મહાભારત · અધ્યાય 1.185

ગતે ભગવતિ વ્યાસે પાણ્ડવા હૃષ્ટમાનસાઃ ।
તે પ્રયાતા નરવ્યાઘ્રા માત્રા સહ પરન્તપાઃ ॥

બ્રાહ્મણાન્ગચ્છતો પશ્યન્પાઞ્ચાલાન્સગણાન્પથિ ।
અથ તે બ્રાહ્મણા ઊચુઃ પાણ્ડવાન્બ્રહ્મચારિણઃ ॥

ક્વ ભવન્તો ગમિષ્યન્તિ કુતો વાઽગચ્છથેતિ હ ।
યુધિષ્ઠિર ઉવાચ ।
પ્રયાતાનેકચક્રાયાઃ સોદર્યાન્દેવદર્શિનઃ ॥

ભવન્તો નોઽભિજાનન્તુ સહિતાન્બ્રહ્મચારિણઃ ।
ગચ્છતો નસ્તુ પાઞ્ચાલાન્દ્રુપદસ્ય પુરં પ્રતિ ॥

ઇચ્છામો ભવતો જ્ઞાતું પરં કૌતૂહલં હિ નઃ ॥
બ્રાહ્મણા ઊચુઃ ।

એતે સાર્ધં પ્રયાતાઃ સ્મો વયમપ્યત્ર ગામિનઃ ।
તત્રાપ્યદ્ભુતસઙ્કાશ ઉત્સવો ભવિતા મહાન્ ॥

તતસ્તુ યજ્ઞસેનસ્ય દ્રુપદસ્ય મહાત્મનઃ ।
યાસાવયોનિજા કન્યા સ્થાસ્યતે સા સ્વયંવરે ॥

દર્શનીયાઽનવદ્યાઙ્ગી સુકુમારી યશસ્વિની ।
ધૃષ્ટદ્યુમ્નસ્ય ભગિની દ્રોણશત્રોઃ પ્રતાપિનઃ ॥

જાતો યઃ પાવકાચ્છૂરઃ સશરઃ સશરાસનઃ ।
સુસમિદ્ધાન્મહાભાગઃ સોમકાનાં મહારથઃ ॥

યસ્મિન્સઞ્જાયમાને હિ વાગુવાચાશરીરિણી ।
એષ મૃત્યુશ્ચ શિષ્યશ્ચ ભારદ્વાજસ્ય જાયતે ॥

સ્વસા તસ્ય તુ વેદ્યાશ્ચ જાતા તસ્મિન્મહામખે ।
સ્ત્રીરત્નમસિતાપાઙ્ગી શ્યામા નીલોત્પલદ્યુતિઃ ॥

તાં યજ્ઞસેનસ્ય સુતાં દ્રૌપદીં પરમાં સ્ત્રિયમ્ ।
ગચ્છામસ્તત્ર વૈ દ્રષ્ટું તં ચૈવાસ્યાઃ સ્વયંવરમ્ ॥

રાજાનો રાજપુત્રાશ્ચ યજ્વાનો ભૂરિદક્ષિણાઃ ।
સ્વાધ્યાયવન્તઃ શુચયો મહાત્માનો ધૃતવ્રતાઃ ॥

તરુણા દર્શનીયાશ્ચ બલવન્તો દુરાસદાઃ ।
મહારથાઃ કૃતાસ્ત્રાશ્ચ સમેષ્યન્તીહ ભૂમિપાઃ ॥

તે તત્ર વિવિધં દાનં વિજયાર્થં નરેશ્વરાઃ ।
પ્રદાસ્યન્તિ ધનં ગાશ્ચ ભક્ષ્યભોજ્યાનિ સર્વશઃ ॥

પ્રતિલપ્સ્યામહે સર્વં દૃષ્ટ્વા કૃષ્ણાં સ્વયંવરે ।
યં ચ સા ક્ષત્રિયં રઙ્ગે કુમારી વરયિષ્યતિ ॥

તદા વૈતાલિકાશ્ચૈવ નર્તકાઃ સૂતમાગધાઃ ।
નિબોધકાશ્ચ દેશેભ્યઃ સમેષ્યન્તિ મહાબલાઃ ॥

એતત્કૌતૂહલં તત્ર દૃષ્ટ્વા વૈ પ્રતિગૃહ્ય ચ ।
સહાસ્માભિર્મહાત્માનો માત્રા સહ નિવત્સ્યથ ॥

દર્શનીયાંશ્ચ વઃ સર્વાનેકરૂપાનવસ્થિતાન્ ।
સમીક્ષ્ય કૃષ્મા વરયેત્સન્ગત્યાન્યતમં પતિમ્ ॥

અયમેકશ્ચ વો ભ્રાતા દર્શનીયો મહાભુજઃ ।
નિયુધ્યમાનો વિજયેત્સન્ગત્ય દ્રવિણં મહત્ ॥
યુધિષ્ઠિર ઉવાચ ।

પરમં ભો ગમિષ્યામો દ્રષ્ટું તત્ર સ્વયંવરમ્ । દ્રૌપદીં યજ્ઞસેનસ્ય કન્યાં તસ્યાસ્તથોત્સવમ્ ॥