Mahabharata · Chapter 1.238

so'parānteṣu tīrthāni puṇyānyāyatanāni ca /
sarvāṇyevānupūrvyeṇa jagāmāmitavikramaḥ //

samudre paścime yāni tīrthānyāyatanāni ca /
tāni sarvāṇi gatvā sa prabhāsamupajagmivān //

cintayāmāsa rātrau tu gadena kathitaṃ purā /
subhadrāyāśca mādhuryarūpasampadguṇāni ca //

prāptumaṃ tāṃ cintayāmāsa ko'tropāyo bhavediti /
veṣavaikṛtyamāpannaḥ parivrājakarūpadhṛt //

kukurāndhakavṛṣṇīnāmajñāto veṣadhāraṇāt /
bhramamāṇaścaranbhaikṣaṃ parivrājakaveṣavān //

yenakenāpyupāyena praviśya ca gṛhaṃ mahat /
dṛṣṭvā subhadrāṃ kṛṣṇasya bhaginīmekasundarīm //

vāsudevamataṃ jñātvā kariṣyāmi hitaṃ śubham /
evaṃ viniścayaṃ kṛtvā dīkṣito vai tadā'bhavat //

tridaṇḍī muṇḍitaḥ kuṇḍī akṣamālāṅgulīyakaḥ /
yogabhāraṃ vahanpārtho vaṭavṛkṣasya koṭaram //

praviśaṃścaiva bībhatsurvṛṣṭiṃ varṣati vāsave /
cintayāmāsa deveśaṃ keśavaṃ kleśanāśanam //

keśavaścintitaṃ jñātvā divyajñānena dṛṣṭavān /
śayānaḥ śayane divye satyabhāmāsahāyavān //

keśavaḥ sahasā rājañjahāya ca nananda ca /
punaḥ punaḥ satyabhāmā cābravītpuruṣottamam //

bhagavaṃścintayāviṣṭaḥ śayane śayitaḥ sukham /
bhavānbahuprakāreṇa jahāsa ca punaḥ punaḥ //

śrotavyaṃ yadi vā kṛṣṇa prasādo yadi te mayi /
vaktumarhasi deveśa tacchrotuṃ kāmayāmyaham //
śrībhagavānuvāca /

pitṛṣvasuryaḥ putro me bhīmasenānujo'rjunaḥ /
tīrthayātrāṃ gataḥ pārthaḥ kāraṇātsamayāttadā //

tīrthayātrāsamāptau tu nivṛtto niśi bhārataḥ /
subhadhrāṃ cintayāmāsa rūpeṇāpratimāṃ bhuvi //

cintayenneva tāṃ bhadrāṃ yatirūpadharo'rjunaḥ /
yatirūpapraticchanno dvārakāṃ prāpya mādhavīm //

yenakenāpyupāyena dṛṣṭvā tu varavarṇinīm /
vāsudevamataṃ jñātvā prayatiṣye manoratham //

evaṃ vyavasitaḥ pārtho yatiliṅgena pāṇḍavaḥ /
chāyāyāṃ vaṭavṛkṣasya vṛṣṭiṃ varṣati vāsave //

yogabhāraṃ vahanneva mānasaṃ duḥkhamāptavān /
etadarthaṃ vijānīhi hasantaṃ māṃ mudā priye //

bhrātaraṃ tava paśyeti satyabhāmāṃ vyasarjayat / tata utthāya śayanātprasthito madhusūdanaḥ //

prabhāsadeśaṃ samprāptaṃ bībhatsumaparājitam /
tīrthānyanucarantaṃ taṃ śuśrāva madhusūdanaḥ //

cārāṇāṃ caiva vacanādekākī sa janārdanaḥ /
tatrābhyagacchatkaunteyaṃ mahātmātaṃ sa mādhavaḥ //

dadṛśāte tadānyonyaṃ prabhāse kṛṣṇapāṇḍavau //

tāvanyonyaṃ samāśliṣya pṛṣṭvā ca kuśalaṃ vane /
āstāṃ priyasakhāyau tau naranārāyaṇāvṛṣī //

tato'rjunaṃ vāsudevastāṃ caryāṃ paryapṛcchata /
kimarthaṃ pāṇḍavaitāni tīrthānyanucarasyuta //

tato'rjano yathāvṛttaṃ sarvamākhyātavāṃstadā /
śrutvovāca ca vārṣṇeya evametaditi prabhuḥ //

tau vihṛtya yathākāmaṃ prabhāse kṛṣṇapāṇḍavau /
mahīdharaṃ raivatakaṃ vāsāyaivābhijagmatuḥ //

pūrvameva tu kṛṣṇasya vacanāttaṃ mahīdharam /
puruṣā maṇḍayāñcakrurupajahraśca bhojanam //

pratigṛhyārjunaḥ sarvamupabhujya ca pāṇḍavaḥ /
sahaiva vāsudevena dṛṣṭavānnaṭanartakān //

abhyanujñāya tānsarvānarcayitvā ca pāṇḍavaḥ /
satkṛtaṃ śanaṃ divyamabhyagacchanmahāmatiḥ //

tatastatra mahābāhuḥ śayānaḥ śayane śubhe / tīrthānāṃ palvalānāṃ ca parvatānāṃ ca darśanam /
āpagānāṃ vanānāṃ ca kathayāmāsa sātvate //

evaṃ sa kathayanneva nidrayā janamejaya /
kaunteyo'pi hṛtastasmiñśayane svargasannibhe //

madhureṇaiva gītena vīṇāśabdena caiva ha /
prabodhyamāno bubudhe stutibhirmaṅgalaistatā //

sa kṛtvā'vaśyakāryāṇi vārṣṇeyenābhinanditaḥ /
vārṣṇeyaṃ samanujñāpya tatra vāsamarocayat //

tathetyuktvā vāsudevo bhojanaṃ vai śaśāsa ha / yatirūpadharaṃ pārthaṃ visṛjya sahasā hariḥ /
rathena kāñcanāṅgena dvārakāmabhijagmivān //

alaṅkṛtā dvārakā tu babhūva janamejaya //

didṛkṣantaśca govindaṃ dvārakāvāsino janāḥ /
narendramārgamājagmustūrṇaṃ śatasahasraśaḥ //

kṣaṇārdhamapi vārṣṇeyā govindavirahākṣamāḥ / kautūhalasamāviṣṭā bhṛśamutprekṣya saṃsthitāḥ //

avalokeṣu nārīṇāṃ sahasrāṇi śatāni ca /
bhojavṛṣṇyandhakānāṃ ca samavāyo mahānabhūt //

sa tathā satkṛtaḥ sarvairbhojavṛṣṇyandhakātmajaiḥ /
abhivādyābhivādyāṃśca sarvaiśca pratinanditaḥ //

kumāraiḥ sarvaśo vīraḥ satkāreṇābhicoditaḥ /
samānavayasaḥ sarvānāśliṣya sa punaḥpunaḥ //

kṛṣṇaḥ svabhavanaṃ ramyaṃ praviveśa mahābalaḥ /
prabhāsādāgataṃ devyaḥ sarvāḥ kṛṣṇamapūjayan //