Mahabharata · Chapter 1.201
duryodhano durviṣaho durmukho duṣpradharṣaṇaḥ /
viviṃśatirvikarṇaśca saho duḥśāsanastathā //
yuyutsurvāyuvegaśca bhīmavegaravastathā /
ugrāyudho balākī ca karakāyurvirocanaḥ //
kuṇḍakaścitrasenaśca suvarcāḥ kanakadhvajaḥ /
nandako bāhuśālī ca tuhuṇḍo vikaṭastathā //
ete cānye ca bahavo dhārtarāṣṭrā mahābalāḥ /
karṇena sahitā vīrāstvadarthaṃ samupāgatāḥ //
asaṅkhyātā mahātmānaḥ pārthivāḥ kṣatriyarṣabhāḥ /
śakuniḥ saubalaścaiva vṛṣako'tha bṛhadbalaḥ //
ete gāndhārarājasya sutāḥ sarve samāgatāḥ /
aśvatthāmā ca bhojaśca sarvaśastrabhṛtāṃ varau //
samavetau mahātmānau tvadarthe samalaṅkṛtau /
bṛhanto maṇimāṃścaiva daṇḍadhāraśca pārthivaḥ //
sahadevajayatsenau meghasandhiśca pārthivaḥ /
virāṭaḥ saha putrābhyāṃ śaṅkhenaivottareṇa ca //
vārdhakṣemiḥ suśarmā ca senābinduśca pārthivaḥ /
suketuḥ saha putreṇa sunāmnā ca suvarcasā //
sucitraḥ sukumāraśca vṛkaḥ satyadhṛtistathā /
sūryadhvajo rocamāno nīlaścitrāyudhastathā //
aṃśumāṃścekitānaśca śreṇimāṃśca mahābalaḥ /
samudrasenaputraśca candrasenaḥ pratāpavān //
jalasandhaḥ pitāputrau vidaṇḍo daṇḍa eva ca /
pauṇḍrako vāsudevaśca bhagadattaśca vīryavān //
kaliṅgastāmraliptaśca pattanādhipatistathā /
madrarājastathā śalyaḥ sahaputro mahārathaḥ //
rukmāṅgadena vīreṇa tathā rukmarathena ca /
kauravyaḥ somadattaśca putraścāsya mahārathaḥ //
samavetāstrayaḥ śūrā bhūrirbhūriśravāḥ śalaḥ /
sudakṣiṇaśca kāmbhojo dṛḍhadhanvā ca pauravaḥ //
bṛhadbalaḥ suṣeṇaśca śibirauśīnastathā /
paṭaccaranihantā ca kārūṣādhipatistathā //
saṅkarṣaṇo vāsudevo raukmiṇeyaśca vīryavān /
sāmbaśca cārudeṣṇaśca prādyumniḥ sagadastathā //
akrūraḥ sātyakiścaiva uddhavaśca mahāmatiḥ /
kṛtavarmā ca hārdikyaḥ pṛthurvipṛthureva ca //
vidūrathaśca kaṅkaśca śaṅkuśca sagaveṣaṇaḥ /
āśāvaho'niruddhaśca samīkaḥ sārimejayaḥ //
vīro vātapatiścaiva jhillīpiṇḍārakastathā /
uśīnaraśca vikrānto vṛṣṇayaste prakīrtitāḥ //
bhagīratho bṛhatkṣatraḥ saindhavaśca jayadrathaḥ /
bṛhadratho bāhlikaśca śrautāyuśca mahārathaḥ //
ulūkaḥ kaitavo rājā citrāṅgadaśubhāṅgadau /
vatsarājaśca matimānkosalādhipatistathā //
śiśupālakhca vikrānto jarāsandhastathaiva ca /
ete cānye ca bahavo nānājanapadeśvarāḥ //
tvadarthamāgatā bhadre kṣatriyāḥ prathitā bhuvi / ete bhetsyanti vikrāntāstvadarthe lakṣyamuttamam /
vidhyate ya idaṃ lakṣyaṃ varayethāḥ śubhe'dya tam //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0