Mahabharata · Chapter 1.246

krośaṇātre purasyāsīdgoṣṭhaṃ pārthasya śobhanam /
tatrāpi yātvā bībhatsurniviṣṭo yadukanyayā //

tataḥ subhadrāṃ satkṛtya pārtho vacanamabravīt /
gopikānāṃ tu veṣeṇa gaccha tvaṃ vṛjinaṃ puram //

kāmavyāhāriṇī kṛṣṇā rocatāṃ te vaco mama /
dṛṣṭvā tu paruṣaṃ brūyātsaha tatra mayāgatām //

anyaveṣeṇa tu gatāṃ dṛṣṭvā sā tvāṃ priyaṃ vadet /
yattu sā prathamaṃ brūyānna tasyāsti nivartanam //

tasmānmānaṃ ca darpaṃ ca vyapanīya svayaṃ vraja /
tasya tadvacanaṃ śrutvā subhadrā pratyabhāṣata //

evametatkariṣyāmi yathā tvaṃ pārtha bhāṣase /
subhadrāvacanaṃ śrutvā suprītaḥ pākaśāsaniḥ //

gopālānsa samānīya tvarito vākyamabravīt /
tarumyaḥ santi yāvantyastāḥ sarvā vrajayoṣitaḥ //

āgacchantu gamiṣyantyā bhadrayā saha saṅgatāḥ /
indraprasthaṃ puravaraṃ kṛṣṇāṃ draṣṭuṃ yaśasvinīm //

etacchrutvā tu gopālairānītā vrajayoṣitaḥ / tatastābhiḥ parivṛtāṃ vrajastrībhiḥ samantataḥ //

subhadrāṃ tvaramāṇaśca raktakauśeyavāsinīm /
pārthaḥ prasthāpayāmāsa kṛtvā gopālikāvapuḥ //

sā'dhikaṃ tena rūpeṇa śobhamānā yaśasvinī /
gopālikāmadhyagatā prayayau vṛjinaṃ puram //

tvaritā khāṇḍavaprasthamāsasāda viveśa ca / bhavanaṃ śreṣṭhamāsādya vīrapatnī varāṅganā //

vavande pṛthutāmrākṣī pṛthāṃ bhadrā pitṛṣvasām /
tāṃ kuntī cārusarvāṅgīmupājighrata mūrdhani //

prītyā paramayā yuktā āśīrbhiryuñjatā'tulām /
tato'bhigamya tvaritā pūrṇendusadṛśānanā //

vavande draupadīṃ bhadrā preṣyā'hamiti cābravīt /
pratyutthāya tadā kṛṣṇā svasāraṃ mādhavasya ca //

pariṣvajyāvadatprītyā niḥsapatnostu te patiḥ /
vīrasūrbhava bhadre tvaṃ bhava bhartṛpriyā tathā //

ojasā nirmitā bahvīruvāca paramāśiṣaḥ / tathaiva muditā bhadrā tāmuvāca tathāstviti //

tataḥ subhadrāṃ vārṣṇeyī pariṣvajya śubhānanām /
aṅke niveśya muditā vasudevaṃ praśasya ca //

tataḥ kilakilāśabdaḥ kṣaṇena samapadyata /
harṣādānartayodhānāmāsādya vṛjinaṃ puram //

devaputraprakāśāste jāmbūnadamayadhvajāḥ /
pṛṣṭhato'nuyayuḥ pārthaṃ puruhūtamivāmarāḥ //

gobhiruṣṭraiḥ sadaśvaiśca yuktāni bahulā janāḥ /
dadṛśuryānamukhyāni dāśārhapuravāsinām //

tataḥ puravare yūnāṃ puṃsāṃ vāca udīritāḥ /
arjune pratiyāti sma aśrūyanta samantataḥ //

pravāsādāgataṃ pārthaṃ dṛṣṭvā svamiva bāndhavam / so'bhigamya naraśreṣṭho dāśārhaśatasaṃvṛtaḥ /

pauraiḥ puravaraṃ prītyā parayā cābhinanditaḥ /
prāpya cāntaḥpuradvāramavaruhya nararṣabhaḥ //

vavande dhaumyamāsādya mātaraṃ ca dhanañjayaḥ /
spṛṣṭvā ca caraṇau rājño bhīmasya ca dhanañjayaḥ //

yamābhyāṃ vandito hṛṣṭaḥ sasvaje tau nananda ca /
brāhmaṇapramukhānsarvānbhrātṛbhiḥ saha saṅgataḥ //

yathārhaṃ mānayāmāsa paurajānapadānapi /
tatrasthānyanuyātāni tīrthānyāyatanāni ca //

nivedayāmāsa tadā rājñe sarvaṃ svanuṣṭhitam /
bhrātṛbhyaścaiva sarvebhyaḥ kathayāmāsa bhārata //

śrutvā sarvaṃ mahāprājño dharmarājo yudhiṣṭhiraḥ /
purastādeva teṣāṃ tu pūjayāmāsa cārjunam //

pāṇḍavena yathārhaṃ tu pūjārheṇa supūjitaḥ /
nyaviśaccābhyanujñāto rājñā tuṣṭo yaśasvinā //

tāmadīnāṃ supūjārhāṃ subhadrāṃ prītivardhinīm /
sākṣācchriyamamanyanta pārthāḥ kṛṣṇasahodarām //

gurūṇāṃ śvaśurāṇāṃ ca devarāṇāṃ tathaiva ca / subhadrā svena vṛttena babhūva paramapriyā //

tataste hṛṣṭamanasaḥ pāṇḍaveyā mahārathāḥ /
kuntī ca paramaprītā kṛṣṇā ca satataṃ tathā //