Mahabharata · Chapter 1.200

tataste naraśārdūlā bhrātaraḥ pañca pāṇḍavāḥ / taṃ brāhmaṇaṃ puraskṛtya pāñcālyāśca svayaṃvaram /
prayayurdraupadīṃ draṣṭuṃ taṃ ca deśaṃ mahotsavam //

tataste taṃ mahātmānaṃ śuddhātmānamakalmaṣam /
dadṛśuḥ pāṇḍavā vīrāḥ pathi dvaipāyanaṃ tadā //

tasmai yathāvatsatkāraṃ kṛtvā tena ca satkṛtāḥ /
kathānte cābhyanujñātāḥ prayayurdrupadakṣayam //

paśyanto ramaṇīyāni vanāni ca sarāṃsi ca /
tatratatra vasantaśca śanairjagmurmaharāthāḥ //

svādhyāyavantaḥ śucayo madhurāḥ priyavādinaḥ /
ānupūrvyeṇa samprāptāḥ pāñcālānpāṇḍunandanāḥ //

te tu dṛṣṭvā puraṃ tacca skandhāvāraṃ ca pāṇḍavāḥ /
kumbhakārasya śālāyāṃ nivāsaṃ cakrire tadā //

tatra bhaikṣaṃ samājahrurbrāhmaṇīṃ vṛttimāśritāḥ /
tānsamprāptāṃstathā vīrāñjajñire na narāḥ kvacit //

yajñasenastu pāñcālo bhīṣmadromakṛtāgasam /
jñātvā'tmānaṃ tadārebhe trāṇāyātmakriyāṃ kṣamāṃ //

avāpya dhṛṣṭadyumnaṃ hi na sa droṇamacintayat /
sa tu vairaprasaṅgācca bhīṣmādbhayamacintayat //

kanyādānāttu śaraṇaṃ so'manyata mahīpatiḥ / yajñasenasya kāmastu pāṇḍavāya kirīṭine //

dāsyāmi kṛṣmāmiti vai na cainaṃ vivṛṇoti saḥ / jāmātṛbalasaṃyogaṃ mene hi balavattaram //

so'nveṣamāṇaḥ kaunteyānpāñcālo janamejaya /
dṛḍhaṃ dhanurathānamyaṃ kārayāmāsa bhārata //

vaiyāghrapadyasyograṃ vai sṛñjayasya mahīpatiḥ /
taddhanuḥ kindhuraṃ nāma devadattamupānayat //

āyasī tasya ca jyā'sītpratibaddhā mahābalā /
na tu jyāṃ prasahedanyastaddhanuḥpravaraṃ mahat //

śaṅkareṇa varaṃ dattaṃ prītena ca mahātmanā /
tanniṣphalaṃ syānna tu me iti prāmāṇyamāgataḥ //

mayā kartavyamadhunā duṣkaraṃ lakṣyavedhanam / iti niścitya manasā kāritaṃ lakṣyamuttamam //

yantraṃ vaihāyasaṃ cāpi kārayāmāsa kṛtrimam /
tena yantreṇa sahitaṃ rājam̐llakṣyaṃ ca kāñcanam //
drupada uvāca /

idaṃ sajyaṃ dhanuḥ kṛtvā sajjairebhiśca sāyakaiḥ /
atītya lakṣya yo veddhā sa labdhā matsutāmiti //
vaiśampāyana uvāca /

iti sa drupado rājā svayaṃvaramaghoṣayat /
tacchrutvā pārthivāḥ sarve samīyustatra bhārata //

ṛṣayaśca mahātmānaḥ svayaṃvaradidṛkṣavaḥ /
duryodhanapurogāśca sakarṇāḥ kuravo nṛpa //

yādavā vāsudevena sārdhamandhakavṛṣṇayaḥ / tato'rcitā rājaguṇā drupadena mahātmanā //

upopaviṣṭā mañceṣu draṣṭukāmāḥ svayaṃvaram /
brāhmaṇāśca mahābhāgā deśebhyaḥ samupāgaman //

brāhmaṇaireva sahitāḥ pāṇḍavāḥ samupāviśan /
trayastriṃśatsurāḥ sarve vimānairvyomnyavasthitāḥ //

tataḥ paurajanāḥ sarve sāgaroddhūtaniḥsvanāḥ /
śiṃśumāraśiraḥ prāpya nyaviśaṃste sma pārthivāḥ //

prāguttareṇa nagarādbhūmibhāge same śubhe /
samājavāṭaḥ śuśubhe bhavanaiḥ sarvato vṛtaḥ //

prākāraparikhopeto dvāratoraṇamaṇḍitaḥ /
vitānena vicitreṇa sarvataḥ samalaṅkṛtaḥ //

tūryaughaśatasaṅkīrṇaḥ parārdhyāgurudhūpitaḥ /
candanodakasiktaśca mālyadāmopaśobhitaḥ //

kailāsaśikharaprakhyairnabhastalavilekhibhiḥ /
sarvataḥ saṃvṛtaḥ śubhraiḥ prāsādaiḥ sukṛtocchrayai //

suvarṇajālasaṃvītairmaṇikuṭṭimabhūṣaṇaiḥ /
sukhārohaṇasopānairmahāsanaparicchadaiḥ //

sragdāmasamavacchannairagurūttamavāsitaiḥ /
haṃsāṃśuvarṇairbahubhirāyojanasugandhibhiḥ //

asambādhaśatadvāraiḥ śayanāsanaśobhitaiḥ /
bahudhātupinaddhāṅgairhimavacchikharairiva //

tatra nānāprakāreṣu vimāneṣu svalaṅkṛtāḥ /
spardhamānāstadā'nyonyaṃ niṣeduḥ sarvapārthivāḥ //

tatropaviṣṭāndadṛśurmahāsatvānpṛthagjanāḥ /
rājasiṃhānmahābhāgānkṛṣṇāguruvibhūṣitān //

mahāprasādānbrāhmaṇyānsvarāṣṭraparirakṣiṇaḥ /
priyānsarvasya lokasya sukṛtaiḥ karmabhiḥ śubhaiḥ //

mañceṣu ca parārddhyeṣu paurajānapadā janāḥ /
kṛṣṇādarśanasiddhyarthaṃ sarvataḥ samupāviśan //

brāhmaṇaiste ca sahitāḥ pāṇḍavāḥ samupāviśan /
ṛddhiṃ pañcālarājasya paśyantastāmanuttamām //

tataḥ samājo vavṛdhe sa rājandivasānbahūn /
ratnapradānabahulaḥ śobhito naṭanartakaiḥ //

vartamāne samāje tu ramaṇīye'hni ṣoḍaśe / maitre muhūrte tasyāśca rājadārāḥ purāvidaḥ /
putravatyaḥ suvasanāḥ pratikarmopacakramuḥ //

vaiḍūryamayapīṭhe tu niviṣṭāṃ draupadīṃ tadā /
satūryaṃ snāpayāñcakruḥ svarṇakumbhasthitairjalaiḥ //

tāṃ nivṛttābhiṣekāṃ ca dukūladvayadhāriṇīm /
ninyurmaṇistambhavatīṃ vediṃ vai supariṣkṛtām //

niveśya prāṅmukhīṃ hṛṣṭāṃ vismitākṣyaḥ prasādhikāḥ /
kenālaṅkaraṇenemāmityanyonyaṃ vyalokayan //

dhūpoṣmaṇā ca keśānāmārdrabhāvaṃ vyapohayan /
babandhurasyā dhammillaṃ mālyaiḥ surabhigandhibhiḥ //

dūrvāmadhūkaracitaṃ mālyaṃ tasyā daduḥ kare /
cakruśca kṛṣṇāgaruṇā patrasaṅgaṃ kucadvaye //

reje sā cakravākāṅkā svarṇadīrghā saridvarā /
alakaiḥ kuṭilaistasyā mukhaṃ vikasitaṃ babhau //

āsaktabhṛṅgaṃ kusumaṃ śaśimbimbaṃ jigāya tat /
kālāñjanaṃ nayanayorācārārthaṃ samādadhuḥ //

bhūṣaṇaṃ ratnakhacitairalañcakruryathocitam /
mātā ca tasyāḥ pṛṣatī haritālamanaśśilām //

aṅgulībhyāmupādāya tilakaṃ vidadhe mukhe /
alaṅkṛtāṃ vadhūṃ dṛṣṭvā yoṣito mudamāyayuḥ //

mātā na mumude tasyāḥ patiḥ kīdṛgbhaviṣyati /
sauvidallāḥ samāgamya drupadasyājñayā tataḥ //

enāmāropayāmāsuḥ kariṇīṃ kucabhūṣitām /
tato'vādyanta vādyāni maṅgalāni divi spṛśan //

vilāsinījanāścāpi pravaraṃ kariṇīśatam /
māṅgalyagītaṃ gāyantyaḥ pārsvayorubhayoryayuḥ //

janāpasaraṇe vyagrāḥ pratihāryaḥ purā yayuḥ /
kolāhalo mahānāsīttasminpuravare tadā //

dhṛṣṭadyumno yayāvagre hayamāruhya bhārata /
drupado raṅgadeśe tu balena mahatā yutaḥ //

tasthau vyūhya mahānīkaṃ pālitaṃ dṛḍhadhanvibhiḥ / āplutāṅgīṃ suvasanāṃ sarvābharaṇabhūṣitām //

mālāṃ ca samupādāya kāñcanīṃ samalaṅkṛtām / āgatāṃ dadṛśuḥ sarve raṅgabhūmimalaṅkṛtām //

avatīrṇā tato raṅgaṃ draupadī bharatarṣabha / tasthau pramuditānsarvānnṛpatīnraṅgamaṇḍale /
prekṣantī vrīḍitāpāṅgī draṣṭṛṇāṃ sumanoharā //

purohitaḥ somakānāṃ mantravidbrāhmaṇaḥ śuciḥ /
paristīrya juhāvāgnimājyena vidhivattadā //

santarpayitvā jvalanaṃ brāhmaṇānsvasti vācya ca /
vārayāmāsa sarvāṇi vāditrāṇi samantataḥ //

niḥśabde tu kṛte tasmindhṛṣṭadyumno viśāmpate /
kṛṣṇāmādāya vidhivanmeghadundubhiniḥsvanaḥ //

raṅgamadhyaṃ gatastatra meghagambhīrayā girā /
vākyamuccairjagādedaṃ ślakṣṇamarthavaduttamam //

idaṃ dhanurlakṣyamime ca bāṇāḥ śṛṇvantu me bhūpatayaḥ sametāḥ /
chidreṇa yantrasya masarpayadhvaṃ śaraiḥ śitairvyomacarairdaśārdhaiḥ //

etanmahatkarma karoti yo vai kulena rūpeṇa balena yuktaḥ /
tasyādya bhāryā bhaginī mameyaṃ kṛṣṇā bhavitrī na mṛṣā bravīmi //

tānevamuktvā drupadasya putraḥ paścādidaṃ tāṃ bhaginīmuvāca /
nāmnā ca gotreṇa ca karmaṇā ca sankīrtayanbhūmipatīnsametān //