Mahabharata · Chapter 1.226

evametanmahāprājña yathāttha vidurādya mām /
mamāpi paramo harṣaḥ sambandhe'sminkṛte prabho //

gamanaṃ cāpi yuktaṃ syāddṛḍhameṣāṃ mahātmanām /
na tu tāvanmayā yuktametadvaktuṃ svayaṃ girā //

yadā tu manyate vīraḥ kuntīputro yudhiṣṭhiraḥ /
bhīmasenārjunau caiva yamau ca puruṣarṣabhau //

rāmakṛṣṇau ca dharmajñau tadā gacchantu pāṇḍavāḥ /
etau hi puruṣavyāghrāveṣāṃ priyahite ratau //
yudhiṣṭhira uvāca /

paravanto vayaṃ rājaṃstvayi sarve sahānugāḥ /
yathā vakṣyasi naḥ prītyā tatkariṣyāmahe vayam //
vaiśampāyana uvāca /

tato'bravīdvāsudevo gamanaṃ rocate mama /
yathā vā manyate rājā drupadaḥ sarvadharmavit //
drupada uvāca /

yathaiva manyate vīro dāśārhaḥ puruṣottamaḥ /
prāptakālaṃ mahābāhuḥ sā buddhirniścitā mama //

yathaiva hi mahābhāgāḥ kaunteyā mama sāmpratam /
tathaiva vāsudevasya pāṇḍuputrā na saṃśayaḥ //

na taddhyāyati kaunteyaḥ pāṇḍuputro yudhiṣṭhiraḥ /
yathaiṣāṃ puruṣavyāghraḥ śreyo dhyāyati keśavaḥ //
vaiśampāyana uvāca /

pṛthāyāstu tato veśma praviveśa mahāmatiḥ /
pādau spṛṣṭvā pṛthāyāstu śirasā ca mahīṃ gataḥ //

dṛṣṭvā tu devaraṃ kuntī śuśoca ca muhurmuhuḥ /
kuntyuvāca /
vaicitravīrya te putrāḥ kathañcijjīvitāstvayā //

tvatprasādājjatugṛhe mṛtāḥ pratyāgatāstathā /
kūrmī cintayate putrānyatra vā tatra sammatā //

cintayā vardhitāḥ putrā yathā kuśalinastathā /
tava putrāstu jīvanti tvadbhaktyā bharatarṣabha //

yathā parabhṛtaḥ putrānariṣṭā vardhayetsadā /
tathaiva putrāstu mama tvayā tāta surakṣitāḥ //

kleśāstu bahavaḥ prāptāstathā prāṇāntikā mayā /
ataḥ paraṃ na jānāmi kartavyaṃ jñātumarhasi //
vidura uvāca /

na vinaśyanti lokeṣu tava putrā mahābalāḥ /
acireṇaiva kālena svarājyasthā bhavanti te //

bāndhavaiḥ sahitāḥ sarve na śokaṃ kuru mādhavi /
vaiśampāyana uvāca /
tataste samanujñātā drupadena mahātmanā //

pāṇḍavāścaiva kṛṣṇaśca viduraśca mahāmatiḥ /
ādāya draupadīṃ kṛṣṇāṃ kuntīṃ caiva yaśasvinīm //

savihāraṃ sukhaṃ jagmurnagaraṃ nāgasāhvayam /
suvarṇakakṣyāgraiveyānsuvarṇāṅkuśabhūṣitān //

jāmbūnadapariṣkārānprabhinnakaraṭāmukhān /
adhiṣṭhitānmahāmātraiḥ sarvaśastrasamanvitān //

sahasraṃ pradadau rājā gajānāṃ varavarmiṇām /
rathānāṃ ca sahasraṃ vai suvarṇamaṇicitritam //

caturyujāṃ bhānumacca pañcānāṃ pradadau tadā /
suvarṇaparibarhāṇāṃ varacāmaramālinām //

jātyaśvānāṃ ca pañcāśatsahasraṃ pradadau nṛpaḥ / dāsīnāmayutaṃ rājā pradadau varabhūṣaṇam /
tataḥ sahasraṃ dāsānāṃ pradadau varadhanvanām //

haimāni śayyāsanabājanāni dravyāṇi cānyāni ca godhanāni /
pṛthakpṛthakvaiva dadau sa koṭiṃ pāñcālarājaḥ paramaprahṛṣṭaḥ //

śibikānāṃ śataṃ pūrṇaṃ vāhānpañcaśataṃ narān //

evametāni pāñcālo janyārthe pradadau dhanam /
haraṇaṃ cāpi pāñcālyā jñātideyaṃ ca somakaḥ //

dhṛṣṭadyumno yayau tatra bhaginīṃ gṛhya bhārata / nānadyamāno bahuśastūryaghoṣaiḥ sahasraśaḥ //

śrutvā copasthitānvīrāndhṛtarāṣṭro'mbikāsutaḥ /
pratigrahāya pāṇḍūnāṃ preṣayāmāsa kauravān //

vikarṇaṃ ca maheṣvāsaṃ citrasenaṃ ca bhārata /
droṇaṃ ca parameṣvāsaṃ gautamaṃ kṛpameva ca //

taistaiḥ parivṛtāḥ śūraiḥ śobhamānā mahārathāḥ /
nagaraṃ hāstinapuraṃ śanaiḥ praviviśustadā //

pāṇḍavānāgatāñchrutvā nāgarāstu kutūhalāt /
maṇḍayāñcakrire tatra nagaraṃ nāgasāhvayam //

muktapuṣpāvakīrṇaṃ tu jalasiktaṃ tu sarvataḥ /
dhūpitaṃ divyadhūpena maṅgalaiścābhisaṃvṛtam //

patākocchritamālyaṃ ca puramapratimaṃ babhau / śaṅkhabherīninādaiśca nānāvāditranisvanaiḥ //

kautūhalena nagaraṃ pūryamāṇamivābhavat /
yatra te puruṣavyāghrāḥ śokaduḥkhasamanvitāḥ //

nirgatāśca purātpūrvaṃ dhṛtarāṣṭraprabādhitāḥ /
punarnivṛttā diṣṭyā vai saha mātrā parantapāḥ //

ityevamīritā vāco janaiḥ priyacikīrṣubhiḥ / tata uccāvacā vācaḥ priyāḥ sarvatra bhārata //

udīritāstadā'śṛṇvanpāṇḍavā hṛdayangamāḥ /
paurā ūcuḥ
ayaṃ sa puruṣavyāghraḥ punarāyāti dharmavit //

yo naḥ svāniva dāyādāndharmeṇa parirakṣati /
adya pāṇḍurmahārājo vanādiva manaḥpriyam //

āgataścaivamasmākaṃ cikīrṣannātra saṃśayaḥ /
kiṃ nvadya sukṛtaṃ karma sarveṣāṃ naḥ priyaṃ param //

yannaḥ kuntīsutā vīrā bhartāraḥ punarāgatāḥ / yadi dattaṃ yadi hutaṃ yadi vāpyasti nastapaḥ /
tena tiṣṭhantu nagare pāṇḍavāḥ śaradāṃ śatam //

tataste dhṛtarāṣṭrasya bhīṣmasya ca mahātmanaḥ /
anyeṣāṃ ca tadarhāṇāṃ cakruḥ pādābhivandanam //

pṛṣṭāstu kuśalapraśnaṃ sarveṇa nagareṇa te /
samāviśanta veśmāni dhṛtarāṣṭrasya śāsanāt //