Mahabharata · Chapter 1.175

na viṣādastvayā kāryo bhayādasmātkathañcana /
upāyaḥ paridṛṣṭo'tra tasmānmokṣāya rakṣasaḥ //

naiva svayaṃ saputrasya gamanaṃ tatra rocaye / ekastava suto bālaḥ kanyā caikā tapasvinī /
na caitayostathā patnyā gamanaṃ tava rocaye //

mama pañca sutā brahmaṃsteṣāmeko gamiṣyati /
tvadarthaṃ balimādāya tasya pāpasya rakṣasaḥ //
brāhmaṇa uvāca /

nāhametatkariṣyāmi jīvitārthī kathañcana /
brāhmaṇasyātitheścaiva svārthe prāṇānviyojayan //

na tvetadakulīnāsu nādharmiṣṭhāsu vidyate /
yadbrāhmamārthaṃ visṛjedātmānamapi cātmajam //

ātmanastu vadhaḥ śreyo boddhavyamiti rocate /
brahamvadhyā'tmavadhyā vā śreyānātmavadho mama //

brahmavadhyā paraṃ pāpaṃ niṣkṛtirnātra vidyate /
abuddhipūrvaṃ kṛtvāpi pratyavāyo hi vidyate //

na tvahaṃ vadhamākāṅkṣe svayamevātmanaḥ śubhe /
paraiḥ kṛte vadhe pāpaṃ na kiñcinmayi vidyate //

abhisandhau kṛte tasminbrāhmaṇasya vadhe mayā /
niṣkṛtiṃ na prapaśyāmi nṛśaṃsaṃ kṣudrameva ca //

āgatasya gṛhaṃ tyāgastathaiva śaraṇārthinaḥ /
yācamānasya ca vadho nṛśaṃso garhito budhaiḥ //

kuryānna ninditaṃ karma na nṛśaṃsaṃ kathañcana /
iti pūrve mahātmāna āpaddharmavido viduḥ //

śreyāṃstu sahadārasya vināśo'dya mama svayam /
brāhmaṇasya vadhaṃ nāhamanumaṃsye kadācana //
kuntyuvāca /

mamāpyeṣā matirbrahmanviprā rakṣyā iti sthirā /
na cāpyaniṣṭaḥ putro me yadi putraśataṃ bhavet //

na cāsau rākṣasaḥ śakto mama putravināśane /
vīryamanmantrasiddhaśca tejasvī ca suto mama //

rākṣasāya ca tatsarvaṃ prāpayiṣyati bhojanam /
mokṣayiṣyati cātmānamiti me niścitā matiḥ //

samāgatāśca vīreṇa dṛṣṭapūrvāśca rākṣasāḥ /
balavanto mahākāyā nihatāścāpyanekaśaḥ //

na tvidaṃ keṣucidbrahmānvyāhartavyaṃ kathañcana /
vidyārthino hi me putrānviprakuryuḥ kutūhalāt //

guruṇā cānanujñāto grāhayedyaḥ suto mama /
na sa kuryāttathā kāryaṃ vidyayeti satāṃ matam //
vaiśampāyana uvāca /

evamuktastu pṛthayā sa vipro bhāryayā saha /
hṛṣṭaḥ sampūjayāmāsa tadvākyamamṛtopamam //

tataḥ kuntī ca vipraśca sahitāvanilātmajam /
tamabrūtāṃ kuruṣveti sa tathetyabravīcca tau //