Mahabharata · Chapter 1.168

yudhiṣṭhiravacaḥ śrutvā kuntīmaṅge'dhiropya sā /
bhīmārjunāntaragatā yamābhyāṃ ca puraskṛtā //

tiryagyudhiṣṭhire yāti hiḍimbā bhīmagāminī /
śālihotrasaro ramyamāsasāda jalārthinī //

vanaspatitalaṃ gatvā parimṛjya gṛhaṃ yathā /
pāṇḍavānāṃ ca vāsaṃ sā kṛtvā parṇamayaṃ tathā //

ātmanaśca tathā kuntyā ekoddeśe cakāra sā /
pāṇḍavāstu tataḥ snātvā śuddhāḥ sandhyāmupāsya ca //

tṛṣitāḥ kṣutpipāsārtā jalamātreṇa vartayan /
śālihotrastato jñātvā kṣudhārtānpāṇḍavāṃstadā //

manasā cintayāmāsa pānīyaṃ bhojanaṃ mahat /
tataste pāṇḍavāḥ sarve viśrāntāḥ pṛthayā saha //

yathā jatugṛhe vṛttaṃ rākṣasena kṛtaṃ ca yat /
kṛtvā kathā bahuvidhāḥ kathānte pāṇḍunandanam //

kuntī rājasutā vākyaṃ bhīmasenamathābravīt /
yathā pāṇḍustathā mānyastava jyeṣṭho yudhiṣṭhiraḥ //

ahaṃ dharmavidā'nena mānyā gurutarā tava /
tasmātpāṇḍuhitārthaṃ me yuvarāja hitaṃ kuru //

nikṛtā dhārtarāṣṭreṇa pāpenākṛtabuddhinā /
duṣkṛtasya pratīkāraṃ na paśyāmi vṛkodara //

tasmātkatipayāhena yogakṣemaṃ bhaviṣyati /
kṣemaṃ durgamimaṃ vāsaṃ vatsyāma hi yathā vayam //

idamanyanmahaduḥkhaṃ dharmakṛcchraṃ vṛkodara /
dṛṣṭvaiva tvāṃ mahāprājña anaṅgābhipracoditā //

yudhiṣṭhiraṃ ca māṃ caiva varayāmāsa dharmataḥ /
dharmārthaṃ dehi putraṃ tvaṃ sa naḥ śreyaḥ kariṣyati //

prativākyaṃ tu necchāmi āvayorvacanaṃ kuru /
vaiśampāyana uvāca /
tatheti tatpratijñāya bhīmaseno'bravīdidam //

śāsanaṃ te kariṣyāmi vedaśāsanamityapi /
samakṣaṃ bhrātṛmadhye tu tāṃ covāca sa rākṣasīm //

śṛṇu rākṣasi satyena samayaṃ te vadāmyaham / yāvatkālena bhavati putrasyotpādanaṃ śubhe //

tāvatkālaṃ cariṣyāmi tvayā saha sumadhyame /
viśeṣato matsakāśe mā prakāśaya nīcatām //

uttamastrīguṇopetā bhajethā varavarṇini /
vaiśampāyana uvāca /
sā tatheti pratijñāya hiḍimbā rākṣasī tathā //

gatā'hani niveśeṣu bhojyaṃ rājārhamānayat /
sā kadācidvihārārthaṃ hiḍimbā kāmarūpiṇī //

bhīmasenamupādāya ūrdhvamācakramaṃ tadā /
śailaśṛṅgeṣu ramyeṣu devatāyataneṣu ca //

mṛgapakṣivighṛṣṭeṣu ramaṇīyeṣu sarveṣu /
kṛtvā sā paramaṃ rūpaṃ sarvābharaṇabhūṣitā //

sañjalpantī sumadhuraṃ ramayāmāsa pāṇḍavam /
tathaiva vanadurgeṣu parvatadrumasānuṣu //

sarastu ramaṇīyeṣu padmotpalavaneṣu ca /
nadīdvīpapradeśeṣu vaiḍūryasikateṣu ca //

devāraṇyeṣu puṇyeṣu tathā parvatasānuṣu /
sutīrthavanatoyāsu tathā girinadīṣu ca //

sāgarasya pradeśeṣu bhaṇihemayuteṣu ca /
guhyakānāṃ nivāseṣu kulaparvatasānuṣu //

sarvartuphalavṛkṣeṣu mānaseṣu vaneṣu ca /
bibhratī paramaṃ rūpaṃ ramayāmāsa pāṇḍavam //

yathā sumodate svarge sukṛtyapsarasā saha /
sutarāṃ paramaprītastathā reme mahādyutiḥ //

śubhaṃ hi jaghanaṃ tasyāḥ savarṇamaṇimekhalam / na tatarpa tadā mṛdganbhīmaseno muhurmuhuḥ //

ramayantī tato bhīmaṃ tatratatra manojavā /
sā reme tena saṃharṣāttṛpyantī ca muhurmuhuḥ //

ahassu ramayantī sā niśākāleṣu pāṇḍavam /
ānīya vai svake gehe darśayāmāsa mātaram //

bhrātṛbhiḥ sahito nityaṃ svapate pāṇḍavastathā /
kuntyāḥ paricarantī sā tasyāḥ pārśvevasanniśāṃ //

kāmāṃśca mukhavāsādīnānayiṣyati bhojanam /
tasyāṃ rātryāṃ vyatītāyāmājagāma mahāvrataḥ //

pārāśaryo mahāprājño divyadarśī mahātapāḥ / te'bhivādya mahātmānaṃ kṛṣṇadvaipāyanaṃ śubham /
tasthuḥ prāñjalayaḥ sarve sasnuṣā caiva mādhavī //
śrīvyāsa uvāca /

mayedaṃ manasā pūrvaṃ viditaṃ bharatarṣabhāḥ /
yathā sthitairadharmeṇa dhārtarāṣṭraurvivāsitāḥ //

tadviditvā'smi samprāptaścikīrṣvai paraṃ hitam /
na viṣādo hi vaḥ kāryaḥ sarvametatsukhāya vaḥ //

suhṛdviyojanaṃ karma purākṛtamarindamāḥ /
tasya siddhiriyaṃ prāptā mā śocata parantapāḥ //

samāpte duṣkṛte caiva yūyaṃ te vai na saṃśayaḥ /
svarāṣṭre vihariṣyanto bhaviṣyatha sabāndhavāḥ //

dīnato bālataścaiva snehaṃ kurvanti bāndhavāḥ /
tasmādabhyadhikaḥ sneho yuṣmāsu mama samprati //

snehapūrvaṃ cikīrṣāmi hitaṃ yattannibodhata /
vasateha praticchannā mamāgamanakāṅkṣiṇaḥ //

etadvai śālihotrasya tapasā nirmitaṃ saraḥ /
ramaṇīyamidaṃ toyaṃ kṣutpipāsāśramāpaham //

kāryārthinastu ṣaṇmāsānviharadhvaṃ yathāsukham //
vaiśampāyana uvāca /

evaṃ sa tānsamāśvāsya vyāsaḥ pārthānarindamān /
snehācca sampariṣvajya kuntīmāśvāsayatprabhuḥ //

snuṣe mā roda mā rodetyevaṃ vyāso'bravīdvacaḥ /
jīvaputre sutaste'yaṃ dharmanityo yudhiṣṭhiraḥ //

pṛthivyāṃ pārthaivānsarvānpraśāsiṣyati dharmarāṭ /
dharmeṇa jitvā pṛthivīmakhilāṃ dharmakṛdvaśī //

sthāpayitvā vaśe sarvāṃ saparvatavanāṃ śubhām /
bhīmasenārjunabalādbhokṣyatyayamasaṃśayam //

putrāstava ca mādryāśca pañcaite lokaviśrutāḥ /
svarāṣṭre vihariṣyanti sukhaṃ sumanasastadā //

yakṣyanti ca naravyāghrā vijitya pṛthivīmimām /
rājasūyāśvamedhādyaiḥ kratubhirbhūridakṣiṇaiḥ //

anugṛhya suhṛdvargaṃ dhanena ca sukhena ca /
pitṛpaitāmahaṃ rājyamahāriṣyanti te sutāḥ //

snuṣā kamalapatrākṣī nāmnā kamalapālikā /
vaśavartinī tu bhīmasya putrameṣā janiṣyati //

tena putreṇa kṛcchreṣu bhaviṣyatha ca tāritāḥ /
iha māsaṃ pratīkṣadhvamāgamiṣyāmyahaṃ punaḥ //

deśakālau viditvaivaṃ yāsyadhvaṃ paramāṃ mudam //
vaiśampāyana uvāca /

sa taiḥ prāñjalibhiḥ sarvaistathetyukto janādhipa /
jagāma bhagavānvyāso yathāgatamṛṣiḥ prabhuḥ //