Mahabharata · Chapter 1.251

evamuktaḥ sa bhagavāndhūmaketurhutāśanaḥ /
cintayāmāsa varuṇaṃ lokapālaṃ didṛkṣayā //

ādityamudake devaṃ nivasantaṃ jaleśvaram /
sa ca taccintitaṃ jñātvā darśayāmāsa pāvakam //

tamabravīdbhamaketuḥ pratigṛhya jaleśvaram /
caturthaṃ lokapālānāṃ devadevaṃ sanātanam //

somena rājñā yaddattaṃ dhanuścaiveṣudhī ca te /
tatprayacchobhayaṃ śīghraṃ rathaṃ ca kapilakṣaṇam //

kāryaṃ ca sumahatpārtho gāṇḍīvena kariṣyati /
cakreṇa vāsudevaśca tanmamādya pradīyatām //

dadānītyeva varuṇaḥ pāvakaṃ pratyabhāṣata /
tadadbhutaṃ mahāvīryaṃ yaśaḥkīrtivivardhanam //

sarvaśastrairanādhṛṣyaṃ sarvaśastrapramāthi ca /
sarvāyudhamahāmātraṃ parasainyapradharṣaṇam //

ekaṃ śatasahasreṇa sammitaṃ rāṣṭravardhanam /
citramuccāvacairvarṇaiḥ śobhitaṃ ślakṣṇamavraṇam //

devadānavagandharvaiḥ pūjitaṃ śāśvatīḥ samāḥ /
prādāccaiva dhanūratnamakṣayyau ca maheṣudhī //

rathaṃ ca divyāśvayujaṃ kapipravaraketanam /
upetaṃ rājatairaśvairgāndharvairhemamālibhiḥ //

pāṇḍurābhrapratīkāśairmanovāyusamairjave /
sarvopakaraṇairyuktamajayyaṃ devadānavaiḥ //

bhāvumantaṃ mahāghoṣaṃ sarvaratnamanoramam /
sasarja yaṃ sutapasā bhaumano bhuvanaprabhuḥ //

prajāpatiranirdeśyaṃ yasya rūpaṃ raveriva /
yaṃ sma somaḥ samāruhya dānavānajayatprabhuḥ //

navameghapratīkāśaṃ jlalantamiva ca śriyā /
āśritau taṃ rathaśreṣṭhaṃ śakrāyudhasamāvubhau //

tāpanīyā surucirā dhvajayaṣṭiranuttamā /
tasyāṃ tu vānaro divyaḥ siṃhaśārdūlaketanaḥ //

hanūmānnāma tejasvī kāmarūpī mahābalaḥ / didhakṣanniva tatra sma saṃsthito mūrdhnyaśobhata /
dhvaje bhūtāni tatrāsanvividhāni mahānti ca //

nādena ripusainyānāṃ yeṣāṃ sañjñā praṇaśyati /
sa taṃ nānāpatākābhiḥ śobhitaṃ rathasattamam //

pradakṣiṇamupāvṛtya daivatebhyaḥ praṇamya ca /
sannaddhaḥ kavacī khaḍgī baddhagodhāṅgulitrakaḥ //

āruroha tadā pārtho vimānaṃ sukṛtī yathā /
tacca divyaṃ dhanuḥ śreṣṭhaṃ brahmaṇā nirmitaṃ purā //

gāṇḍīvamupasangṛhya babhūva mudito'rjunaḥ /
hutāśanaṃ puraskṛtya tatastadapi vīryavān //

jagrāha balamāsthāya jyayā ca yuyuje dhanuḥ /
maurvyāṃ tu yojyamānāyāṃ balinā pāṇḍavena ha //

ye'śṛṣvankūjitaṃ yatra teṣāṃ vai vyathitaṃ manaḥ /
labdhvā rathaṃ dhanuścaiva tathā'kṣayye maheṣudhī //

babhūva kalyaḥ kaunteyaḥ prahṛṣṭaḥ sāhyakarmaṇi /
vajranābhaṃ tataścakraṃ dadau kṛṣṇāya pāvakaḥ //

āgneyamastraṃ dayitaṃ sa ca kalyo'bhavattadā /
abravītpāvakaścaivametena madhusūdana //

amānuṣānapi raṇe jeṣyasi tvamasaṃśayam /
anena tu manuṣyāṇāṃ devānāmapi cāhave //

rakṣaḥpiśācadaityānāṃ nāgānāṃ cādhikastathā /
bhaviṣyasi na sandehaḥ pravaro'pi nibarhaṇe //

kṣiptaṃ kṣiptaṃ raṇe caitattvayā mādhava śatruṣu /
hatvā'pratihataṃ saṅkhye pāṇimeṣyati te punaḥ //
vaiśampāyana uvāca /

varuṇaśca dadau tasmai gadāmaśaniniḥsvanām /
daityāntakaraṇīṃ ghorāṃ nāmnā kaumodakīṃ prabhuḥ //

tataḥ pāvakamabrūtāṃ prahṛṣṭāvarjunācyutau /
kṛtāstrau śastrasampannau rathinau dhvajināvapi //

kalyau svo bhagavanyoddhumapi sarvaiḥ surāsuraiḥ /
kiṃ punarvajriṇaikena pannagārthe yuyutsatā //
arjuna uvāca /

cakrapāṇirhṛṣīkeśo vicaranyudhi vīryavān / cakreṇa bhasmasātsarvaṃ visṛṣṭena tu vīryavān /
triṣu lokeṣu tannāsti yanna kuryājjanārdanaḥ //

gāṇḍīvaṃ dhanurādāya tathā'kṣayye maheṣudhī /
ahamapyutsahe lokānvijetuṃ yudhi pāvaka //

sarvataḥ parivāryaivaṃ dāvametaṃ mahāprabho /
kāmaṃ samprajvalādyaiva kalyau svaḥ sāhyakarmaṇi //

yadi khāṇḍavameṣyati pramādā- tsagaṇo vā parirakṣituṃ mahendraḥ /
śaratāḍitagātrakuṇḍalānāṃ kadanaṃ drakṣyati devavāhinīnām //
vaiśampāyana uvāca /

evamuktaḥ sa bhagavāndāśārheṇārjunena ca /
taijasaṃ rapamāsthāya dāvaṃ dagdhuṃ pracakrame //

sarvataḥ parivāryātha saptārcirjvalanastathā /
dadāha khāṇḍavaṃ dāvaṃ yugāntamiva darśayan //

pratigṛhya samāviśya tadvanaṃ bharatarṣabha /
meghastanitanirghoṣaḥ sarvabhūtānyakampayat //

dahyatastasya ca babhau rūpaṃ dāvasya bhārata /
meroriva nagendrasya kīrṇasyāṃśumatoṃśubhiḥ //