Mahabharata · Chapter 1.252
tau rathābhyāṃ rathaśreṣṭhau dāvasyobhayataḥ sthitau /
dikṣu sarvāsu bhūtānāṃ cakrāte kadanaṃ mahat //
yatra yatra ca dṛśyante prāṇinaḥ khāṇḍavālayāḥ /
palāyantaḥ pravīrau tau tatratatrābhyadhāvatām //
chidraṃ na sma prapaśyanti rathayorāśucāriṇoḥ /
āviddhāveva dṛśyete rathinau tau rathottamau //
khāṇḍave dahyamāne tu bhūtānyatha sahasraśaḥ /
utpeturbhairavānnādānvinadantaḥ samantataḥ //
dagdhaikadeśā bahavo niṣṭaptāśca tathā'pare /
sphuṭitākṣā viśīrṇāśca viplutāśca tathā'pare //
samāliṅgya sutānanye pitṝnbhrātṝnathā'pare /
tyaktuṃ na śekuḥ snehena tatraiva nidhanaṃ gatāḥ //
sandaṣṭadaśanāścānye samutpeturanekaśaḥ /
tataste'tīva ghūrṇantaḥ punaragnau prapedire //
dagdhapakṣākṣicaraṇā viceṣṭanto mahītale /
tatratatra sma dṛśyante vinaśyantaḥ śarīriṇaḥ //
jalāśayeṣu tapteṣu kvāthyamāneṣu vahninā /
gatasatvāḥ sma dṛśyante kūrmamatsyāḥ samantataḥ //
śarīrairapare dīptairdehavanta ivāgnayaḥ /
adṛśyanta vane tatra prāṇinaḥ prāṇisankṣaye //
kāṃścidutpatataḥ pārthaḥ śaraiḥ sañchidya khaṇḍaśaḥ /
pātayāmāsa vihagānpradīpte vasuretasi //
te śarācitasarvāṅgā ninadanto mahāravān /
ūrdhvamutpatya vegena nipetuḥ khāṇḍave punaḥ //
śarairabhyāhatānāṃ ca saṅghaśaḥ sma vanaukasām /
virāvaḥ śuśruve ghoraḥ samudrasyeva mathyataḥ //
vahneścāpi pradīptasya khamutpeturmahārciṣaḥ /
janayāmāsurudvegaṃ sumahāntaṃ divaukasām //
tenārciṣā susantaptā devāḥ sarṣipurogamāḥ / tato jagmurmahātmānaḥ sarva eva divaukasaḥ /
śatakratuṃ sahasrākṣaṃ deveśamasurārdanam //
devā ūcuḥ /
kiṃ nvime mānavāḥ sarve dahyante citrabhānunā /
kaccinna sankṣayaḥ prāpto lokānāmamareśvara //
vaiśampāyana uvāca /
tacchrutvā vṛtrahā tebhyaḥ svayamevānvavekṣya ca /
khāṇḍavasya vimokṣārthaṃ prayayau harivāhanaḥ //
mahatā rathabṛndena nānārūpeṇa vāsavaḥ /
ākāśaṃ samavākīrya pravavarṣa sureśvaraḥ //
tato'kṣamātrā vyasṛjandhārāḥ śatasahasraśaḥ /
coditā devarājena jaladāḥ khāṇḍavaṃ prati //
asamprāptāstu tā dhārāstejasā jātavedasaḥ /
kha eva samuśuṣyanta nakāścitpāvakaṃ gatāḥ //
tato namucihā kruddho bhṛśamarciṣmatastadā /
punareva mahāmeghairambhāṃsi vyasṛjadbahu //
arcirdhārābhisambaddhaṃ dhūmavidyutsamākulam /
babhūva tadvanaṃ ghoraṃ stanayitnusamākulam //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0