Mahabharata · Chapter 1.224

rājanniḥsaṃśayaṃ śreyo vācyastvamasi bāndhavaiḥ /
na tvaśuśrūṣamāṇe vai vākyaṃ samprati tiṣṭhati //

priyaṃ hitaṃ ca tadvākyamuktavānkurusattamaḥ /
bhīṣmaḥ śāntanavo rājanpratigṛhṇāsi tanna ca //

tathā droṇena bahudhā bhāṣitaṃ hitamuttamam /
tacca rādhāsutaḥ karṇo manyate na hitaṃ tava //

cintayaṃśca na paśyāmi rājaṃstava suhṛttamam /
ābhyāṃ puruṣasiṃhābhyāṃ yo vā syātprajñayādhikaḥ //

imau hi vṛddhau vayasā prajñayā ca śrutena ca /
samau ca tvayi rājentra tathā pāṇḍusuteṣu ca //

dharme cānavarau rājansatyatāyāṃ ca bhārata /
rāmāddāśaratheścaiva gayāccaiva na saṃśayaḥ //

na coktavantāvaśreyaḥ purastādapi kiñcana /
na cāpyapakṛtaṃ kiñcidanayorlakṣyate tvayi //

tāvubhau puruṣavyāghrāvanāgasi nṛpe tvayi /
na mantrayetāṃ tvacchreyaḥ kathaṃ satyaparākramau //

prajñāvantau naraśreṣṭhāvasmim̐lloke narādhipa /
tvannimittamato nemau kiñcijjihmaṃ vadiṣyataḥ //

iti me naiṣṭhikī buddhirvartate kurunandana /
na cārthahetordharmajñau vakṣyataḥ pakṣasaṃśritam //

etaddhi paramaṃ śreyo manye'haṃ tava bhārata /
duryodhanaprabhṛtayaḥ putrā rājanyathā tava //

tathaiva pāṇḍaveyāste putrā rājanna saṃśayaḥ /
teṣu cedahitaṃ kiñcinmantrayeyuratadvidaḥ //

mantriṇaste na ca śreyaḥ prapaśyanti viśeṣataḥ / atha te hṛdaye rājanviśeṣaḥ sveṣu vartate /
antarasthaṃ vivṛṇvānāḥ śreyaḥ kuryurna te dhruvam //

etadarthamimau rājanmahātmānau mahādyutī /
nocaturvivṛtaṃ kiñcinna hyeṣa tava niścayaḥ //

yaccāpyaśakyatāṃ teṣāmāhatuḥ puruṣarṣabhau /
tattathā puruṣavyāghra tava tadbhadramastu te //

kathaṃ hi pāṇḍavaḥ śrīmānsavyasācī dhanañjayaḥ /
śakyo vijetuṃ sangrāme rājanmaghavatāpi hi //

bhīmaseno mahābāhurnāgāyutabalo mahān /
rākṣasānāṃ bhayakaro bāhuśālī mahābalaḥ //

hiḍimbo nihato yena bāhuyuddhena bhārata /
yo rāvaṇasamo yuddhe tathā ca bakarākṣasaḥ //

sa yudhyamāno rājendra bhīmo bhīmaparākramaḥ / kathaṃ sma yudhi śakyeta vijetumamarairapi //

tathaiva kṛtinau yuddhe yamau yamasutāviva /
kathaṃ vijetuṃ śakyau tau raṇe jīvitumicchatā //

yasmindhṛtiranukrośaḥ kṣamā satyaṃ parākramaḥ /
nityāni pāṇḍave jyeṣṭhe sa jīyeta raṇe katham //

yeṣāṃ pakṣadharo rāmo yeṣāṃ mantrī janārdanaḥ /
kiṃ nu tairajitaṃ saṅkhye yeṣāṃ pakṣe ca sātyakiḥ //

drupadaḥ śvaśuro yeṣāṃ yeṣāṃ syālāśca pārṣatāḥ /
dhṛṣṭadyumnamukhā vīrā bhrātaro drupadātmajāḥ //

caidyaśca yeṣāṃ bhrātā ca śiśupālo mahārathaḥ / so'śakyatāṃ ca vijñāya teṣāmagre ca bhārata /
dāyādyatāṃ ca dharmeṇa samyakteṣu samācara //

idaṃ nirdiṣṭamayaśaḥ purocanakṛtaṃ mahat /
teṣāmanugraheṇādya rājanprakṣālayātmanaḥ //

teṣāmanugrahaścāyaṃ sarveṣāṃ caiva naḥ kule /
jīvitaṃ ca paraṃ śreyaḥ kṣatrasya ca vivardhanam //

drupado'pi mahānrājā kṛtavairaśca naḥ purā /
tasya sangrahaṇaṃ rājansvapakṣasya vivardhanam //

balavantaśca dāśārhā bahavaśca viśāmpate /
yataḥ kṛṣṇastataḥ sarve yataḥ kṛṣṇastato jayaḥ //

yacca sāmnaiva śakyeta kāryaṃ sādhayituṃ nṛpa /
ko daivaśaptastatkāryaṃ vigraheṇa samācaret //

śrutvā ca jīvataḥ pārthānpaurajānapadā janāḥ /
balavaddarśane hṛṣṭāsteṣāṃ rājanpriyaṃ kuru //

duryodhanaśca karṇaśca śakuniścāpi saubalaḥ /
adharmayuktā duṣprajñā bālā maiṣāṃ vacaḥ kṛthāḥ //

uktametatpurā rājanmayā guṇavatastava /
duryodhanāparādhena prajeyaṃ vai vinaṅkṣyati //