Mahabharata · Chapter 1.206

gatvā tu tāṃ bhārgavakarmaśālāṃ pārthau pṛthāṃ prāpya mahānubhāvau /
tāṃ yājñasenīṃ paramapratītau bhikṣetyathāvedayatāṃ narāgryau //

kuṭīgatā sā tvanavekṣya putrau provāca bhuṅkteti sametya sarve /
paścācca kuntī prasamīkṣya kṛṣṇāṃ kaṣṭaṃ mayā bhāṣitamityuvāca //

sā'dharmabhītā paricintayantī tāṃ yājñasenīṃ paramapratītām /
pāṇau gṛhītvopajagāma kuntī yudhiṣṭhiraṃ vākyamuvāca cedam //
kuntyuvāca /

iyaṃ tu kanyā drupadasya rājña- stavānujābhyāṃ mayi sannisṛṣṭā /
yathocitaṃ putra mayā'pi coktaṃ sametya bhuṅkteti nṛpa pramādāt //

mayā kathaṃ nānṛtamuktamadya bhavetkurūṇāmṛṣabha bravīhi /
pañcālarājasya sutāmadharmo na copavarteta na vibhramecca //
vaiśampāyana uvāca /

sa evamukto matimānnṛvīro mātrā muhūrtaṃ tu vicintya rājā /
kuntīṃ samāśvāsya kurupravīro dhanañjayaṃ vākyamidaṃ babhāṣe //

tvayā jitā phālguna yājñasenī tvayaiva śobhiṣyati rājaputrī /
prajvālyatāmagniramitrasāha gṛhāṇa pāṇiṃ vidhivattvamasyāḥ //
arjuna uvāca /

mā māṃ narendra tvamadharmabhājaṃ kṛthā na dharmo'yamaśiṣṭadṛṣṭaḥ /
bhavānniveśyaḥ prathamaṃ tato'yaṃ bhīmo mahābāhuracintyakarmā //

ahaṃ tato nakulo'nantaraṃ me paścādayaṃ sahadevastarasvī /
vṛkodaro'haṃ ca yamau ca rāja- nniyaṃ ca kanyā bhavato niyojyāḥ //

evaṃ gate yatkaraṇīyamatra dharmyaṃ yaśasyaṃ kuru tadvicintya /
pāñcālarājasya hitaṃ ca yatsyā- tpraśādhi sarve sma vaśe sthitāste //
vaiśampāyana uvāca /

jiṣṇorvacanamājñāya bhaktisnehasamanvitam /
dṛṣṭiṃ niveśayāmāsuḥ pāñcālyāṃ pāṇḍunandanāḥ //

dṛṣṭvā te tatra paśyantīṃ sarve kṛṣṇāṃ yaśasvinīm /
samprekṣyānyonyamāsīnā hṛdayaistāmadhārayan //

teṣāṃ tu draupadīṃ dṛṣṭvā sarveṣāmamitaujasām /
sampramathyendriyagrāmaṃ prādurāsīnmanobhavaḥ //

kāmyaṃ hi rūpaṃ pāñcālyā vidhātrā vihitaṃ svayam /
babhūvādhikamanyābhyaḥ sarvabhūtamanoharam //

teṣāmākārabhāvajñaḥ kuntīputro yudhiṣṭhiraḥ /
dvaipāyanavacaḥ kṛtsnaṃ sasmāra manujarṣabhaḥ //

abravītsahitānbhrātṝnmitho bhedabhayānnṛpaḥ /
sarveṣāṃ draupadī bhāryā bhaviṣyati hi naḥ śubhā //
janamejaya uvāca /

satā'pi śaktena ca keśavena sajyaṃ dhanustanna kṛtaṃ kimartham /
viddhaṃ ca lakṣyaṃ na ca kasya heto- rācakṣva tanme dvipadāṃ variṣṭha //
vaiśampāyana uvāca /

śaktena kṛṣṇena ca kārmukaṃ ta- nnāropitaṃ jñātukāmena pārthān /
pariśravādeva babhūva loke jīvanti pārthā iti niścayo'sya //

anyānaśaktānnṛpatīnsamīkṣya svayaṃvare kārmukeṇottamena /
dhanañjayastaddhanurekavīraḥ sajyaṃ karotītyabhivīkṣya kṛṣṇaḥ //

iti svayaṃ vāsudevo vicintya pārthānvivitsanvividhairupāyaiḥ /
na taddhanuḥ sajyamiyepa kartuṃ babhūvurasyeṣṭatamā hi pārthāḥ //

bhrāturvacastatprasamīkṣya sarve jyeṣṭhasya pāṇḍostanayāstadānīm /
tamevārthaṃ dhyāyamānā manobhiḥ sarve ca te tasthuradīnasatvāḥ //

vṛṣṇipravīrastu kurupravīrā- nāśaṃsamānaḥ saharauhiṇeyaḥ /
jagāma tāṃ bhārgavakarmaśālāṃ yatrāsate te puruṣapravīrāḥ //

tatropaviṣṭaṃ pṛthudīrghabāhuṃ dadarśa kṛṣṇaḥ saharauhiṇeyaḥ /
ajātaśatruṃ parivārya tāṃścā- pyupopaviṣṭāñjvalanaprakāśān //

tato'bravīdvāsudevo'bhigamya kuntīsutaṃ dharmabhṛtāṃ variṣṭham /
kṛṣṇo'hamasmīti nipīḍya pādau yudhiṣṭhirasyājamīḍhasya rājñaḥ //

tathaiva tasyāpyanu rauhiṇeya- stau cāpi hṛṣṭāḥ kuravo'bhyanandana /
pitṛṣvasuścāpi yadupravīrā- vagṛhṇatāṃ bhāratamukhya pādau //

ajātaśatruśca kurupravīraḥ papraccha kṛṣṇaṃ kuśalaṃ vilokya /
kathaṃ vayaṃ vāsudeva tvayeha gūḍhā vasanto viditāśca sarve //

tamabravīdvāsudevaḥ prahasya gūḍho'pyagnirjñāyata eva rājan /
taṃ vikramaṃ pāṇḍaveyānatītya ko'nyaḥ kartā vidyate mānuṣeṣu //

diṣṭyā sarve pāvakādvipramuktā yūyaṃ ghorātpāṇḍavāḥ śatrusāhāḥ /
diṣṭyā pāpo dhṛtarāṣṭrasya putraḥ sahāmātyo na sakāmo'bhaviṣyat //

bhadraṃ vo'stu nihitaṃ yadguhāyāṃ vivardhadhvaṃ jvalanā ivaidhamānāḥ /
mā vo vidyuḥ pārthivāḥ kecideva yāsyāvahe śibirāyaiva tāvat / so'nujñātaḥ pāṇḍavenāvyayaśrīḥ
prāyācchīghraṃ baladevena sārdham //