Mahabharata · Chapter 1.207
dhṛṣṭadyumanastu pāñcālyaḥ pṛṣṭhataḥ kurunandanau /
anvagacchattadā yāntau bhārgavasya niveśane //
sojñāyamānaḥ puruṣānavadhāya samantataḥ /
svayamārānnilīno'bhūdbhārgavasya niveśane //
sāyaṃ ca bhīmastu ripupramāthī jiṣṇuryamau cāpi mahānubhāvau /
bhaikṣaṃ caritvā tu yudhiṣṭhirāya nivedayāñcakruradīnasatvāḥ //
tatastu kuntī drupadātmajāṃ tā- muvāca kāle vacanaṃ vadānyā /
tato'gramādāya kuruṣva bhadre baliṃ ca viprāya ca dehi bhikṣām //
ye cānnamicchanti dadasva tebhyaḥ pariśritā ye parito manuṣyāḥ /
tataśca śeṣaṃ pravibhajya śīghra- mardhaṃ caturṇāṃ mama cātmanaśca //
ardhaṃ tu bhīmāya ca dehi bhadre ya eṣa nāgarṣabhatulyarūpaḥ /
gauro yuvā saṃhananopapanna eṣo hi vīro bahubhuk sadaiva //
sā hṛṣṭarūpaiva tu rājaputrī tasyā vacaḥ sādhvaviśaṅkamānā /
yathāvaduktaṃ pracakāra sādhvī te cāpi sarve bubhujustadannam //
kuśaistu bhūmau śayanaṃ cakāra mādrīputraḥ sahadevastapasvī /
athātmakīyānyajināni sarve saṃstīrya vīrāḥ suṣupurdharaṇyām //
agastyakāntāmabhito diśaṃ tu śirāṃsi teṣāṃ kurusattamānām /
kuntī purastāttu babhūva teṣāṃ pādāntare cātha babhūva kṛṣṇā //
aśeta bhūmau saha pāṇḍuputraiḥ pādopadhānīva kṛtā kuśeṣu /
na tatra duḥkhaṃ manasāpi tasyā na cāvamene kurupuṅgavāṃstān //
te tatra śūrāḥ kathayāmbabhūvuḥ kathā vicitrāḥ pṛtanādhikārāḥ /
astrāṇi divyāni rathāṃśca nāgān khaḍgāngadāścāpi paraśvadhāṃśca //
teṣāṃ kathāstāḥ parikīrtyamānāḥ pāñcālarājasya sutastadānīm /
suśrāva kṛṣṇāṃ ca tadā niṣaṇṇāṃ te cāpi sarve dadṛśurmanuṣyāḥ //
dhṛṣṭadyumno rājaputrastu sarvaṃ vṛttaṃ teṣāṃ kathitaṃ caiva rātrau /
sarvaṃ rājñe drupadāyākhilena nivedayiṣyaṃstvarito jagāma //
pāñcālarājastu viṣaṇṇarūpa- stānpāṇḍavānaprativindamānaḥ /
dhṛṣṭadyumnaṃ paryapṛcchanmahātmā kva sā gatā kena nītā ca kṛṣṇā //
kaccinna śūdreṇa na hīnajena vaiśyena vā karadenopapannā /
kaccitpadaṃ mūrdhni na paṅkadigdhaṃ kaccinna mālā patitā śmaśāne //
kaccitsa varṇapravaro manuṣya udriktavarṇo'pyuta eva kaccit /
kaccinna vāmo mama mūrdhni pādaḥ kṛṣṇābhimarśena kṛto'dya putra //
kaccinna tapsye paramapratītaḥ saṃyujya pārthena nararṣabheṇa /
vadasva tattvena mahānubhāva ko'sau vijetā duhiturmamādya //
vicitravīryasya sutasya kacci- tkurupravīrasya dhriyanti putrāḥ /
kaccittu pārthena yavīyasā'dhya dhanurgṛhītaṃ nihataṃ ca lakṣyam //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0