Mahabharata · Chapter 1.197

evamuktaḥ sa viprarṣirvasiṣṭhena mahātmanā /
nyayacchadātmanaḥ krodhaṃ sarvalokaparābhavāt //

īje ca sa mahātejāḥ sarvavedavidāṃ varaḥ /
ṛṣī rākṣasasatreṇa śākteyo'tha parāśaraḥ //

tato vṛddhāṃśca bālāṃśca rākṣasānsa mahāmuniḥ /
dadāha vitate yajñe śaktervadhamanusmaran //

na hi taṃ vārayāmāsa vasiṣṭho rakṣasāṃ vadhāt /
dvitīyāmasya māṃ bhāṅkṣaṃ pratijñāmiti niścayāt //

trayāṇāṃ pāvakānāṃ ca satre tasminmahāmuniḥ /
āsītpurastāddīptānāṃ caturtha iva pāvakaḥ //

tena yajñena śubhreṇa hūyamānena śaktitaḥ /
tadvidīpitamākāśaṃ sūryeṇeva ghanātyaye //

taṃ vasiṣṭhādayaḥ sarve munayastatra menire /
tejasā dīpyamānaṃ vai dvitīyamiva bhāskaram //

tataḥ paramaduṣprāpamanyairṛṣirudhāradhīḥ /
samāpipayiṣuḥ satraṃ tamatriḥ samupāgamat //

tathā pulastyaḥ pulahaḥ kratuścaiva mahākratuḥ /
tatrājagmuramitraghna rakṣasāṃ jīvitepsayā //

pulastyastu vadhātteṣāṃ rakṣasāṃ bharatarṣabha /
uvācedaṃ vacaḥ pārtha parāśaramarindamam //

kaccittātāpavighnaṃ te kaccinnandasi putraka /
ajānatāmadoṣāṇāṃ sarveṣāṃ rakṣasāṃ vadhāt //

prajocchedamimaṃ mahyaṃ na hi kartu tvamarhasi /
naiṣa tāta dvijātīnāṃ dharmo dṛṣṭastapasvinām //

śama eva paro dharmastamācara parāśara /
adharmiṣṭhaṃ variṣṭhaḥ sankuruṣe tvaṃ parāśara //

śaktiṃ cāpi hi dharmajñaṃ nātikrāntumihārhasi /
prajāyāśca mamocchedaṃ na caivaṃ kartumarhasi //

śāpāddhi śaktervāsiṣṭha tadā tadupapāditam /
ātmajena sa doṣeṇa śaktirnīta ito divam //

na hi taṃ rākṣasaḥ kaścicchakto bhakṣayituṃ mune / vāsiṣṭho bhakṣitaścāsītkauśikotsṛṣṭarakṣasā /
śāpaṃ na kurvanti tadā na ca trāṇaparāyaṇāḥ //

kṣamāvanto'dahandehaṃ dehamanyadbhavatviti / ātmanaivātmanastena dṛṣṭo mṛtyustadā'bhavat //

nimittabhūtastatrāsīdviśvāmitraḥ parāśara /
rājā kalmāṣapādaśca divamāruhya modate //

ye ca śaktyavarāḥ putrā vasiṣṭhasya mahāmune /
te ca sarve mudā yuktā modante sahitāḥ suraiḥ //

sarvametadvasiṣṭhasya viditaṃ vai mahāmune /
rakṣasāṃ ca samuccheda eṣa tāta tapasvinām //

nimittabhūtastvaṃ cātra kratau vāsiṣṭhanandana /
tatsatraṃ muñca bhadraṃ te samāptamidamastu te //
gandharva uvāca /

evamuktaḥ pulastyena vasiṣṭhena ca dhīmatā /
tadā samāpayāmāsa satraṃ śākto mahāmuniḥ //

sarvarākṣasasatrāya sambhṛtaṃ pāvakaṃ tadā /
uttare himavatpārśve utsasarja mahāvane //

sa tatrādyāpi rakṣāṃsi vṛkṣānaśmana eva ca /
bhakṣayandṛśyate vahniḥ sadā parvaṇi parvaṇi //