Mahabharata · Chapter 1.245

uktavanto yathāvīryamasakṛtsarvavṛṣṇayaḥ /
tato'bravīdvāsudevo vākyaṃ dharmārthasaṃyutam //

mayoktaṃ na śrutaṃ pūrvaṃ sahitaiḥ sarvayādavaiḥ / atikrāntamatikrāntaṃ na nivarteta karhicit /
śṛṇudhvaṃ sahitāḥ sarve mama vākyaṃ sahetukam //

nāvamānaṃ kulasyāsya guḍākeśaḥ prayuktavān /
sammāno'bhyadhikastena prayukto'yaṃ na saṃśayaḥ //

arthalubdhānna vaḥ pārtho manyate sātvatānsadā /
svayaṃvaramanādhṛṣyaṃ manyate cāpi pāṇḍavaḥ //

pradānamapi kanyāyāḥ paśuvatko nu manyate /
vikrayaṃ cāpyapatyasya kaḥ kuryātpuruṣo bhuvi //

etāndoṣāṃstu kaunteyo dṛṣṭavāniti me matiḥ / kṣatriyāṇāṃ tu vīryeṇa praśastaṃ haraṇaṃ balāt /
ataḥ prasahya hṛtavānkanyāṃ dharmeṇa pāṇḍavaḥ //

ucitaścaiva sambandhaḥ subhadrā ca śayasvinī /
eṣa cāpīdṛśaḥ pārthaḥ prasahya hṛtavānataḥ //

bharatasyānvaye jātaṃ śāntanośca yaśasvinaḥ /
kuntibhojātmājāputraṃ kā bubhūṣeta nārjunam //

na taṃ paśyāmi yaḥ pārthaṃ vijayeta raṇe balāt /
varjayitvā virūpākṣaṃ bhaganetraharaṃ haram //

api sarveṣu lokeṣu sendrarudreṣu māriṣa /
sa ca nāma rathastādṛṅmadīyāste ca vājinaḥ //

mama śastraṃ viśeṣeṇa tūṇau cākṣayasāyakau / yoddhā pārthaśca śīghrāstraḥ ko nu tena samo bhavet /
tamabhidrutya sāntvena parameṇa dhanañjayam //

nivartayata saṃhṛṣṭā mamaiṣā paramā matiḥ /
yadi nirjitya vaḥ pārtho balādgacchetsvakaṃ puraṃ //

praṇaśyedvo yaśaḥ sadyo na tu sāntve parājayaḥ / pitṛṣvasāyāḥ putro me sambandhaṃ nārhati dviṣām /
tacchrutvā vāsudevasya tathā kartuṃ janādhipa //

udyogaṃ kṛtavantaste bherīṃ sannādya yādavāḥ /
arjunastu tadā śrutvā bherīsannādanaṃ mahat //

kaunteyastvaramāṇastu subhadrāmabhyabhāṣata /
āyānti vṛṣṇayaḥ sarve sasuhṛjjanabāndhavāḥ //

tvadarthaṃ yoddhukāmāste madaraktāntalocanāḥ /
pramattānaśucīnmūḍhānsurāmattānnarādhamān //

vamanaṃ pānaśīlāṃstānkariṣyāmi śarottamaiḥ /
utāho vā madonmattānnayiṣyāmi yamakṣayam //

evamuktvā priyāṃ pārtho nyavartata mahābalaḥ /
nivartamānaṃ dṛṣṭvaiva subhadrā trastatāṃ gatā //

evaṃ mā vada pārtheti pādayoḥ patitā tadā /
subhadrā tu kalirjātā vṛṣṇīnāṃ nidhāya ca //

evaṃ bruvantaḥ paurāste hyapavādaratāḥ prabho / mama śokaṃ vardhayanti tasmānnāśaṃ na cintaye /
parivādabhayānmuktā tvatprasādādbhavāmyaham //
vaiśampāyana uvāca /

evamuktastataḥ pārthaḥ priyayā bhadrayā tadā /
gamanāya matiṃ cakre pārthaḥ satyaparākramaḥ //

stitapūrvaṃ tadā'bhāṣya pariṣvajya priyāṃ tadā /
utthāpya ca punaḥ pārtho yāhi yāhīti cābravīt //

tataḥ subhadrā tvaritā raśmīnsangṛhya pāṇinā /
codayāmāsa javanāñśīgramaśvānkṛtatvarā //

tatastu kṛtasannāhā vṛṣṇivīrāḥ samāhitāḥ /
pratyānayārthaṃ pārthasya javanaisturagottamaiḥ //

rājamārgamanuprāptā dṛṣṭvā pārthasya vikramam /
prāsādapaṅktistambheṣu vedikāsu dhvajeṣu ca //

arjunasya śarāndṛṣṭvā vismayaṃ paramaṃ gatāḥ /
keśavasya vacastathyaṃ manyamānāstu yādavāḥ //

atītya taṃ raivatakaṃ śrutvā tu vipṛthorvacaḥ /
arjunena kṛtaṃ śrutvā gantukāmāstu vṛṣṇayaḥ //

śrutvā dīrghaṃ gataṃ pārthaṃ nyavartanta mahārathāḥ /
purodyānamatikramya viśālaṃ ca girivrajam //

sānumujjayinīṃ caiva vanānyupavanāni ca /
puṇyeṣvānartarāṣṭreṣu vāpīpadmasarāṃsi ca //

prāpya dhenumatītīrthamaśvarodhasaraḥ prati /
prekṣāvartaṃ tataḥ śailamambudaṃ ca nagottamam //

ārācchṛṅgamathāsādya tīrṇaḥ karavatīṃ nadīm /
prāpya sālveyarāṣṭrāṇi niṣadhānapyatītya ca //

devāpṛthupuraṃ paśyan sarvataḥ susamāhitaḥ /
tamatītya mahābāhurdevāraṇyamapaśyata //

pūjayāmāsurāyāntaṃ devāraṇye maharṣayaḥ /
sa vanāni nadīḥ śailān giriprasravaṇāni ca //

atītya ca tadā pārthaḥ subhadrāsārathistadā /
kauravaṃ viṣayaṃ prāpya viśokaḥ samapadyata //

sodaryāṇāṃ mahābāhuḥ siṃhāśayamivāśayam /
dūrādupavanopetaṃ samantātsalilāvṛtam //

bhadrayā mudito jiṣṇurdadarśa vṛjinaṃ puram //