Mahabharata · Chapter 1.198

punaścaiva mahātejā viśvāmitrajighāṃsayā /
agniṃ sambhṛtavānghoraṃ śākteyaḥ sumahātapāḥ //

vāsiṣṭhasambhṛtaścāgnirviśvāmitrahitaiṣiṇā / tejasā vahnitulyena grastaḥ skandena dhīmatā //
arjuna uvāca /

rājñā kalmāṣapādena gurau brahmavidāṃ vare /
kāraṇaṃ kiṃ puraskṛtya bhāryā vai sanniyojitā //

jānatā vai paraṃ dharmaṃ vasiṣṭhena mahātmanā /
agamyāgamanaṃ kasmātkṛtaṃ tena maharṣiṇā //

adharmiṣṭhaṃ vasiṣṭhena kṛtaṃ cāpi purā sakhe /
etanme saṃśayaṃ sarvaṃ chettumarhasi pṛcchataḥ //
gandharva uvāca /

dhanañjaya nibodheyaṃ yanmāṃ tvaṃ paripṛcchasi /
vasiṣṭhaṃ prati durdharṣa tathā mitrasahaṃ nṛpam //

kathitaṃ te mayā sarvaṃ yathā śaptaḥ sa pārthivaḥ /
śaktinā bharataśreṣṭha vāsiṣṭhena mahātmanā //

sa tu śāpavaśaṃ prāptaḥ krodhaparyākulekṣaṇaḥ /
nirjagāma purādrājā sahadāraḥ parantapaḥ //

araṇyaṃ nirjanaṃ gatvā sadāraḥ paricakrame /
nānāmṛgagaṇākīrṇaṃ nānāsatvasamākulam //

nānāgulmalatācchannaṃ nānādrumasamāvṛtam /
araṇyaṃ ghorasannādaṃ śāpagrastaḥ paribhraman //

sa kadācitkṣudhāviṣṭo mṛgayanbhakṣyamātmanaḥ /
dadarśa suparikliṣṭaḥ kasmiṃścinnirjane vane //

brāhmaṇaṃ brāhmaṇīṃ caiva mithunāyopasangatau /
tau taṃ vīkṣya suvitrastāvakṛtārthau pradhāvitau //

tayoḥ pradravatorvipraṃ jagrāha nṛpatirbalāt /
dṛṣṭvā gṛhītaṃ bhartāramatha brāhmaṇyabhāṣata //

śṛṇu rājanmama vaco yattvāṃ vakṣyāmi suvrata /
ādityavaṃśaprabhavastvaṃ hi loke pariśrutaḥ //

apramattaḥ sthi dharme guruśuśrūṣaṇe rataḥ /
śāpopahata durdharṣa na pāpaṃ kartumarhasi //

ṛtukāle tu samprāpte bhartṛvyasanakarśitā /
akṛtārthā hyahaṃ bhartrā prasavārthaṃ samāgatā //

prasīda nṛpatiśreṣṭha bhartā'yaṃ me visṛjyatām /
evaṃ vikrośamānāyāstasyāstu na nṛśaṃsavat //

bhartāraṃ bhakṣayāmāsa vyāghro mṛgamivepsitam /
tasyāḥ krodhābhibhūtāyā yānyaśrūṇyapatanbhuvi //

so'gniḥ samabhavaddīptastaṃ ca deśaṃ vyadīpayat /
tataḥ sā śokasantaptā bhartṛvyasanakarśitā //

kalmāṣapādaṃ rājarṣimaśapadbrāhmaṇī ruṣā /
yasmānmamākṛtārthāyāstvayā kṣudra nṛśaṃsavat //

prekṣantyā bhakṣito me'dya priyo bhartā mahāyaśāḥ /
tasmāttvamapi durbuddhe macchāpaparivikṣataḥ //

patnīmṛtāvanuprāpya sadyastyakṣyasi jīvitam / tena prasādyamānā sā prasādamakarottadā /
yasya carṣervasiṣṭhasya tvayā putrā vināśitāḥ //

tena sangamya te bhāryā tanayaṃ janayiṣyati /
sate vaṃśakaraḥ putro bhaviṣyati nṛpādhama //

evaṃ śaptvā tu rājānaṃ sā tamāṅgirasī śubhā /
tasyaiva sannidhau dīptaṃ praviveśa hutāśanam //

vasiṣṭhaśca mahābhāgaḥ sarvametadavaikṣata /
jñānayogena mahatā tapasā ca parantapa //

muktaśāpaśca rājarṣiḥ kālena mahatā tataḥ /
ṛtukāle'bhipatito madayantyā nivāritaḥ //

na hi sasmāra sa nṛpastaṃ śāpaṃ kāmamohitaḥ /
devyāḥ so'tha vacaḥ śrutvā sambhrānto nṛpasattamaḥ //

taṃ śāpamanusaṃsmṛtya paryatapyadbhṛśaṃ tadā / etasmātkāraṇādrājā vasiṣṭhaṃ sanyayojayat /
svadāreṣu naraśreṣṭha śāpadoṣasamanvitaḥ //