Mahabharata · Chapter 1.185

gate bhagavati vyāse pāṇḍavā hṛṣṭamānasāḥ /
te prayātā naravyāghrā mātrā saha parantapāḥ //

brāhmaṇāngacchato paśyanpāñcālānsagaṇānpathi /
atha te brāhmaṇā ūcuḥ pāṇḍavānbrahmacāriṇaḥ //

kva bhavanto gamiṣyanti kuto vā'gacchatheti ha /
yudhiṣṭhira uvāca /
prayātānekacakrāyāḥ sodaryāndevadarśinaḥ //

bhavanto no'bhijānantu sahitānbrahmacāriṇaḥ /
gacchato nastu pāñcālāndrupadasya puraṃ prati //

icchāmo bhavato jñātuṃ paraṃ kautūhalaṃ hi naḥ //
brāhmaṇā ūcuḥ /

ete sārdhaṃ prayātāḥ smo vayamapyatra gāminaḥ /
tatrāpyadbhutasaṅkāśa utsavo bhavitā mahān //

tatastu yajñasenasya drupadasya mahātmanaḥ /
yāsāvayonijā kanyā sthāsyate sā svayaṃvare //

darśanīyā'navadyāṅgī sukumārī yaśasvinī /
dhṛṣṭadyumnasya bhaginī droṇaśatroḥ pratāpinaḥ //

jāto yaḥ pāvakācchūraḥ saśaraḥ saśarāsanaḥ /
susamiddhānmahābhāgaḥ somakānāṃ mahārathaḥ //

yasminsañjāyamāne hi vāguvācāśarīriṇī /
eṣa mṛtyuśca śiṣyaśca bhāradvājasya jāyate //

svasā tasya tu vedyāśca jātā tasminmahāmakhe /
strīratnamasitāpāṅgī śyāmā nīlotpaladyutiḥ //

tāṃ yajñasenasya sutāṃ draupadīṃ paramāṃ striyam /
gacchāmastatra vai draṣṭuṃ taṃ caivāsyāḥ svayaṃvaram //

rājāno rājaputrāśca yajvāno bhūridakṣiṇāḥ /
svādhyāyavantaḥ śucayo mahātmāno dhṛtavratāḥ //

taruṇā darśanīyāśca balavanto durāsadāḥ /
mahārathāḥ kṛtāstrāśca sameṣyantīha bhūmipāḥ //

te tatra vividhaṃ dānaṃ vijayārthaṃ nareśvarāḥ /
pradāsyanti dhanaṃ gāśca bhakṣyabhojyāni sarvaśaḥ //

pratilapsyāmahe sarvaṃ dṛṣṭvā kṛṣṇāṃ svayaṃvare /
yaṃ ca sā kṣatriyaṃ raṅge kumārī varayiṣyati //

tadā vaitālikāścaiva nartakāḥ sūtamāgadhāḥ /
nibodhakāśca deśebhyaḥ sameṣyanti mahābalāḥ //

etatkautūhalaṃ tatra dṛṣṭvā vai pratigṛhya ca /
sahāsmābhirmahātmāno mātrā saha nivatsyatha //

darśanīyāṃśca vaḥ sarvānekarūpānavasthitān /
samīkṣya kṛṣmā varayetsangatyānyatamaṃ patim //

ayamekaśca vo bhrātā darśanīyo mahābhujaḥ /
niyudhyamāno vijayetsangatya draviṇaṃ mahat //
yudhiṣṭhira uvāca /

paramaṃ bho gamiṣyāmo draṣṭuṃ tatra svayaṃvaram / draupadīṃ yajñasenasya kanyāṃ tasyāstathotsavam //