Mahabharata · Chapter 1.170

tataste pāṇḍavāḥ sarve śālihotrāśrame tadā /
pūjitāstena vanyena tamāmantrya mahāmunim //

jaṭāḥ kṛtvā'tmanaḥ sarve valkalājinavāsasaḥ /
kuntyā saha mahātmāno bibhratastāpasaṃ vapuḥ //

brāhmaṃ vedamadhīyānā vedāṅgāni ca sarvaśaḥ /
nītiśāstraṃ ca dharmajñā nyāyajñānaṃ ca pāṇḍavāḥ //

śālihotraprasādena labdhvā prītimavāpya ca / te vanena vanaṃ gatvā ghnanto mṛgagaṇānbahūn /
apakramya yayū rājaṃstvaramāṇā mahārathāḥ //

matsyāṃstrigartānpāñcālānkīcakānantareṇa ca /
ramaṇīyānvanoddeśānprekṣamāṇāḥ sarāṃsi ca //

kvacidvahanto jananīṃ tvaramāṇā mahārathāḥ /
kvacicchrāntāśca kāntāre kvacittiṣṭhanti harṣitāḥ //

kvacicchandena gacchantaste jagmuḥ prasabhaṃ punaḥ /
pathi dvaipāyana sarve dadṛśuḥ svapitāmaham //

te'bhivādya mahātmānaṃ kṛṣṇadvaipāyanaṃ tadā /
tasthuḥ prāñjalayaḥ sarve saha mātrā parantapāḥ //
vyāsa uvāca /

tadāśramānnirgamanaṃ mayā jñātaṃ nararṣabhāḥ /
ghaṭotkacasya cotpattiṃ jñātvā prītiravardhata //

idaṃ nagaramabhyāśe ramaṇīyaṃ nirāmayam /
vasateha praticchannā mamāgamanakāṅkṣiṇaḥ //
vaiśampāyana uvāca /

evaṃ sa tānsamāśvāsya vyāsaḥ pārtānarindamān /
ekacakrāmabhigatāṃ kuntīmāśvāsayatprabhuḥ //
śrīvyāsa uvāca /

kuryānna kevalaṃ dharmaṃ duṣkṛtaṃ ca tathāna naraḥ /
sukṛtaṃ duṣkṛtaṃ loke na kartā nāsti kaścana //

avaśyaṃ labhate kartā phalaṃ vai puṇyapāpayoḥ /
duṣkṛtasya phalenaiva prāptaṃ vyasanamuttamam //

tasmānmādhavi mānārhe mā ca śoke manaḥ kṛthāḥ /
vaiśampāyana uvāca /
evamuktvā niveśyainānbrāhmaṇasya niveśane //

jagāma bhagavānvyāso yatākāmamṛṣiḥ prabhuḥ //