Mahabharata · Chapter 1.169

gate bhagavati vyāse pāṇḍavā vigatajvarāḥ /
ūṣustatra ca ṣaṇmāsānvaṭavṛkṣe yathāsukham //

śākamūlaphalāhārāstapaḥ kurvanti pāṇḍavāḥ /
anujñātā mahārāja tataḥ kamalapālikā //

ramayantī sadā bhīmaṃ tatratatra manojavā /
divyābharaṇavastrā hi divyasraganulepanā //

evaṃ bhrātṝnsapta māsānhiḍimbā'vāsayadvane /
pāṇḍavānbhīmasenārthe rākṣasī kāmarūpiṇī //

sukhaṃ sa viharanbhīmastatkālaṃ paryaṇāmayat /
tato'labhata sā garbhaṃ rākṣasī kāmarūpiṇī //

atṛptā bhīmasenena saptamāsopasangatā / prajajñe rākṣasī putraṃ bhīmasenānmahābalāt //

virūpākṣaṃ mahāvaktraṃ śaṅkukarṇaṃ vibhīṣaṇam /
bhīmarūpaṃ sutāmrākṣaṃ tīkṣṇadaṃṣṭraṃ mahāratham //

maheṣvāsaṃ mahāvīryaṃ mahāsatvaṃ mahājavam /
mahākāyaṃ mahākālaṃ mahāgrīvaṃ mahābhujam //

amānuṣaṃ mānuṣajaṃ bhīmavegamarindamam /
piśācakānatītyānyānbabhūvāti sa mānuṣān //

bālo'pi vikramaṃ prāpto mānuṣeṣu viśāmpate /
sarvāstreṣu varo vīraḥ prakāmamabhavadbalī //

sadyo hi garbhaṃ rākṣasyo labhante prasavanti ca /
kāmarūpadharāścaiva bhavanti bahurūpikāḥ //

praṇamya vikacaḥ pādāvagṛhṇātsa pitustadā /
mātuśca parameṣvāsastau ca nāmāsya cakratuḥ //

ghaṭohāsyotkaca iti mātā taṃ pratyabhāṣata /
abhavattena nāmāsya ghaṭotkaca iti sma ha //

anuraktaśca tānāsītpāṇḍavānsa ghaṭotkacaḥ /
teṣāṃ ca dayito nityamātmanityo babhūva ha //

ghaṭotkaco mahākāyaḥ pāṇḍavānpṛthayā saha /
abhivādya yathānyāyamabravīcca prabhāṣya tān //

kiṃ karomyahamāryāṇāṃ niḥśaṅkaṃ vadatānaghāḥ /
taṃ bruvantaṃ bhaimaseniṃ kuntī vacanamabravīt //

tvaṃ kurūṇāṃ kule jātaḥ sākṣādbhīmasamo hyasi /
jyeṣṭhaḥ putrosi pañcānāṃ sāhāyyaṃ kuru putraka //
vaiśampāyana uvāca /

pṛthayāpyevamuktastu praṇamyaiva vaco'bravīt / yathā hi rāvaṇo loke indrajicca mahābalaḥ /
varṣmavīryasamo loke viśiṣṭaścābhavaṃ nṛṣu //

kṛtyakāla upasthāsye pitṝniti ghaṭotkacaḥ /
āmantrya rakṣasāṃ śreṣṭhaḥ pratasthe cottarāṃ diśam //

sa hi sṛṣṭo bhagavatā śaktihetormahātmanā /
varṇasyāprativīryasya pratiyoddhā mahārathaḥ //
bhīma uvāca /

saha vāso mayā jīrṇastvayā kamalapālike /
punardrakṣyasi rājyasthānityabhāṣata tāṃ tadā //
hiḍimbovāca /

padā māṃ saṃsmareḥ kānta riraṃsū rahasi prabho /
tadā tava vaśaṃ bhūya āgantāsmyāśu bhārata //

ityuktvā sā jagāmāśu bhāvamāsajya pāṇḍave /
hiḍimbā samayaṃ smṛtvā svāṃ gatiṃ pratyapadyata //