Mahabharata · Chapter 1.19

athāvaraṇamukhyāni nānāpraharaṇāni ca /
pragṛhyābhyadravandevānsahitā daityadānavāḥ //

tatastadamṛtaṃ devo viṣṇurādāya vīryavān /
jahāra dānavendrebhyo nareṇa sahitaḥ prabhuḥ //

tato devagaṇāḥ sarve papustadamṛtaṃ tadā /
viṣṇoḥ sakāśātsamprāpya sambhrame tumule sati //

pāyayatyamṛtaṃ devānharau bāhubalānnaraḥ / nirodhayati cāpena dūrīkṛtya dhanurdharān /
ye ye'mṛtaṃ pibanti sma te te yuddhyanti dānavaiḥ; //

tataḥ pibatsu tatkālaṃ deveṣvamṛtamīpsitam /
rāhurvibudharūpeṇa dānavaḥ prāpibattadā //

tasya kaṇṭhamanuprāpte dānavasyāmṛte tadā /
ākhyātaṃ candrasūryābhyāṃ surāṇāṃ hitakāmyayā //

tato bhagavatā tasya śiraśchinnamalankṛtam /
cakrāyudhena cakreṇa pibato'mṛtamojasā //

tacchailaśṛhgapraṅgimaṃ dānavasya śiro mahat / cakreṇotkṛttamapataccālayadvasudhātalam //

cakracchinnaṃ khamutpatya nanādātibhayankaram /
tatkabandhaṃ papātāsya visphuraddharaṇītale //

trayodaśa sahasrāṇi caturaśraṃ samantataḥ /
saparvatavanadvīpāṃ daityasyākampayanmahīm //

tato vairavinirbandhaḥ kṛto rāhumukhena vai /
śāśvataścandrasūryābhyāṃ grasatyadyāpi caiva tau //

vihāya bhagavāṃścāpi strīrūpamatulaṃ hariḥ /
nānāpraharaṇairbhīmairdānavāntamakampayat //

tataḥ pravṛttaḥ sangrāmaḥ samīpe lavaṇāmbhasaḥ /
surāṇāmasurāṇāṃ ca sarvaghorataro mahān //

prāsāśca vipulāstīkṣṇā nyapatanta sahasraśaḥ /
tomarāśca sutīkṣṇāgrāḥ śastrāṇi vividhāni ca //

tato'surāścakrabhinnā vamanto rudhiraṃ bahu /
asiśaktigadārugṇā nipeturdharaṇītale //

chinnāni paṭṭiśaiścaiva śirāṃsi yudhi dāruṇaiḥ /
taptakāñcanamālīni nipeturaniśaṃ tadā //

rudhireṇānuliptāṅgā nihatāśca mahāsurāḥ /
adrīṇāmiva kūṭāni dhāturaktāni śerate //

āhākāraḥ samabhavattatra tatra sahasraśaḥ /
anyonyañchindatāṃ śastrairāditye lohitāyati //

parighairāyasaistīkṣṇaiḥ sannikarṣe ca muṣṭibhiḥ /
nighnatāṃ samare'nyonyaṃ śabdo divamivāspṛśat //

chindhibhindhi pradhāva tvaṃ pātayābhisareti ca /
vyaśrūyanta mahāghorāḥ śabdāstatra samantataḥ //

evaṃ sutumule yuddhe vartamāne mahābhaye /
naranārāyaṇau devau samājagmaturāhavam //

tatra divyaṃ dhanurdṛṣṭvā narasya bhagavānapi /
cintayāmāsa taccakraṃ viṣṇurdānavasūdanam //

tato'mbarāccintitamātramāgataṃ mahāprabhaṃ cakramamitratāpanam /
vibhāvasostulyamakuṇṭhamaṇḍalaṃ sudarśanaṃ saṃyati bhīmadarśanam //

tadāgataṃ jvalitahutāśanaprabhaṃ bhayankaraṃ karikarabāhuracyutaḥ /
mumoca vai prabalavadugravegavā- nmahāprabhaṃ paranagarāvadāraṇam //

tadantakajvalanasamānavarcasaṃ punaḥpunarnyapatata vegavattadā /
vidārayadditidanujānsahasraśaḥ kareritaṃ puruṣavareṇa saṃyuge //

dahatkvacijjvalana ivāvaleliha- tprasahya tānasuragaṇānnyakṛntata /
praveritaṃ viyati muhuḥ kṣitau tathā papau raṇe rudhiramatho piśācavat //

tathā'surā giribhiradīnacetaso muhurmuhuḥ suragaṇamārdayaṃstadā /
mahābalā vigalitameghavarcasaḥ sahasraśo gaganamabhiprapadyaha //

athāmbarādbhayajananāḥ prapedire sapādapā bahuvidhamegharūpiṇaḥ /
mahādrayaḥ parigalitāgrasānavaḥ parasparaṃ drutamabhihatya sasvanāḥ //

tato mahī pravicalitā sakānanā mahādripātābhihatā samantataḥ /
parasparaṃ bhṛśamabhigarjatāṃ muhū raṇājire bhṛśamabhisampravartite //

narastato varakanakāgrabhūṣaṇai- rmaheṣubhirgaganapathaṃ samāvṛṇot /
vidārayangiriśikharāṇi patribhi- rmahābhaye'suragaṇavigrahe tadā //

tato mahīṃ lavaṇajalaṃ ca sāgaraṃ mahāsurāḥ praviviśurarditāḥ suraiḥ /
viyadgataṃ jvalitahutāśanaprabhaṃ sudarśanaṃ parikupitaṃ niśāmya te //

tataḥ surairvijayamavāpya mandaraḥ svameva deśaṃ gamitaḥ supūjitaḥ /
vinādya khaṃ divamapi caiva sarvaśa- stato gatāḥ saliladharā yathāgatam //

tato'mṛtaṃ sunihitameva cakrire surāḥ purāṃ mudamabhigamya puṣkalām /
dado ca taṃ nidhimamṛtasya rakṣituṃ kirīṭine balabhidathāmaraiḥ saha //