Mahabharata · Chapter 1.20

etatte kathitaṃ sarvamamṛtaṃ mathitaṃ yathā /
yatra so'śvaḥ samutpannaḥ śrīmānatulavikramaḥ //

taṃ niśāmya tadā kadrūrvinatāmidamabravīt /
uccaiḥśravā hi kiṃvarṇo bhadre prabrūhi mā ciram //
vinatovāca /

śveta evāśvarājo'yaṃ kiṃ vā tvaṃ manyase śubhe /
brūhi varṇaṃ tvamapyasya tato'tra vipaṇāvahe //
kadrūruvāca /

kṛṣṇavālamahaṃ manye hayamenaṃ śucismite /
ehi sārdhaṃ mayā dīvya dāsībhāvāya bhāmini //
sautiruvāca /

evaṃ te samayaṃ kṛtvā dāsībhāvāya vai mithaḥ /
jagmatuḥ svagṛhāneva śvo drakṣyāva iti sma ha //

tataḥ putrasahasraṃ tu kadrūrjihyaṃ cikīrṣatī /
ājñāpayāmāsa tadā vālā bhūtvā'ñjanaprabhāḥ //

āviśadhvaṃ hayaṃ kṣipraṃ dāsī na syāmahaṃ yathā /
nāvapadyanta ye vākyaṃ tāñśaśāpa bhujangamān //

sarpasatre vartamāne pāvako vaḥ pradhakṣyati /
janamejayasya rājarṣeḥ pāṇḍaveyasya dhīmataḥ //

śāpamenaṃ tu śuśrāva svayameva pitāmahaḥ /
atikrūraṃ samutsṛṣṭaṃ kadrvā daivādatīva hi //

sārdhaṃ devagaṇaiḥ sarvairvācaṃ tāmanvamodata /
bahutvaṃ prekṣya sarpāṇāṃ prajānāṃ hitakāmyayā //

tigmavīryaviṣā hyete dandaśūkā mahābalāḥ /
teṣāṃ tīkṣṇaviṣatvāddhi prajānāṃ ca hitāya ca //

yuktaṃ mātrā kṛtaṃ teṣāṃ parapīḍopasarpiṇām /
anyeṣāmapi sattvānāṃ nityaṃ doṣaparāstu ye //

teṣāṃ prāṇāntiko daṇḍo daivena vinipātyate /
evaṃ sambhāṣya devastu pūjya kadrūṃ ca tāṃ tadā //

āhūya kaśyapaṃ deva idaṃ vacanamabravīt /
yadete dandaśūkāśca sarpā jātāstvayānagha //

viṣolbaṇā mahābhogā mātrā śaptāḥ parantapa /
tatra manyustvayā tāta na kartavyaḥ kathañcana //

dṛṣṭaṃ purātanaṃ hyetadyajñe sarpavināśanam / ityuktvā sṛṣṭikṛddevastaṃ prasādya prajāpatim /
prādādviṣaharīṃ vidyāṃ kaśyapāya mahātmane //

evaṃ śapteṣu nāgeṣu kadrvātu dvijasattama /
advignaḥ śāpatastasyāḥ kadrūṃ karkoṭako'bravīt //

mātaraṃ paramaprītastathā bhujagasattamaḥ /
āviśya vājinaṃ mukhyaṃ bālo bhūtvāñjanaprabhaḥ //

darśayiṣyāmi tatrāhamātmānaṃ kāmamāśvasa /
evamastviti sā putraṃ pratyuvāca yaśasvinī //