Mahabharata · Chapter 1.167

sā tānevāpatattūrṇaṃ bhaginī tasya rakṣasaḥ /
abruvāṇā hiḍimbā tu rākṣasī pāṇḍavānprati //

abhivādya tataḥ kuntīṃ dharmarājaṃ ca pāṇḍavam /
abhipūjya tataḥ sarvānbhīmasenamabhāṣata //

ahaṃ te darśādeva manmathasya vaśaṃ gatā /
krūraṃ bhrātṛvaco hitvā sā tvāmevānirundhatī //

rākṣase raudrasaṅkāśe tavāpaśyaṃ viceṣṭitam / ahaṃ śuśrūṣuriccheyaṃ tava gātraṃ niṣevitum //
bhīmasena uvāca /

smaranti vairaṃ rakṣāṃsi māyāmāśritya mohinīm /
hiḍimbe vraja panthānaṃ tvamimaṃ bhrātṛsevitam //
yudhiṣṭhira uvāca /

kruddho'pi puruṣavyāghra bhīma mā sma striyaṃ vadhīḥ /
śarīraguptyabhyadhikaṃ dharmaṃ gopāya pāṇḍava //

vadhābhiprāyamāyāntamavadhīstvaṃ mahābalam /
rakṣasastasya bhaginī kiṃ naḥ kruddhā kariṣyati //
vaiśampāyana uvāca /

hiḍimbā tu tataḥ kuntīmabhivādya kṛtāñjaliḥ /
yudhiṣṭhiraṃ tu kaunteyamidaṃ vacanamabravīt //

ārye jānāsi yadduḥkhamiha strīṇāmanaṅgajam /
tadidaṃ māmanuprāptaṃ bhīmasenakṛte śubhe //

soḍhaṃ tatparamaṃ duḥkhaṃ mayā kālapratīkṣayā /
so'yamabhyāgataḥ kālo bhavitā me sukhodayaḥ //

mayā hyutsṛjya suhṛdaḥ svadharmaṃ svajanaṃ tathā /
vṛto'yaṃ puruṣavyāghrastava putraḥ patiḥ śubhe //

vīreṇā'haṃ tathā'nena tvayā cāpi yaśasvinī /
pratyākhyātā na jīvāmi satyametadbravīmi te //

yadarhasi kṛpāṃ kartuṃ mayi tvaṃ varavarṇini /
matvā mūḍheti tanmāṃ tvaṃ bhaktā vā'nugateti vā //

bhartrā'nena mahābhāge saṃyojaya sutena ha / samupādāya gaccheyaṃ yatheṣṭaṃ devarūpiṇam /
punaścaivānayiṣyāmi visrambhaṃ kuru me śubhe //

ahaṃ hi samaye lapsye prāgbhrāturaparvajanāt /
tataḥ so'bhyapatadrātrau bhīmasenajighāṃsayā //

yathāyathā vikramate yathārimadhitiṣṭhati /
tathātathā samāsādya pāṇḍavaṃ kāmamohitā //

na yātudhānyahaṃ tvārye na cāsmi rajanīcarī /
īśā rakṣassvasā hyasmi rājñi sālakaṭaṅkaṭī //

putreṇa tava saṃyuktā yuvatirdevavarṇinī /
sarvānvo'hamupasthāsye puraskṛtya vṛkodaram //

apramattā pramatteṣu śuśrūṣurasakṛttvaham / vṛjine tārayiṣyāmi dāsīvacca nararṣabhāḥ //

pṛṣṭhena vo vahiṣyāmi vimānaṃ sukṛtāniva /
yūyaṃ prasādaṃ kuruta bhīmaseno bhajeta mām //

evaṃ bruvantī ha tathā pratyākhyātā kriyāṃ prati /
bhūmyāṃ duṣkṛtino lokāngamiṣye'haṃ na saṃśayaḥ //

ahaṃ hi manasā dhyātvā sarvaṃ vetsyāmi sarvadā / āpannistaraṇe prāṇāndhārayiṣye na kenacit //

sarvamāvṛtya kartavyaṃ dharmaṃ samanupaśyatā /
āpatsu yo dhārayati sa vai dharmaviduttamaḥ //

vyasanaṃ hyeva dharmasya dharmiṇāmāpaducyate /
pumyātprāṇāndhārayati puṇyaṃ vai prāṇadhāraṇam //

yena kenācareddharmaṃ tasmingarhā na vidyate /
mahato'tra striyaṃ kāmādvādhitāṃ trāhi māmapi //

dharmārthakāmamokṣeṣu dayāṃ kurvanti sādhavaḥ /
tattu dharmamiti prāhurmunayo dharmavatsalāḥ //

divyajñānena jānāmi vyatītānāgatānaham /
tasmādvakṣyāmi vaḥ śreya āsannaṃ sara uttamam //

adyāsādya saraḥ snātvā viśramya ca vanaspatau /
śvaḥ prabhāte mahadbhūtaṃ prādurbhūtaṃ jagatpatim //

vyāsaṃ kamalapatrākṣaṃ dṛṣṭvā śokaṃ vihāsyatha /
dhārtarāṣṭrādvivāsaṃ ca dahanaṃ vāraṇāvate //

trāṇaṃ ca vidurāttubhyaṃ viditaṃ jñānacakṣuṣā /
āvāse śālihotrasya sa vo vāsaṃ vidhāsyati //

varṣavātātapasaho hyayaṃ puṇyo vanaspatiḥ /
pītamātre tu pānīye kṣutpipāse vinaśyataḥ //

tapasā śālihotreṇa saro vṛkṣaśca nirmitaḥ /
kādambāḥ sārasā haṃsāḥ kuraryaḥ kuraraiḥ saha //

ruvanti madhuraṃ gītaṃ gāndharvasvanamiśritam /
vaiśampāyana uvāca /
tasyāstadvacanaṃ śrutvā kuntī vacanamabravīt //

yudhiṣṭhiraṃ mahāprājñaṃ sarvadharmaviśāradam /
kuntyuvāca /
tvaṃ hi dharmabhṛtāṃ śreṣṭho mayoktaṃ śṛṇu bhārata //

rākṣasyeṣā hi vākyena dharmaṃ vadati sādhu vai /
bhāvena duṣṭā bhīmaṃ vai kiṃ kariṣyati rākṣasī //

bhajatāṃ pāṇḍavaṃ vīramapatyārthaṃ yadīcchasi /
yudhiṣṭhira uvāca /
evametadyathā'ttha tvaṃ hiḍimbe nātra saṃśayaḥ //

sthātavyaṃ tu tvayā dharme yathā brūyāṃ sumadhyame / nityaṃ kṛtāhnikā snātā kṛtaśaucā surūpiṇī //

snātaṃ kṛtāhnikaṃ bhadre kṛtakautukamaṅgalam /
bhīmasenaṃ bhajethāstvamudite vai divākare //

ahassu viharānena yathākāmaṃ manojavā /
ayaṃ tvānayitavyaste bhīmasenaḥ sadā niśi //

prāksandhyāto vimoktavyo rakṣitavyaśca nityaśaḥ /
evaṃ ramasva bhīmena yāvadgarbhasya vedanam //

eṣa te samayo bhadre śuśrūṣā cāpramattayā /
nityānukūlayā bhūtvā kartavyaṃ śobhanaṃ tvayā //