaṇāsādya devavṛkṣānupāgamat /
te bhītāḥ samakampanta tasya pakṣānilāhatāḥ //

na no bhañjyāditi tadā divyāḥ kanakaśākhinaḥ /
pracalāṅgānsa tāndṛṣṭvā manorathaphaladrumān //

anyānatularūpāṅgānupacakrāma khecaraḥ / kāñcanai rājataiścaiva phalairvaidūryaśākhinaḥ /
sāgarāmbuparikṣiptānbhrājamānānmahādrumān //

teṣāṃ madhye mahānāsītpādapaḥ sumanoharaḥ /
sahasrayojanotsedho bahuśākhāsamanvitaḥ //

khagānāmālayo divyo nāmnā rauhiṇapādapaḥ /
yasya chāyāṃ samāśritya sadyo bhavati nirvṛtaḥ; //

tamuvāca khagaśreṣṭhaṃ tatra rauhiṇapādapaḥ /
atipravṛddhaḥ samuhānāpatantaṃ manojavam //
rauhiṇa uvāca /

yaiṣā mama mahāśākhā śatayojanamāyatā /
etāmāsthāya śākhāṃ tvaṃ khādemau gajakacchapau //
sautiruvāca /

tato drumaṃ patagasahasrasevitaṃ mahīdharapratimavapuḥ prakampayan /
khagottamo drutamabhipatya vegavā- nbabhañja tāmaviralapatrasañcayām //