Mahabharata · Chapter 1.223

mantrāya samupānītairdhṛtarāṣṭra hitairnṛpa /
dharmyamarthyaṃ yaśasyaṃ ca vācyamityanuśuśruma //

mamāpyeṣā matistāta yā bhīṣmasya mahātmanaḥ /
saṃvibhajyāstu kaunteyā dharma eṣa sanātanaḥ //

preṣyatāṃ drupadāyāśu naṟaḥ kaścitpriyaṃvadaḥ /
bahulaṃ ratnamādāya teṣāmarthāya bhārata //

mithaḥ kṛtyaṃ ca tasmai sa ādāya vasu gacchatu /
vṛddhiṃ ca paramāṃ brūyāttatsaṃyogodbhavāṃ tathā //

samprīyamāṇaṃ tvāṃ brūyādrājanduryodhanaṃ tathā /
asakṛddrupade caiva dhṛṣṭadyumne ca bhārata //

ucitatvaṃ priyatvaṃ ca yogasyāpi ca varṇayet /
punaḥpunaśca kaunyeyānmādrīputrau ca sāntvayan //

hiraṇmayāni śubhrāṇi bahūnyābharaṇāni ca /
vacanāttava rājendra draupadyāḥ samprayacchatu //

tathā drupadaputrāṇāṃ sarveṣāṃ bharatarṣabha /
pāṇḍavānāṃ ca sarveṣāṃ kuntyā yuktāni yāni ca //

dattvā tāni mahārhāṇi pāṇḍavānsampraharṣaya / evaṃ sāntvasamāyuktaṃ drupadaṃ pāṇḍavaiḥ saha /
uktvā so'nantaraṃ brūyātteṣāmāgamanaṃ prati //

anujñāteṣu vīreṣu balaṃ gacchatu śobhanam /
duḥśāsano vikarṇaścāpyānetuṃ pāṇḍavāniha //

tataste pāṇḍavāḥ śreṣṭhāḥ pūjyamānāḥ sadā tvayā /
prakṛtīnāmanumate pade sthāsyanti paitṛke //

etattava mahārāja teṣu putreṣu caiva hi /
vṛttamaupayikaṃ manye bhīṣmeṇa saha bhārata //
karṇa uvāca /

yojitāvarthamānābhyāṃ sarvakāryeṣvanantarau /
na mantrayetāṃ tvacchreyaḥ kimadbhutataraṃ tataḥ //

duṣṭena manasā yo vai pracchannenāntarātmanā /
brūyānni)śreyasaṃ nāma kathaṃ kuryātsatāṃ matam //

na mitrāṇyarthakṛcchreṣu śreyase cetarāya vā /
vidhipūrvaṃ hi sarvasya duḥkhaṃ vā yadi vā sukham //

kṛtaprajño'kṛtaprajño bālo vṛddhaśca mānavaḥ /
sasahāyo'sahāyaśca sarvaṃ sarvatra vindati //

śrūyate hi purā kaścidambuvīca itīśvaraḥ /
āsīdrājagṛhe rājā māgadhānāṃ mahīkṣitām //

sa hīnaḥ karaṇaiḥ sarvairucchvāsaparamo nṛpaḥ /
amātyasaṃsthaḥ sarveṣu kāryeṣvevābhavattadā //

tasyāmātyo mahākarṇirbabhūvaikeśvarastadā /
sa labdhabalamātmānaṃ manyamāno'vamanyate //

sa rājña upabhogyāni striyo ratnadhanāni ca /
ādade sarvaśo mūḍha aiśvaryaṃ ca svayaṃ tadā //

tadādāya ca lubdhasya lobhāllobho'bhyavardhata /
tathāhi sarvamādāya rājyamasya jihīrṣati //

hīnasya karaṇaiḥ sarvairacchvāsaparamasya ca /
yatamāno'pi tadrājyaṃ na śaśāketi naḥ śrutaṃ //

kimanyadvihitā nūnaṃ tasya sā puruṣendratā /
yadi te vihitaṃ rājyaṃ bhaviṣyati viśāmpate //

miṣataḥ sarvalokasya sthāsyate tvayi taddhuvam /
ato'nyathā cedvihitaṃ yatamāno na lapsyase //

evaṃ vidvannupādatsva mantriṇāṃ sādhvasādhutām /
duṣṭānāṃ caiva boddhavyamaduṣṭānāṃ ca bhāṣitam //
droṇa uvāca /

vidma te bhāvadoṣeṇa yadarthamidamucyate /
duṣṭa pāṇḍavahetostvaṃ doṣamākhyāpayasyuta //

hitaṃ tu paramaṃ karṇa bravīmi kulavardhanam /
atha tvaṃ manyase duṣṭaṃ bhūhi yatparamaṃ hitam //

ato'nyathā cetkriyate yadbravīmi paraṃ hitam /
kuravo vai vinaṅkṣyanti nacireṇaiva me matiḥ //