Mahabharata · Chapter 1.176

kariṣya iti bhīmena pratijñāte'tha bhārata /
ājagmuste tataḥ sarve bhaikṣamādāya pāṇḍavāḥ //

bhīmasenaṃ tato dṛṣṭvā āpūrṇavadanaṃ tathā /
bubodha dharmarājastu hṛṣitaṃ bhīmamacyutam //

toṣasya kāraṇaṃ yattu manasā'cintayadguruḥ / sa samīkṣya tadā rājanyoddhukāmaṃ yudhiṣṭhiraḥ //

ākāreṇaiva taṃ jñātvā pāṇḍuputro yudhiṣṭhiraḥ /
rahaḥ samupaviśyaikastataḥ papraccha mātaram //

kiṃ cikīrṣatyayaṃ karma bhīmo bhamaparākramaḥ /
bhavatyanumate kaccitsvayaṃ vā kartumicchati //
kuntyuvāca /

mamaiva vacanādeṣa kariṣyati parantapaḥ /
brāhmaṇārthe mahatkṛtyaṃ mokṣāya nagarasya ca //

bakāya kalpitaṃ putra mahāntaṃ balimuttamam / bhīmo bhunaktu suspaṣṭamapyekāhaṃ tapaḥsutaḥ //
yudhiṣṭhira uvāca /

kimidaṃ sāhasaṃ tīkṣṇaṃ bhavatyā duṣkaraṃ kṛtam /
parityāgaṃ hi putrasya na praśaṃsanti sādhavaḥ //

kathaṃ parasutasyārthe svasutaṃ tyaktumicchasi /
lokavedaviruddhaṃ hi putratyāgātkṛtaṃ tvayā //

yasya bāhū samāśritya sukhaṃ sarve śayāmahe /
rājyaṃ cāpahṛtaṃ kṣudrairājihīrṣāmahe punaḥ //

yasya duryodhano vīryaṃ cintayannamitaujasaḥ /
na śete rajanīḥ sarvā duḥkhācchakuninā saha //

yasya vīrasya vīryeṇa muktā jatugṛhādvayam /
anyebhyaścaiva pāpebhyo nihataśca purocanaḥ //

yasya vīryaṃ samāśritya vasupūrṇāṃ vasundharām /
imāṃ manyāmahe prāptāṃ nihatya dhṛtarāṣṭrajān //

tasya vyavasitastyāgo buddhimāsthāya kāṃ tvayā /
kaccinnu duḥkhairbuddhiste viluptā gatacetasaḥ //
kuntyuvāca /

yudhiṣṭhira na santāpastvayā kāryo vṛkodare /
na cāyaṃ buddhidaurbalyādvyavasāyaḥ kṛto mayā //

na ca śokena buddhiḥ sā viluptā gatacekasaḥ / iha viprasya bhavane vayaṃ putra sukhoṣitāḥ /
ajñātā dhārtarāṣṭrāṇāṃ satkṛtā vītamanyavaḥ //

tasya pratikriyā pārtha mayeyaṃ prasamīkṣitā /
etāvāneva puruṣaḥ kṛtaṃ yasminna naśyati //

yāvacca kuryādanyo'sya kuryādbahugumaṃ tataḥ / brāhmaṇārthe mahāndharmo jānāmītthaṃ vṛkodare //

dṛṣṭvā bhīmasya vikrāntaṃ tadā jatugṛhe mahat /
hiḍimbasya vadhāccaivaṃ viśvāso me vṛkodare //

bāhvorbalaṃ hi bhīmasya nāgāyutasamaṃ mahat /
yena yūyaṃ gajaprakhyā nirvyūḍhā vāraṇāvatāt //

vṛkodareṇa sadṛśo balenānyo na vidyate /
yo vyatīyādyudhi śreṣṭhamapi vajradharaṃ svayam //

jātamātraḥ purā caiva mamāṅkātpatito girau /
śarīragauravādasya śilā gātrairvicūrṇitā //

tadahaṃ prajñayā jñātvā balaṃ bhīmasya pāṇḍava /
pratikārye ca viprasya tataḥ kṛtavatī matim //

nedaṃ lobhānna cājñānānna ca mohādviniścitam /
buddhipūrvaṃ tu dharmasya vyavasāyaḥ kṛto mayā //

arthau dvāvapi niṣpannau yudhiṣṭhira bhaviṣyataḥ /
pratīkāraśca vāsasya dharmaśca carito mahān //

yo brāhmaṇasya sāhāyyaṃ kuryādartheṣu karhicit /
kṣatriyaḥ sa śubhām̐llokānāpnuyāditi me matiḥ //

kṣatriyasyaiva kurvāṇaḥ kṣatriyo vadhamokṣaṇam /
vipulāṃ kīrtimāpnoti loke'smiṃśca paratra ca //

vaiśyasyārthe ca sāhāyyaṃ kurvāṇaḥ kṣatriyo bhuvi /
sa sarveṣvapi lokeṣu prajā rañjayate dhruvam //

śūdraṃ tu mocayedrājā śaraṇārthinamāgatam /
prāpnotīha kule janma saddravye rājapūjite //

evaṃ māṃ bhagavānvyāsaḥ purā pauravanandana /
provācāsukaraprajñastasmādevaṃ cikīrṣitam //