Mahabharata · Chapter 1.213

brūhi tatkāraṇaṃ yena brahmannālāyanī śubhā /
jātā mamādhvare kṛṣmā sarvavedavidāṃ vara //
vyāsa uvāca /

śṛṇu rājanyathā hyasyā datto rudreṇa vai varaḥ /
yadarthaṃ caiva sambhūtā tava gehe yaśasvinī //

hanta ta kathayiṣyāmi kṛṣmāyāḥ paurvadehikam /
indraseneti vikhyātā purā nālāyanī śubhā //

maudgalyasya patimāsādya cacāra vigatajvarā /
maudgalyasya maharṣeśca ramamāṇasya vai tayā //

saṃvatsaragaṇā rājanvyatīyuḥ kṣaṇavattadā /
tataḥ kadāciddharmātmā tṛptaḥ kāmairvyarajyata //

anvicchanparamaṃ dharmaṃ brahmayogaparo'bhavat / utsasarja sa tāṃ vipraḥ sā tadā cāpatadbhuvi /
maudgalyo rājaśārdūla tapobhirbhāvitaḥ sadā //
nālāyanyuvāca /

prasīda bhagavanmahyaṃ na māmutsraṣṭumarhasi /
avitṛptāsmi brahmarṣe kāmānāṃ kāmasevanāt //
maudgalya uvāca /

yasmāttvaṃ māmaniḥśaṅkā hyavaktavyaṃ bhāṣase /
ācarantī tapovighnaṃ tasmācchṛṇu vaco mama //

bhaviṣyasi nṛloke tvaṃ rājaputrī yaśasvi /
pāñcālarājasya sutā drupadasya mahātmanaḥ //

bhavitārastatra tava patayaḥ pañca viplutāḥ /
taiḥ sārdhaṃ madhurākāraiściraṃ ratimavāpsyasi //
vaiśampāyana uvāca /

saivaṃ śaptā tu vimanā vanaṃ prāgādyaśasvinī /
bhogairatṛptā deveśaṃ tapasā'rādhayattadā //

nirāśīrmārutāhārā nirāhārā tathaiva ca /
anuvartamānā tvādityaṃ tathā pañcatapābhavat //

tīvreṇa tapasā tasyāstuṣṭaḥ paśupatiḥ svayam /
vacaṃ prādāttadā rudraḥ sarvalokeśvaraḥ prabhuḥ //

bhaviṣyati paraṃ janma bhaviṣyati varāṅganā /
bhaviṣyanti paraṃ bhadre patayaḥ pañca viśrutāḥ //

mahendravapuṣaḥ sarve mahendrasamavikramāḥ /
tatrasthā ca mahatkarma surāṇāṃ tvaṃ kariṣyasi //
stryuvāca /

ekaḥ khalu mayā bhartā vṛtaḥ pañca tvime katham /
eko bhavati naikasyā bahavastadbravīhi me //
maheśvara uvāca /

pañcakṛtvastvayā coktaḥ patiṃ dehītyahaṃ punaḥ /
pañcate patayo bhadre bhaviṣyanti sukhāvahāḥ //
stryuvāca /

dharma ekaḥ patiḥ strīṇāṃ pūrvame prakalpitaḥ /
bahupatnīkatā puṃso dharmaśca bahubhiḥ kṛtaḥ //

strīdharmaḥ pūrvamevāyaṃ nirmito munibhiḥ sadā /
sahadharmacarī bharturekā ekasya cocyate //

eko hi bhartā nārīṇāṃ kaumāra iti laukikaḥ /
āpatsu ca niyogena bharturnāryāḥ paraḥ smṛtaḥ //

gaccheta na tṛtīyaṃ tu tasyā niṣkṛtirucyate /
caturthe patitā nārī pañcame vardhakī bhavet //

evaṃ gate dharmapathe na vṛṇe bahupuṃskatām /
alokācaritāttsamātkathaṃ mucyeya saṅkarāt //
maheśvara uvāca /

anāvṛtāḥ purā nāryo hyāsañśudhyanti cārtave /
sakṛduktaṃ tvayā naitannādharmaste bhaviṣyati //
stryuvāca /

yadi me patayaḥ pañca ratimicchāmi tairmithaḥ /
kaumāraṃ ca bhavetsarvaiḥ sangame sangame ca me //

patiśuśrūṣayā caiva siddhiḥ prāptā mayā purā /
bhogecchā ca mayā prāptā sa ca bhogaśca me bhavet //
rudra uvāca /

ratiśca bhadre siddhiśca na bhajete parasparam /
bhogānāpsyasi siddhiṃ ca yogena ca mahattvatām //

anyadehāntare caiva rūpabhāgyaguṇānvitā /
pañcabhiḥ prāpya kaumāraṃ mahābhāgā bhaviṣyasi //

gaccha gaṅgājalasthā ca naraṃ paśyasi yaṃ śubhe /
tamānaya mamābhyāśaṃ surarājaṃ śucismite //

ityuktā viśvarūpeṇa rudraṃ kṛtvā pradakṣiṇam /
jagāma gaṅgāmuddiśya puṇyāṃ tripathagāṃ nadīm //