Mahabharata · Chapter 1.184

vasatsu teṣu pracchannaṃ pāṇḍaveṣu mahātmasu /
ājagāmātha tāndraṣṭuṃ vyāsaḥ satyavatīsutaḥ //

tamāgatamabhiprekṣya pratyudgamya parantapāḥ /
praṇipatyābhivādyainaṃ tasthuḥ prāñjalayastadā //

samanujñāpya tānsarvānāsīnānmunirabravīt /
pracchannaṃ pūjitaḥ pārthaiḥ prītipūrvamidaṃ vacaḥ //

api dharmeṇa vartadhvaṃ śāstreṇa ca parantapāḥ /
api vipreṣu pūjā vaḥ pūjārheṣu na hīyate //

atha dharmārthavadvākyamuktvā sa bhagavānṛṣiḥ /
vicitrāśca kathāstāstāḥ punarevedamabravīt //

āsīttapovane kācidṛṣeḥ kanyā mahātmanaḥ /
vilagnamadhyā suśroṇī subhrūḥ sarvaguṇānvitā //

karmabhiḥ svakṛtaiḥ sā tu durbhagā samapadyata /
nādhyagacchatpatiṃ sā tu kanyā rūpavatī satī //

tapastaptumathārebhe patyarthamasukhā tataḥ /
toṣayāmāsa tapasā sā kilogreṇa śaṅkaram //

tasyāḥ sa bhagavāṃstuṣṭastāmuvāca yaśasvinīm /
varaṃ varaya bhadraṃ te varado'smīti śaṅkaraḥ //

atheśvaramuvācedamātmanaḥ sā vaco hitam /
patiṃ sarvaguṇopetamicchāmīti punaḥpunaḥ //

tāmatha pratyuvācedamīśāno vadatāṃ varaḥ /
pañca te patayo bhadre bhaviṣyantīti bhāratāḥ //

evamuktā tataḥ kanyā devaṃ varadamabravīt /
ekamicchāmyahaṃ deva tvatprasādātpatiṃ prabho //

punarevābravīddeva idaṃ vacanamuttamam /
pañcakṛtvastvayā hyuktaḥ patiṃ dehītyahaṃ punaḥ //

dehamanyaṃ gatāyāste yathoktaṃ tadbhaviṣyati /
vyāsa uvāca /
drupadasya kule jajñe sā kanyā devarūpiṇī //

nirdiṣṭā bhavatāṃ patnī kṛṣṇā pārṣatyaninditā / pāñcālanagare tasmānnivasadhvaṃ mahābalāḥ /
sukhinastāmanuprāpya bhaviṣyatha na saṃśayaḥ //

evamuktvā mahābhāgaḥ pāṇḍavānsa pitāmahaḥ /
pārthānāmantrya kuntīṃ ca prātiṣṭhata mahātapāḥ //